පාස්කු ප්‍රහාරයෙන් පසුව නතර කරන ලද මද්‍රසා පාසල්වල මවුලවිවරුන් පුහුණු කරන අල්අලීම් විභාගය යළි පවත්වන්නැයි මුස්ලිම් මැති ඇමැතිවරු සහ මුස්ලිම් පාසල්වල විදුහල්පතිවරු ජනාධිපති රනිල් වික්‍රමසිංහගෙන් ඉල්ලා තිබේ.

ජනාධිපතිවරයා සහ එම පිරිස අතර පසුගියදා පැවැති සාකච්ඡාවකදී කර තිබෙන මෙම ඉල්ලීම සම්බන්ධයෙන් නිර්දේශ ඉදිරිපත් කිරීම සඳහා සියලු ක්ෂේත්‍ර නියෝජනය වන පරිදි කමිටුවක් පත් කිරීමට අධ්‍යාපන අමාත්‍යාංශය තීරණය කර ඇත.

මෙම තීරණය ගැනීමට හේතු වී ඇත්තේ නිසි පැහැදිලි කිරීමක් ලැබෙන තෙක් එම විභාගය පැවැත්වීමට නොහැකි බව විභාග දෙපාර්තමේන්තුව දන්වා සිටීමය.

එම විභාගයට අදාළව මද්‍රසා පාසල්වල කෙරෙන ඉගැන්වීම් සම්බන්ධයෙන් පාස්කු ප්‍රහාරයෙන් පසු සමාජයේ බරපතළ කතාබහක් පැවැති අතර ඒ එම ගැටලු සහගත තත්ත්වයට විසඳුමක් ලැබෙන තෙක් එම විභාගය පැවැත්වීම විභාග දෙපාර්තමේන්තුව විසින් නතර කරන ලදි.

පසුව ඒ සම්බන්ධයෙන් සොයා බලා නිර්දේශ ඉදිරිපත් කිරීමට කමිටුවක් පත් කරන ලද නමුත් එම කමිටුවේ කටයුතුද අතරමග නතර විය. මේ අතර පාස්කු ප්‍රහාරයට අදාළව මාවනැල්ල අධිකරණයේ පැවැති නඩු විභාගයකදී ද මෙම විභාගය සම්බන්ධයෙන් කරුණු විමසා තිබිණි.

විභාගය පැවැත්වීමට නිසි පැහැදිලි කිරීමක් අවශ්‍ය බව විභාග දෙපාර්තමේන්තුව දන්වා ඇත්තේ මෙම තත්ත්වය මතය.

පසුගිය කාලයේ පැවැති ගැටලු සහගත තත්ත්වයන් හේතුවෙන් වසර තුනක පමණ කාලයක් දහම් පාසල් විභාග පැවැත්වීමටද දෙපාර්තමේන්තුවට නොහැකි වූ අතර මුස්ලිම් ප්‍රජාව ඉහත ඉල්ලීම කර ඇත්තේ දහම් පාසල් විභාග යළි පැවැත්වීමට දෙපාර්තමේන්තුව පියවර ගැනීමත් සමගය. ඔවුන් සඳහන් කරන්නේ අල්අලීම් විභාගය දහම් පාසල් විභාගය හා සමාන බවකි.

– Aruna