පාස්කු ප්‍රහාරය ගැන නීතිමය කටයුතු කරන්නැයි ඉල්ලා සිටිය දී ශානි අබේසේකරලා, රවි සෙනෙවිරත්නලා දුවගෙන ගොස් මජර youtube කාරයන්ට ප්‍රකාශ ලබාදෙමින් එසේ ඉල්ලා සිටි පිරිසට මඩගසන බව විශ්‍රාමික සහකාර පොලිස් අධිකාරී සේනක කුමාරසිංහ මහතා පවසයි.

ඊ නිව්ස් පවත්වාගෙන යන පුද්ගලයා තමන් අපරාධ පරීක්ෂණ දෙපාර්තමේන්තුවේ වැඩකරමින් සිටි කාලයේ තමන්ගෙන් උදව් ඉල්ලූ බවත්, තමන් එය ප්‍රතික්ෂේප කළ බවත් පවසන ඒ මහතා ඉන්පසු ශානි  අබේසේකර ඔහුට උදව් කිරීමට පටන්ගත් බවත් පවසයි.

ඒ මහතා මේ බව පැවසුවේ තොරතුරු තිබියදීත් පාස්කු ප්‍රහාරය වළක්වා ගැනීමට අපරාධ පරීක්ෂණ දෙපාර්තමේන්තුවේ එවකට හිටපු නියෝජ්‍ය පොලිස්පතිවරයා සහ අධ්‍යක්ෂවරයා කටයුතු නොකළ බව කියමින් ඒ සම්බන්ධයෙන් විමර්ශනයක් කරන ලෙස  එම දෙපාර්තමේන්තුව හමුවේ පැමිණිල්ලක් කරමිනි.

මෙම පැමිණිල්ලට අනුව විශ්‍රාමික නියෝජ්‍ය පොලිස්පති පාලිත සිරිවර්ධන සහ විශ්‍රාමික සහකාර පොලිස් අධිකාරි සේනක කුමාරසිංහ මහත්වරුන්ගෙන් අපරාධ පරීක්ෂණ දෙපාර්තමේන්තුව ඉකුත් 06දා පැය 7ක් තිස්සේ ප්‍රකාශ ලබාගෙන තිබිණි.

පාස්කු ප්‍රහාරය එල්ල වන දිනය, එය එල්ල කිරීමට සූදානමින් සිටින පිරිස ඇතුළු වැදගත් තොරතුරු රැසක් එවකට පොලිස් බුද්ධි අංශ ප්‍රධානි නියෝජ්‍ය පොලිස්පති නිලන්ත ජයවර්ධන මහතා විසින් එවකට අපරාධ පරීක්ෂණ දෙපාර්තමේන්තු ප්‍රධානීන් වෙත දැනුම් දී තිබූ බව පාලිත සිරිවර්ධන කළ පැමිණිල්ලේ සඳහන් වෙයි.

එසේ තොරතුරු ලබා දී තිබියදීත් ප්‍රහාරයට සම්බන්ධ සහරාන් ඇතුළු පිරිස අත්අඩංගුවට ගැනීමට එවකට අපරාධ පරීක්ෂණ දෙපාර්තමේන්තුවේ නියෝජ්‍ය පොලිස්පති රවී සෙනෙවිරත්න සහ අධ්‍යක්ෂ ශානි අබේසේකර යන මහත්වරුන් කටයුතු නොකළ බවට මෙම පැමිණිල්ල මගින් චෝදනා එල්ල කර ඇත.