බූස්ස බන්ධනාගාරයේ රඳවා සිටින මෙරට පාතාලයේ සහ මත්ද්‍රව්‍ය ජාලයේ මහ කෙරුම්කාරයන් ලෙස සැලකෙන ගණේමුල්ලේ සංජීව, කුඩු සලිඳු, වෙලේ සුදා සහ පොඩි ලැසී නමැති අපරාධකාරයන් බන්ධනාගාරයේ සිට නැවතත් මත්ද්‍රව්‍ය ජාවාරම් සහ පාතාල ක්‍රියාකාරකම් ආරම්භ කර ඇති බව පොලිස් විශේෂ කාර්ය බළකාය විසින් අනාවරණය කරගෙන ඇත.

මේ සම්බන්ධයෙන් පොලිස්පති දේශබන්දු තෙන්නකෝන් මහතා කියා සිටියේ බූස්ස බන්ධනාගාරයේ රඳවා සිටින මෙම පාතාල අපරාධකරුවන් සහ මත්ද්‍රව්‍ය ජාවාරම්කරුවන් සතුව තිබී නවීන පන්නයේ ජංගම දුරකථන හයක් අත්අඩංගුවට ගැනීමෙන් පසු මොවුන්ගේ මෙම පාතාල ක්‍රියාකාරකම් පිළිබඳව තොරතුරු හෙළි වූ බවයි.

ගණේමුල්ලේ සංජීව සහ කුඩු සලිඳු නමැති පාතාල අපරාධකරුවන් දෙදෙනා වසර එකහමාරකට ආසන්න කාලයක් රැඳවුම් නියෝග මත පොලිසියේ රඳවා සිටියදී ඔවුන් කිසිම ආකාරයකින් පාතාල ක්‍රියාකාරකම් හෝ මත්ද්‍රව්‍ය ජාවාරම්වලට සම්බන්ධ වී නොසිටි බව පොලිස්පතිවරයා පවසයි.

එහෙත් මෙම අපරාධකරුවන් බන්ධනාගාර ගත කිරීමත් සමගම ඔවුන් සුපුරුදු ලෙස ජංගම දුරකථන භාවිතා කරමින් සිය පාතාල කල්ලි සහ මත්ද්‍රව්‍ය ජාලය මෙහෙය වන බව තෙන්නකෝන් මහතා වැඩිදුරටත් කියා සිටියේය.

පොලිස් විශේෂ කාර්ය බළකාය සහ බූස්ස බන්ධනාගාරයේ නිලධාරීන් ඒකාබද්ධව සිකුරාදා අලුයම සිදුකළ සෝදිසි මෙහෙයුමකදී එම බන්ධනාගාරයේ දැඩි රැකවරණ යටතේ රඳවා සිටින කුඩු සලිඳු සහ වෙලේ සුදා සතුව තිබී ස්මාර්ට් වර්ගයේ අති නවීන ජංගම දුරකථන 04ක් සොයාගැනීමට හැකි විය.

මීට දින තුනකට උඩදී බූස්ස බන්ධනාගාරය තුළ කළ මෙහෙයුමකදී ගණේමුල්ලේ සංජීව සහ පොඩි ලැසී සතුව තිබී තවත් ස්මාර්ට් දුරකථන දෙකක් සොයා ගන්නා ලදී.

- දිවයින -