අනුර - මෝදි හොර ගිවිසුම්වල තොරතුරු ආණ්ඩුව දිගින් දිගටම යට ගසයි - ජේ.ආර් වත් නොකළ දේ අනුර කරයි..

Jun 6, 2025 at 05:50 PM

|

Lanka Leader

ඉන්දියාව සමග ශ්‍රී ලංකා රජය අත්සන් කළ ගිවිසුම් හත සම්බන්ධයෙන් තොරතුරු ලබා නොදීම ගැන  ජාතික සංවිධාන  විසින් කළ අභියාචනයකට පිළිතුරු සපයමින් ඉකුත් 4 වැනි දා  අමාත්‍ය මණ්ඩල ලේකම්වරයා විසින් දේශහිතෛෂී ජාතික ව්‍යාපාරයේ මහ ලේකම් වෛද්‍ය වසන්ත බණ්ඩාර මහතා වෙත ලිපියක් මගින් දන්වා තිබුනේ එම අභියාචනය ප්‍රතික්ෂේප කරන බවයි.

ඉන්දියාව සමග ශ්‍රී ලංකා රජය අත්සන් කළ ගිවිසුම් හත සම්බන්ධයෙන් මෙතෙක්  ආණ්ඩුව පාර්ශ්වයෙන් කරුණු හෙළිදරව් කිරීමක් සිදු නොකර ඇති පසුබිමක, මෙම ගිවිසුම් සම්බන්ධයෙන් තොරතුරු දැනගැනීමේ පනත යටතේ තොරතුරු ලබා දෙන්නැයි දේශහිතෛෂී ජාතික ව්‍යාපාරයේ මහ ලේකම් වෛද්‍ය වසන්ත බණ්ඩාර මහතා  විසින් තොරතුරු නිළධාරීවරයාගෙන් ඉල්ලා සිටීමේ දී මෙම ඇතැම් ගිවිසුම්  බාහිර පාර්ශ්වයක් වෙත ලබාදීමට නොහැකි බව දන්වමින් තොරතුරු  නිලධාරීවරයා විසින් ඒ එ මහතා වෙත පසුගිය දිනෙක ලිපියක් මගින් දන්වා තිබිණි.

ආරක්ෂක අමාත්‍යංශය විසින් තමන් වෙත මෙම තොරතුරු ලබා නොදෙන ලෙස දන්වා ඇති බවත් තොරතුරු නිලධාරිවරයා එම ලිපියෙන් දැනුම් දී තිබිණි

එම කරුණු සනාථ කරමින් අමාත්‍ය මණ්ඩල ලේකම්වරයා, වෛද්‍ය වසන්ත බණ්ඩාර මහතා  විසින් කළ අභියාචනයකට පිළිතුරු සපයමින් ලිපියක් මගින් දන්වා තිබුනේ ගිවිසුම් 2කට අදාළ තොරතුරු ලබාදීම තොරතුරු නිලධාරියා විසින් ප්‍රතික්ෂේප කර ඇත්තේ පනතේ විධිවිධාන යටතේ බවයි.

එබැවින් ඊට අදාළව සිදුකළ අභියාචනය ප්‍රතික්ෂේප කරන බවද එම ලිපිය මගින් දන්වා තිබේ.

කෙසේවුවද, ආණ්ඩුව මෙම ගිවිසුම් සම්බන්ධයෙන් මෙසේ කරුණු හෙළිදරව් කිරීම ප්‍රතික්ෂේප කරන වාතාවරණයක, මෙම ගිවිසුම් බලරහිත බව ප්‍රකාශයට පත්කිරීම වෙනුවෙන් ජාතික සංවිධාන විසින් ගොනු කරනු ලැබු පෙත්සම ඊයේ (5) දින ‍ශ්‍රේෂ්ඨාධිකරණයේ දී පළමු වරට විභාගයට ගැනීම ද සිදුවිය.

මෙහි පැමිණිලි පාර්ෂවය වෙනුවෙන් ආචාර්ය ගුණදාස අමරසේකර, වෛද්‍ය වසන්ත බණ්ඩාර, වෛද්‍ය අසෝක කමලදාස, නිතිඥ නුවන් බැල්ලන්තුඩාව, ශමේන්ද්‍ර වික්‍රමආරච්චි, චමින්ද ප්‍රියදර්ශන යන මහත්වරුන් එහිදී ඉදිරිපත් වූ අතර, මෙම ගිවිසුම් අත්සන් කර තිබෙන ආකාරය අනුව මාස තුනකට පසුව මෙම ගිවිසුම්වලට එරෙහිව අධිකරණයේ කරුණු දැක්වීමට නොහැකි හෙයින් මාස තුනකට පෙර මෙම නඩුව විභාගයට ගතයුතු බවට ශ්‍රේෂ්ඨාධිකරණ විනිසුරුවරුන් විසින් නීතිපති දෙපාර්තුමේන්තුවට මෙහිදී  දැනුම් දෙන ලදී.

ඒ අනුව ඉතා නුදුරේදීම මෙම පෙත්සම විභාගයට ගැනීමට නියමිතව තිබේ.

මේ අතර, උද්ගත වී ඇති මෙම වාතාවරණය සම්බන්ධයෙන් කරුණු දක්වමින් බොහෝ පාර්ශ්ව පෙන්වා දෙන්නේ ජේ.ආර්. ජයවර්ධනගේ සමයේ ඉන්දු - ලංකා ගිවිසුම අත්සන් තැබීමේ දී  එවකට ජේ.ආර් ජයවර්ධනගේ ආණ්ඩුව පවා මෙබඳු ලෙසින් හැසිරී නොමැති බවය. 

එකල ඉන්දු - ලංකා ගිවිසුමට එරෙහිව නැගීසිටි ජනතා විමුක්ති පෙරමුණ අද ආණ්ඩු බලය දරණ ජනතා විමුක්ති පෙරමුණ දැයි දැඩි ප්‍රශ්නාර්ථයක් මතුවන බවත් ඔවුහු පවසති..

මෙම ගිවිසුම් ජනතාවගෙන් සැඟවීමට ආණ්ඩුව විසින් උත්සාහ දරන්නේ ඉන්දියා විසින් සිදුකරන බලපෑමට යටත්වී බවත්, මෙම ගිවිසුම් හරහා ඉන්දියාව තම ආධිපත්‍ය මෙරට තුළ ක්‍රියාත්මක කිරීමේ සූක්ෂම වැඩපිළිවෙළට මේවන විටත් අවතීර්ණ වී ඇති  බවත් එම පාර්ශව පෙන්වා දෙයි.

2016 අංක 12 දරන තොරතුරු දැනගැනීමේ අයිතිවාසිකම පිළිබඳ පනතේ විධිවිධාන යටතේ තොරතුරු ඉල්ලා සිටීම පිළිබඳ අභියාචනය සම්බන්ධයෙන් තීරණය දැනුම් දීම සඳහා අමාත්‍ය මණ්ඩල ලේකම්වරයා විසින් දේශහිතෛෂී ජාතික ව්‍යාපාරයේ මහ ලේකම් වෛද්‍ය වසන්ත බණ්ඩාර මහතා වෙත එවූ ලිපිය පහළින්..