කච්චතිව් දූපත ශ්‍රී ලංකාවට පැවරීමේ ඓතිහාසික ලේඛන ගම්මන්පිල ඉල්ලයි

Apr 12, 2024 at 07:17 AM

|

Lanka Leader

කච්චතිව් දූපත ශ්‍රී ලංකාවට පැවරීම පිළිබඳව ඉන්දියානු මැතිවරණ වේදිකාවේ උණුසුම් මාතෘකාවක් වී ඇති බැවින්ද ඒ පිළිබඳ ජාත්‍යන්තර අධිකරණයේ නඩු පවරන බවට තමිල්නාඩු ප්‍රාන්ත ආණ්ඩුව ප්‍රකාශ කරන බැවින් ද මේ සම්බන්ධ සැබෑ තත්වය පිළිබදව මෙරට ජනතාව දැනුම්වත් කල යුතු බව පිවිතුරු හෙල උරුමයේ නායක උදය ගම්මන්පිල මහතා පවසයි.

ඒ අරමුණින් කච්චතිව් දූපත ශ්‍රී ලංකාවට පැවරීම සම්බන්ධයෙන් වන ඓතිහාසික ලේඛනයන් තොරතුරු දැනගැනීමේ පනත යටතේ ලබා දෙන ලෙස ඒ මහතා විසින් විදේශ කටයුතු අමාත්‍යාංශයෙන් ඉල්ලීමට කටයුතු කර ඇත.

ඊට අදාල ලිපිය මෙහි දැක්වෙයි.

2024 අප්‍රේල් 11 දින

තොරතුරු නිලධාරි
විදේශ කටයුතු අමාත්‍යාංශය
ජනරජ ගොඩනැගිල්ල
ශ්‍රීමත් බරොන් ජයතිලක මාවත
කොළඹ 1

හිතවත් තොරතුරු නිලධාරිතුමනි

කච්චතිව් දූපත ශ්‍රී ලංකාවට පැවරීම පිළිබඳ ඓතිහාසික ලේඛණ ලබා ගැනීම

කච්චතිව දූපත ශ්‍රී ලංකාවට පැවරීම පිළිබඳ ඉන්දියානු මැතිවරණ වේදිකාවේ උණුසුම් මාතෘකාවක් වී ඇති බැවින් ද ඒ පිළිබඳ ජාත්‍යන්තර අධිකරණයේ නඩු පවරන බවට තමිල්නාඩු ප්‍රාන්ත ආණ්ඩුව ප්‍රකාශ කර ඇති බැවින් ද මතු දැක්වෙන ලේඛණයන්ගේ පිටපත් 2016 අංක 12 දරණ තොරතුරු දැන ගැනීමේ පනතේ විධිවිධාන අනුව හැකි ඉක්මනින් ලබා දීමට කටයුතු කරන්නේ නම් සහතඥ වෙමි.

1) ශ්‍රී ලංකාව විසින් ඉතිහාසය පුරා කච්චතිව දූපත පාලනය කළ බවට ක්‍රිස්තු වර්ෂ 12 වන සියවසේ සිට පවතින ඓතිහාසික සාක්ෂි

2) 17 වන සියවසේ දී කච්චතිව් දූපත ඉන්දියාවේ රාමනාද් රාජධානියේ පාලනයට නතු වීමට බලපෑ හේතු දැක්වෙන ලේඛණ

3) 1920 දී කච්චතිව් දූපත බ්‍රිතාන්‍ය ඉන්දියාවෙන් ශ්‍රී ලංකාවට ලබා ගැනීමට ශ්‍රී ලංකාව විසින් ඉදිරිපත් කළ අයිතිය තහවුරු කිරීමේ ලේඛණ

4) 1974 දී අත්සන් කළ ඉන්දියාව සහ ශ්‍රී ලංකාව අතර මුහුදු සීමා නිර්ණය කිරීමේ ගිවිසුම

5) 1976 මාර්තු මාසයේ දී අත්සන් කළ ඉන්දියාව සහ ශ්‍රී ලංකාව අතර මුහුදු සීමා නිර්ණය කිරීමේ ගිවිසුම

6) 1976 ජුලි මාසයේ දී අත්සන් කළ ඉන්දියාව, මාල දිවයින සහ ශ්‍රී ලංකාව අතර මුහුදු සීමා නිර්ණය කිරීමේ ගිවිසුම

7) කච්චතිව් දූපත සම්බන්ධයෙන් ශ්‍රී ලංකාව සහ ඉන්දියාව අතර හුවමාරු වී ඇති ලිපි

8) කච්චතිව දුපත සම්බන්ධයෙන් ශ්‍රී ලංකාව සහ ඉන්දියාව අතර පැවැති සාකච්ජාවන්හි වාර්තා

මෙයට ඔබේ සේවයට කැප වුණු
උදය ගම්මන්පිල