භාණ්ඩ ආනයනය කරන මුවාවෙන් ඩොලර් මිලියන ගණනක මුදල් විදෙස් රටවලට යැවූ ජාවාරමක් ගැන තොරතුරු එළියට..

Jun 12, 2026 at 12:04 PM

|

Lanka Leader

ශ්‍රී ලංකාවේදී සිදුවූ මහා පරිමාණ විදේශ මුදල් වංචාවක් සම්බන්ධයෙන් තොරතුරු හෙළිකර ගැනීමට හැකිවී තිබෙන බව මහජන ආරක්ෂක අමාත්‍ය ආනන්ද විජේපාල පවසයි.

භාණ්ඩ ආනයන කරන මුවාවෙන් ජාවාරම්කරුවන් පිරිසක් විසින් මෙරට බැංකු හරහා සිදු කරන ලද ටෙලිග්‍රැෆික් ට්‍රාන්සර් හරහා විශාල ඩොලර් ප්‍රමාණයක් විදේශ රටවලට බැහැර කර ඇති බවට සිදුකර ඇති විමර්ශනවලින් කරුණු අනාවරණය වී ඇති බව ද අමාත්‍යවරයා පැවසීය.

ඔවුන් වෙත ලද තොරතුරු අනුව ශ්‍රී ලංකා පොලිසිය සහ ශ්‍රී ලංකා රේගුව විසින් සිදු කරන ලද විමර්ශනවලදී මේ සම්බන්ධයෙන් තොරතුරු අනාවරණ වී ඇති බව ඔහු කියා සිටියේය.

සිදුව ඇත්තේ කුමක් ද?

මහජන ආරක්ෂක අමාත්‍ය ආනන්ද විජේපාල පැවසුවේ, විදේශ රටවල සිට භාණ්ඩ ආනයනය කරන බවට පවසමින් මෙරට ලියාපදිංචි කළ සමාගම් එම වංචාව සිදුකර ඇති බවට තොරතුරු හෙළි වී ඇති බවය.

ඩොලර් බිලියන 7.2ක්ව තිබූ ශ්‍රී ලංකාවේ විදේශ සංචිත බිලියන 6.8ක් දක්වා පහත වැටුණේ ඇයි?

"මේ හෙළිදරව් කරගෙන ඇති කරුණුවලට අනුව මොවුන් ව්‍යාපාර කරන බවට අඟවමින් සමාගම් විශාල ගණනක් ලියාපදිංචි කරලා තියෙනවා. ඔවුන් ඒ සමාගම් හරහා පිටරටට භාණ්ඩ අපනයන කරන මුවාවෙන් තමයි මේ ජාවාරම කරලා තියෙන්නේ. ඒ අනුව ඔවුන් විගම්ම්‍ය විද්‍යුත් පැවරුම් ක්‍රම හෙවත් ටෙලිග්‍රැෆික් ට්‍රාන්සර් කියන ක්‍රමය හරහා විශාල මුදල් ප්‍රමාණයක් විදේශ රටවලට යවලා තිබුණත් ඔවුන් කිසිදු භාණ්ඩයක් මෙරටට ගෙනල්ලා නැහැ," අමාත්‍යවරයා පැවසුවේ ය.

'ඇමෙරිකානු ඩොලර් මිලියන 42.7ක් රටින් පිට කරලා'

2025 වසරේදී කැලණිය ප්‍රදේශයේදී සැකකටයුතු ත්‍රිරෝද රථයක් පිළිබඳ සිදුකළ පරීක්ෂණයේදී හෙළිවූ කරුණු මත විශාල පරිමාණයේ ඇමෙරිකානු ඩොලර් මුදල් ප්‍රමාණයක් මෙරට සිට විදේශ රටවලට යවා ඇති බවට කරුණු අනාවරණය වී ඇති බව මහජන ආරක්ෂක අමාත්‍යවරයා අනාවරණ කළේය.

"2025 ඔක්තෝබර් 22 වන දා කැලණිය අපරාධ විමර්ශන කොට්ඨාසයේ විමර්ශන කාර්යාංශයේ නිලධාරීන් පෑලියගොඩ ප්‍රදේශයේදී සැකකටයුතු ත්‍රිරෝද රථයක් පරීක්ෂාවට ලක් කරලා ඒකෙ තිබිලා රුපියල් කෝටි 3ක මුදලක් සොයා ගන්නවා. ඒ මුදල් සමග සැකකරුවන් දෙදෙනෙක් අත්අඩංගුවට ගත්තා. ඔවුන්ගෙන් මේ මුදල් උපයා ගත් ආකාරය සම්බන්ධයෙන් විමසීමක් කළත් ඒ ගැන තොරතුරු ලබා දෙන්න ඔවුන් අපොහොසත් වෙනවා.

