ආරක්ෂක අවබෝධතා ගිවිසුම රහසිගතව සඟවා ඇත! මහජනතාවට එහි ඇත්තේ කුමක්දැයි දැනගැනීමේ අයිතියක් ඇත!- ජිහාන් හමීඩ්

Apr 5, 2025 at 12:45 PM

|

Lanka Leader

සිවිල් ක්‍රියාකාරිනියක වන ජිහාන් හමීඩ් මහත්මිය ආරක්ෂක ලේකම් සම්පත් තුයියකොන්ත මහතා ඉන්දියාවේ අගමැති සහ ශ්‍රී ලංකාවේ ජනාධිපතිවරයා අතර අත්සන් කරනු ලබන ආරක්ෂක ගිවිසුම සම්බන්ධයෙන් කළ පැහැදිළි කිරීම අභියෝගයට ලක් කරමින් ප්‍රකාශයක් නිකුත් කර තිබේ. පහත පලවන්නේ ජිහාන් හමීඩ් මහත්මිය විසින් කරනු ලැබූ සම්පූර්ණ ප්‍රකාශයයි...

ශ්‍රී ලංකාව සහ ඉන්දියාව අතර අත්සන් කරනු ලබන ආරක්ෂක ගිවිසුම සම්බන්ධයෙන් ආරක්ෂක ලේකම් සම්පත් තුයියකොන්තා විසින් කරන ලද ප්‍රකාශය විනාශකාරී මග හැරීමකි. ගිවිසුම “ජාත්‍යන්තරව පිළිගත් හොඳම භාවිතයන්ට” අනුකූල වන බව ඔහු කියා සිටියද, ඔහු වඩාත් තීරණාත්මක ප්‍රශ්නය වන  මෙම ගිවිසුමේ පාඨය ප්‍රසිද්ධියට පත් කර නැත්තේ ඇයි? යන ප්‍රශ්නය පහසුවෙන් මඟ හරිනු ලබයි.

මෙය සාමාන්‍ය රාජ්‍ය පරිපාලන කාරණයක් නොවේ. මෙය ස්වෛරී ජාතීන් දෙකක් අතර බැඳී ඇති ආරක්ෂක ගිවිසුමකි. එය ඉදිරි වසර සඳහා ශ්‍රී ලංකාවේ උපායමාර්ගික ප්‍රවේශයන් නැවත හැඩගස්වනු ඇත. එහෙත්, එහි ප්‍රතිපාදන වලින් වඩාත්ම බලපෑමට ලක්වන මේ රටේ ජනතාව අඳුරේ තබයි.

මහජන හෙළිදරව් කිරීම සඳහා සුදුසු හෝ නුසුදුසු දේ ඒකපාර්ශ්විකව තීරණය කිරීමට ලේකම්වරයාට සදාචාරාත්මක හෝ ව්‍යවස්ථාමය වරමක් ලබා දී නොමැත. මෙය ඔහුගේ පරමාධිපත්‍යය නොවනවා පමණක් නොව  එය තොරතුරු දැනගැනීමේ අයිතිවාසිකම් පනත යටතේ සහතික කර ඇති සහ ප්‍රජාතන්ත්‍රවාදී පාලනයේ මූලධර්මවල මුල් බැසගත් මහජන අයිතිය පිළිබඳ කාරණයකි.

මෙම ගිවිසුම පුහුණුව හෝ සහයෝගීතාවය සම්බන්ධයෙන් පමණක් අත්සන් කරන ගිවිසුමක් නොවේ. එයට හමුදා උපාය මාර්ග, ආරක්ෂක තාක්ෂණ හුවමාරුව සහ සමහර විට බුද්ධි සහයෝගීතාවයද ඇතුළත් වේ. මේවා සංවේදී ක්ෂේත්‍ර වන අතර එහිදී අවදානමට ලක්වන්නේ ජාතික ආරක්ෂාව, ස්වෛරීභාවය සහ ශ්‍රී ලංකාවේ දිගුකාලීන ස්වාධීනත්වයයි.

“කැබිනට් අනුමැතිය” සහ “මැදිහත් නොවීම” පිළිබඳ නොපැහැදිලි සහතික කිරීම් වැනි ක්‍රියා පටිපාටික විධිමත්භාවයන් පිටුපස සැඟවී සිටීම මහජන විශ්වාසය ගොඩනැගීම පිණිස කිසිවක් නොකරයි. ඊට පටහැනිව, රහස්‍යභාවය පිළිබඳ සැකය ඇති කරයි.

මෙම අවබෝධතා ගිවිසුම සැබවින්ම ශ්‍රී ලංකාවේ ජාතික අවශ්‍යතා සඳහා නම්, සම්පූර්ණ ලේඛනය නිකුත් නොකරන්නේ මන්ද? මහජනතාවට, පාර්ලිමේන්තුවට සහ ස්වාධීන ආරක්ෂක විශ්ලේෂකයින්ට එය සමාලෝචනය කිරීමට ඉඩ නොදෙන්නේ ඇයි?. මෙවැනි ගිවිසුමක විනිවිදභාවය ජාතික ආරක්ෂාවට තර්ජනයක් නොවනවා මෙන්ම එය එහි ශක්තිමත්ම සගයා වේ.

ආරක්ෂක ලේකම්වරයාට මතක් කර දිය යුතුත්තේ ශ්‍රී ලංකාව හමුදා රාජ්‍යයක් නොවේය යන්නයි. ආරක්ෂක ප්‍රතිපත්තිය සිවිල් අධීක්ෂණය සහ මහජන වගවීම යටතේ පැවතිය යුතුයි. මෙම අවබෝධතා ගිවිසුමේ සම්පූර්ණ අන්තර්ගතය හෙළිදරව් කරන තුරු, එය නිහඬව මහජනතාව මත බලහත්කාරයෙන් රහසිගතව පැටවූ ගනුදෙනුවක් හැර අන් කිසිවක් නොවනු ඇත.