දේශපාලන ඉතිහාසයේ දැවැන්තම වියදමත් අපතේ යයි.. මස්ක්ට අමෙරිකානු මැතිවරණයෙන් ප්‍රබල පසුබෑමක්..

Nov 5, 2026 at 07:47 AM

|

Lanka Leader

අමෙරිකානු මධ්‍යවාර මැතිවරණයෙන් රිපබ්ලිකන් පක්ෂයට ජයග්‍රහණය ලබාදීම සඳහා ලෝක ධනවත්ම පුද්ගලයෙකු වන එලෝන් මස්ක් වැය කළ අමෙරිකානු ඩොලර් මිලියන 450කට ආසන්න මුදල සම්පූර්ණයෙන්ම අපතේ ගොස් ඇති බව  BBC  පුවත් සේවය වාර්තා කරයි. 

බ්‍රිතාන්‍ය පවුම් මිලියන 334කට ආසන්න වන මෙම මුදල, අමෙරිකානු මැතිවරණ ඉතිහාසයේ එක් පුද්ගලයෙකු දේශපාලන අපේක්ෂකයින් වෙනුවෙන් කළ ඉහළම මූල්‍ය ආයෝජනය වුවද, ඩිමොක්‍රටික් පක්ෂයේ දැවැන්ත පරාජය වැළැක්වීමට එය ප්‍රමාණවත් වී නැත. 

විශේෂයෙන්ම ටෙක්සාස් ප්‍රාන්තයේ සෙනෙට් ආසනයට තරග කළ රිපබ්ලිකන් අපේක්ෂකයා වෙනුවෙන් පමණක් මස්ක් ඩොලර් මිලියන 45ක් වැය කළද, අවසානයේ එම ආසනය ඩිමොක්‍රටික් අපේක්ෂකයා විසින් දිනාගැනීමට සමත් වීම ඔහුට එල්ල වූ ප්‍රබල පසුබෑමකි. 

ටෙක්සාස්ට අමතරව ඇරිසෝනා, මිචිගන්, විස්කොන්සින් සහ මිනසෝටා යන ප්‍රාන්තවල රිපබ්ලිකන් අපේක්ෂකයින් වෙනුවෙන්ද ඔහු විශාල වශයෙන් මුදල් ආයෝජනය කර තිබිණි.

රිපබ්ලිකන් පක්ෂයට බලය අහිමි වීම එලෝන් මස්ක්ගේ ව්‍යාපාරික අධිරාජ්‍යයටද දැඩි ලෙස බලපාන බව ආර්ථික විශ්ලේෂකයින් පෙන්වා දෙති. ට්‍රම්ප් යළි ජනාධිපති වීමෙන් පසු SpaceX සමාගමට ඩොලර් බිලියන 10ක පමණ නව කොන්ත්‍රාත්තු හිමිව තිබුණද, ඩිමොක්‍රටික් නීති සම්පාදකයින් එම රජයේ කොන්ත්‍රාත්තු සහ ආරක්ෂක සම්බන්ධතා දැඩි විමර්ශනයකට ලක් කළ යුතුය යන ස්ථාවරයක පසුවේ. 

මීට අමතරව, කෘත්‍රිම බුද්ධි දත්ත මධ්‍යස්ථාන ඉදිකිරීම් සම්බන්ධයෙන් නව නියාමන පැනවීමේ අවදානමක් මතුව ඇති අතර, මැතිවරණයෙන් පසු අමෙරිකානු තාක්ෂණ සමාගම්වලට දැඩි නියාමන ප්‍රතිපත්තිවලට මුහුණ දීමට සිදුවනු ඇති බවට ආයෝජන විශ්ලේෂකයින් අනතුරු අඟවා ඇත.

මැතිවරණ ප්‍රතිඵලයෙන් පසු, මිලියන 241කට අධික තමාගේ X අනුගාමිකයින්ගෙන් රිපබ්ලිකන් පක්ෂයට ඡන්දය ඉල්ලා පළ කර තිබූ සටහන් සහ ඩිමොක්‍රටික් ජයග්‍රහණය ගැන තමන් තුළ ඇති කනස්සල්ල දැක්වූ පෝස්ට් කිහිපයක්ම මස්ක් විසින් ඉවත් කරගෙන තිබේ. 

ඉන් අනතුරුව ඔහු සිය අවධානය සම්පූර්ණයෙන්ම තම xAI සමාගමේ කෘත්‍රිම බුද්ධි තාක්ෂණික කටයුතු ප්‍රවර්ධනය කිරීමට යොමු කර ඇත.