"ඒ ගැන කරපු විමර්ශනවලදී තවත් පුද්ගලයින් 6 දෙනෙක් අත්අඩංගුවට ගන්නවා. මේ අත්අඩංගුවට ගත්ත පුද්ගලයින් 6 දෙනාගෙන් ප්‍රශ්න කළත් ඔවුන්ටත් මුදල් උපයා ගත්ත ආකාරය ගැන තොරතුරු හෙළි කරන්න හැකියාවක් ලැබිලා නැහැ. මේ මුදල් මත්ද්‍රව්‍ය ජාවාරම් හෝ වෙනත් අපරාධයකින් උපයා ගත් දේපළ බවට සැකකරලයි මේ 6 දෙනා අත්අඩංගුව ගන්නේ.

"පස්සේ පොලිස්පතිවරයා මේ විමර්ශනය පොලිස් මධ්‍යම අපරාධ විමර්ශන කාර්යාංශයට භාර දෙනවා. ඒ අනුව සැකකටයුතු මුදල් Next Gen ප්‍රයිවට් ලිමිටඩ් සමාගම විසින් බැංකුගත කිරීම සඳහා ලබාදුන් මුදල් බවට තහවුරු වී තියෙනවා. මේ සමාගම අවස්ථා 953කදී විගම්ම්‍ය විද්‍යුත් පැවරුම නැත්නම් ටෙලිග්‍රැෆික් ට්‍රාන්සර් හරහා රුපියල් කෝටි 1289ක මුදලක් විදේශ රටවල් 26ක සමාගම් 256කට හුවමාරු කරලා තියෙනවා කියලා අනාවරණය වෙලා තියෙනවා.

"ඒ අනුව ඇමෙරිකානු ඩොලර් මිලියන 42.7ක් රටින් පිට කරලා තියෙනවා. මේ මුදල් යවලා තියෙන්නේ පිටරට ඉඳලා භාණ්ඩ ගෙන්වන්න කියල වුණත් කිසිම භාණ්ඩයක් ගෙන්නලා නැහැ," අමාත්‍යවරයා කරුණු පැහැදිලි කරමින් කියා සිටියේ ය.

මේ අතර මෑතකදී වාර්තා වූ NDB බැංකුවේ රුපියල් බිලියන 13ක මූල්‍ය වංචාවට අදාළ මුදල් ද මෙම සමාගම හරහා විදේශ රටවලට යවා ඇති බවට විමර්ශනවලදී කරුණු හෙළිවී ඇති බව අමාත්‍ය ආනන්ද විජේපාල පාර්ලිමේන්තුව හමුවේ කරුණු අනාවරණය කළේ ය.

"මේ සමාගම 2025 ජූලි මාසයේ 2 වැනි දා එක ම පුද්ගලයෙක් අධ්‍යක්ෂක සහ කොටස් හිමිකරු ලෙස පෙන්නලා ලියාපදිංචි කරපු සමාගමක්. ඔවුන් කිසිදු නීත්‍යනුකූල ව්‍යාපාරික කටයුත්තක් කරලා නැහැ. මේ සමාගම විසින් භාණ්ඩ මිල දී ගන්නා බව කියමින් මුදල් යවලා තියෙනවා.

"මෑත කාලයේදී සිද්ධ වුණු NDB බැංකුවේ රුපියල් බිලියන 13ක මූල්‍ය වංචාවට අදාළ මුදල් ද මේ ගනුදෙනුව හරහා රටින් පිටකර ඇති බවට විමර්ශනවලින් තොරතුරු අනාවරණය වෙලා තියෙනවා. මේ සමාගමට අයත් වැල්ලම්පිටිය ප්‍රදේශයේ රාජ්‍ය සහ පෞද්ගලික බැංකු දෙකක ගිණුම් අක්‍රීය කරන්න පියවර ගෙන තිබෙනවා."

එමෙන් ම සිද්ධිය සම්බන්ධයෙන් වැඩිදුර විමර්ශන ක්‍රියාත්මක බව ද අමාත්‍යවරයා පැවසීය.

