මාලිමා ආණ්ඩුව දෙමළ ඩයස්පෝරාව සතුටු කිරීම සඳහා මහා පාවාදීමකට සැරසෙයි - ජාතික සංවිධානවලින් චෝදනා

Feb 4, 2026 at 05:53 AM

|

Lanka Leader

පසුගිය 2026/01/12 දින පැවැත්වූ අමාත්‍ය මණ්ඩල රැස්වීමේ දී මුදල් විශුද්ධිකරණයට අදාළ පනත් 3ක් සංශෝධනය කිරීමට තීරණය කිරීම පිළිබඳව ලංකා ලීඩර් ජාතික සංවිධානවල මතය විමසන ලදී. මේ වෛද්‍ය වසන්ත බණ්ඩාර මහතාගේ මතය ඔහුගේ වචනයෙන්,

"ඔබලාගේ නිරීක්ෂණය ඉතා අගය කරනවා. එම අමාත්‍ය මණ්ඩල රැස්වීමේ දී මුදල් ගනුදෙනු වාර්තා කිරීමේ පනත (2006), මුදල් විශුද්ධිකරණය වැළැක්වීමේ පනත (2006) සහ ත්‍රස්තවාදයට මුදල් සැපයීම වැළැක්වීමේ පනත (2005) යන පනත් ත්‍රිත්වය සංශෝධනය කිරීමට තීරණය කරනවා. මෙය ඉතා බරපතළ තත්ත්වයක්. ඊට හේතුව බෙදුම්වාදී දෙමළ ඩයස්පෝරාව දීර්ඝ කාලයක් තිස්සේ අපේක්ෂා කළ උපාය මාර්ගික හැරවුමක්. පසුගිය දිනවල පාර්ලිමේන්තු මන්ත්‍රී ශානක්‍ය කැනඩාවේ දෙමළ ඩයස්පෝරාව අමතමින් සඳහන් කරනවා " ආණ්ඩුව ආර්ථික අර්බුදයක ගිලිලා ඉන්නවා. අපි ඒ අවස්ථාව පාවිච්චි කරන්න ඕන, අපේ අරමුණ ඉටුකර ගැනීම සඳහා" යනුවෙන්. ඔවුන් ඒ මගින් අදහස් කරන්නේ ඔවුන් සතු කළු සල්ලි ශ්‍රී ලංකාවටගෙන ඒමට සහ ඒ මගින් රටේ දේපළ සහ ආර්ථිකයේ සැලකිය යුතු කොටසක් අත්පත් කරගැනීමට දැන් ඒ අවස්ථාව ලැබී තිබෙනවා.

දෙමළ ඩයස්පෝරාව විදේශගත දෙමළ ජනතාවගේ මුදල් සහ ආයෝජන මගින් වාර්ෂිකව ඩොලර් මිලියන 300කට අධික අරමුදල් ප්‍රමාණයක් රැස්කරනවා. ඊට අමතරව මත්ද්‍රව්‍ය සහ වෙනත් අපරාධවලට සම්බන්ධ ඩොලර් බිලියන 300ක මුදලක් වාර්ෂිකව ලෝකයේ සැරිසරනවා. දෙමළ ඩයස්පෝරාවට එම අරමුදල්වලින් යම් ප්‍රමාණයක් හැසිරවීමේ හැකියාව තිබෙනවා.

ඒ අනුව ඉහත සඳහන් කළ පනත සංශෝධනය කර එම කළු සල්ලි ශ්‍රී ලංකාවේ ආයෝජනය කිරීම සඳහා ඉඩ ලබාදුන හොත් ආයෝජන කෙසේ වෙතත් රටේ රාජ්‍ය සහ පුද්ගලික දේපළ අත්පත් කරගැනීමට දෙමළ ඩයස්පෝරාවට අවස්ථාව ලැබෙනවා. ඒ අනුව උතුරු නැගෙනහිර බෙදා වෙන්කිරීමේ ක්‍රියාවලියට ආණ්ඩුව යටත් කිරීම සඳහා පමණක් නොව දකුණේ රාජ්‍ය සහ පුද්ගලික දේපළ සැලසුම් සහගතව අත්පත් කරගැනීමටද අවස්ථාව සැලසෙනවා."