'විදේශ රටවල් 108කට මුදල් යවලා'

එමෙන් ම හෙරොයින් ජාවාරමක් සම්බන්ධයෙන් සිදුකළ විමර්ශනයකදී හෙළිවූ කරුණු අනුව සිදුකළ විමර්ශනයකදී පිටකොටුවේ පිහිටි පෞද්ගලික බැංකුවක පවත්වාගෙන යනු ලබන ජංගම ගිණුම් 4ක් හරහා විදේශ රටවල් 108කට ඇමෙරිකානු ඩොලර් මිලියන 43ක් යවා ඇති බවට වන තොරතුරු විමර්ශන නිලධාරීන් හෙළි කර ගෙන ඇති බව ද මෙහිදී අමාත්‍යවරයා පැවසීය.

"මීගමුව පොලිසිය විසින් හෙරොයින් සන්තකයේ තබාගෙන සිටි පුද්ගලයින් හතර දෙනෙකු ඉකුත් පෙබරවාරි 15 වන දා අත්අඩංගුවට ගන්නවා. ඔවුන් හෙරොයින් ලබා ගැනීමට අදාළ මුදල් දිවුලපිටිය ප්‍රදේශයේ පෞද්ගලික බැංකුවක පවත්වාගෙන යන ගිණුමක තැන්පත් කරනවා. මේ ගිණුම ඩුබායිහි සිට අන්තර්ජාලය ඔස්සේ මත්ද්‍රව්‍ය ජාවාරම සිදුකරන පුද්ගලයෙකුගේ බවට අනාවරණය වෙනවා.

"මේ දිවුලපිටිය ප්‍රදේශයේ පෞද්ගලික බැංකුවේ ගිණුමේ තියෙන මුදල් කොළඹ පිටකොටුවේ තියෙන තවත් පුද්ගලික බැංකුවක ගිණුමට බැර වෙලා තියෙනවා. පිටකොටුවේ තියෙන බැංකු ගිණුම පවත්වාගෙන ගිහින් තියෙන්නේ AY ඉන්වෙස්ට්මන්ට් සමාගම. එම සමාගමේ ගිණුමේ රුපියල් බිලියන 2.2ක මුදලක් තියෙනවා කියලා හෙළිවෙලා තියෙනවා. 2024 සැප්තැම්බර් මාසයේ 9 වැනි දා මේ බැංකු ගිණුම ආරම්භ කරලා තියෙනවා කියලා විමර්ශනවලින් තොරතුරු සඳහන් වෙනවා.

පිටකොටුවේ ඉහත ගිණුමේ තියෙන මුදල් දවස් 2-3 කට වරක් චෙක් පත්වලින් අරගෙන පිටකොටුවේ තියෙන වෙනත් පෞද්ගලික බැංකුවක AY ඉන්වෙස්ට්මන්ට් කියන නමින් තියෙන තවත් ජංගම ගිණුම් 4කට තැන්පත් කරලා ඒ හරහා රුපියල් කෝටි 1300ක මුදලක් විදේශ රටවලට යවනවා විගම්ම්‍ය විද්‍යුත් පැවරුම හරහා. 2025 ඔක්තෝබර් 30 වැනි දා ඉඳලා මේ වසරේ මාර්තු 4 වැනි දා කියන කාලය අතරතුරේදී මේ මුදල් හුවමාරු කිරීම් සිද්ධ කරන්නේ. මේ කෙටි කාලය තුළ ඇමෙරිකානු ඩොලර් මිලියන 43ක් විදේශ රටවලට යවලා තියෙනවා.

"භාණ්ඩ ආනයනය කරනවා කියලා හඟවලා රටවල් 108කට විගම්ම්‍ය විද්‍යුත් පැවරුම් හරහා මුදල් හුවමාරු කරලා තිබුණත්, එම සමාගම විසින් මෙරටට ගෙන්වන බවට කියා තිබුණු හාඩ්වෙයාර් භාණ්ඩ, බාත්රූම් උපකරණ හෝ රත්ත්‍රන් කිසිවක් මෙරටට ගෙනල්ලා නැහැ. ඒ වගේ ම මේ කිසි ම සමාගමක් භාණ්ඩ ආනයන අපනයන සමාගම් විදිහට ශ්‍රී ලංකා රේගුවේ ලියාපදිංචි වෙලත් නැහැ. මේ ගිණුම්වල රුපියල් පන් කෝටි තිස්හය ලක්ෂයක් ශේෂය විදිහට තිබුණා. අපරාධයකින් උත්පාදිත මුදලක් විදිහට ඒ මුදල් දැනට අක්‍රීය කරලා තියෙනවා," අමාත්‍යවරයා කියා සිටියේය.

'ටෙලිග්‍රැෆික් ට්‍රාන්සර් 26,108ක් සිදු කරලා'

2023 වසරේ සිට මේ දක්වා ටෙලිග්‍රැෆික් ට්‍රාන්සර් ක්‍රමය හරහා අවස්ථා 26,108කදී විදේශ රටවල් සඳහා මුදල් යවා ඇති බවට තොරතුරු අනාවරණය වී ඇති බවත් ඇතැම් බැංකුවල නිලධාරීන්ගේ වගවීම සම්බන්ධයෙන් ද විමර්ශනය සිදුකරන බවත් අමාත්‍යවරයා කරුණු දක්වමින් කියා සිටියේය.

"2023 ජනවාරි මාසයේ 1 වැනි දා ඉඳලා 2025 වසරේ සැප්තැම්බර් 30 වැනි දා දක්වා කාලය අතරතුර භාණ්ඩ ආනයනය සිදුකරන බවට අඟවා විශාල මුදල් ප්‍රමාණයක් විදේශ රටවලට ප්‍රේෂණය කර ඇති බවට ශ්‍රී ලංකා රේගුව විසින් පොලිසියට පැමිණි කර තියෙනවා. කිසිදු භාණ්ඩයක් මෙරටට නොගෙන්වා ටෙලිග්‍රැෆික් ට්‍රාන්සර් 26,108ක් මේ සඳහා භාවිත කරලා තියෙනවා. බැංකු 13කට අදාළ ගිණුම් 227ක් හරහා තමයි මේ කාරණය සිදුකරලා තියෙන්නේ. මේකෙන් අපේ රටේ විදේශ විනිමය විශාල ප්‍රමාණයක් ටෙලිග්‍රැෆික් ට්‍රාන්සර් හරහා වෙනත් රටවලට යවලා තියෙනවා.

"මේකට දේශීය සමාගම් 105ක් සම්බන්ධ වී ඇති බවට තහවුරු වී තියෙනවා. මේ ගැන අපි පූර්ණ විමර්ශනයක් කළා මේ සමාගම් සම්බන්ධයෙන්. එතකොට හෙළි වුණා මේ සමාගම්වල ඉන්නේ සමාගම් ලේකම්වරු හෝ අධ්‍යක්ෂකවරුන් 55ක් විතරයි. ඒකෙන් පෙනී යනවා එක ම කණ්ඩායමක් විසින් ඉතාමත් කෙටි කාලයක් ඇතුළත සමාගමක් පවත්වාගෙන ගිහිල්ලා ඒ සමාගම හරහා ටෙලිග්‍රැෆික් ට්‍රාන්සර් හරහා භාණ්ඩ ආනයනයට කියලා මුදල් යවලා පස්සේ තවත් සමාගමක් ආරම්භ කරලා මේ ජාවාරම සිද්ධ කරලා තියෙනවා.

"එක ම දවසේ අවස්ථා 14කදී එක පෞද්ගලික බැංකුවකින් ටෙලිග්‍රැෆික් ට්‍රාන්සර් මුදල් හුවමාරු කරලා තියෙනවා, මේ නිසා ඇතැම් නිලධාරීන්ගේ වගවීම සම්බන්ධයෙන් වෙනම විමර්ශනයක් සිද්ධ කරනවා. මේ විමර්ශන ආරම්භ කරලා තියෙන්නේ 2023 ඉඳලා, එයට කලින් සිදුවෙලා තියෙන එවැනි ගනුදෙනු සම්බන්ධයෙන් වෙන ම විමර්ශනයක් සිද්ධ කරනවා," ඔහු පැවසීය.

ආනයන සහ අපනයන ක්‍රියාවලි සම්බන්ධයෙන් නිකුත් කර ඇති ගැසට් නිවේදනවලට අදාළව ඇතැම් ක්‍රියාපටිපාටින් සිදු වී නොමැති බවත්, මෙම විමර්ශන සම්බන්ධයෙන් ජනාධිපතිවරයාට කරුණු වාර්තා කිරීමෙන් අනතුරුව ඉදිරි ක්‍රියාමාර්ග ගැනීම සම්බන්ධයෙන් විශේෂ සාකච්ජාවක් ද පැවති බවත් අමාත්‍ය ආනන්ද විජේපාල කියා සිටියේ ය.

'මේක නතර කරන්න තාක්ෂණය අවශ්‍යයි'

බොහෝ පුද්ගලයින් නීතිවිරෝධී අයුරින් ඉපැයූ මුදල් සහ ආදයම් බදු වෙත ඉදිරිපත් කිරීමට අපොහොසත්වූ මුදල් විවිධ ක්‍රම ඔස්සේ ආයෝජනය කර ඇති බව වයඹ විශ්වවිද්‍යාලයේ කළමනාකරණ හා මූල්‍ය පීඨයේ මහාචාර්ය අමින්ද මෙත්සිල පෙරේරා බීබීසී සිංහල කළ විමසීමකදී පැවසුවේ ය.

"ගොඩක් වෙලාවට නීතිවිරෝධී ක්‍රමයට සහ බදුවලට පෙන්නුවේ නැති සල්ලි තමයි මේ විදිහට ආයෝජනය කරන්නේ. පහුගිය කාලයේදී පිරිමිඩ් යෝජනා ක්‍රමවල මුදල් ආයෝජනය කරපු අය ඒ මුදල් වංචා කළාට පස්සේ නඩු දැම්මත් පස්සේ ඒවා ඉල්ලා අස්කර ගන්නවා. තමන් මුදල් උපයා ගත්තේ කොහොම ද කියලා පෙන්වන්න බැරි වුණා ම යි ගොඩක් දෙනා මෙහෙම දේවල් කරන්නේ," ඔහු පැහැදිලි කළේය.

මෙරට ඇතැම් ඇමැතිවරුන් සිය වත්කම් බැරකම් ප්‍රකාශයන්හි ක්‍රිප්ටෝ කරන්සි මුදල් ආයෝජනය කර ඇති බවට පිළිගෙන තිබුණ ද මෙරට ක්‍රිප්ටෝ කරන්සි නීතිගත කර නොමැති බව ද ඔහු පැවසීය.

"ලංකාවේ ක්‍රිප්ටෝ කරන්සි ඇපෘව් කරලා නැහැ. හැබැයි අපි දන්නවා ක්‍රිප්ටෝ කරන්සිස්වල සල්ලි දාලා තියෙනවා කියලා පිළි අරන් තියෙනවා ලංකාවේ පාර්ලිමේන්තුවේ ඇමැතිවරුන් ම තමන්ගේ වත්කම් බැරකම් ප්‍රකාශ තුළ. එහෙම වුණා ම ඒ අයවත් අත්අඩංගුවට ගන්න ඕන මේ ක්‍රියාවලිය තුළ. මේක නවත්වන්න නම් තාක්ෂණය අවශ්‍ය වෙනවා," ඔහු ප්‍රකාශ කළේ ය.

එමෙන් ම, මේ සම්බන්ධයෙන් වැඩිදුරටත් කරුණු පැහැදිලි කළ මහචාර්ය අමින්ද මෙත්සිල පෙරේරා පෙන්වා දුන්නේ, මෙරටදී විදෙස් මුදල් ඒකක සඳහා නිසි වටිනාකමක් නොලැබීම හේතුවෙන් බොහෝ දෙනා නීතිවිරෝධී අයුරින් මුදල් වෙනත් රටවලට යැවීමට කටයුතු කරන බවයි.

"කරන්සි එකේ හරි මිල තීරණය කරන්න දුන්නේ නැති වුණා ම ගොඩක් රටවල්වල උණ්ඩියල් හරි වෙනත් නීතිවිරෝධී ක්‍රම හරහා රටින් පිටට මුදල් ගෙනියනවා. මේක 2022 අවුරුද්දේදී වගේ ම ඊට කලිනුත් ඇති වෙලා තියෙනවා. පහුගිය කාලයේ අපිට පොඩි ප්‍රශ්නයක් තිබුණා. ඩොලර් එකේ වටිනාකම සහ වෙළෙදපොළේ තිබ්බ ඩොලර් එකේ වටිනාකම අතර යම් ආකාරයක වෙනසක් තිබුණා . අපි හැම තිස්සෙම බලාපොරොත්තු වෙන්නේ අපේ තියෙන ඩොලර් එකට වැඩිම වටිනාකමක් ගන්න. ඒ සඳහා සමහර පුද්ගලයෝ අනීතික ක්‍රමයට ඩොලර් හුවමාරු කරනවා. ඒක නතර කරන්න නම් වෙළෙදපොළේ වගේ ම බැංකුවල තියෙන ඩොලරයට ලැබෙන වටිනාකම එක අගයකට ගේන්න ඕන. ඒකට අපි කියන්නේ පූර්ණ නිදහස් වෙළෙඳපළක් යටතේ ඩොලර් එකේ අගය තීරණය කරන්න ඉඩ දෙන්න ඕන," හෙතෙම කියා සිටියේය.

- bbc සිංහල