පොහොට්ටුවේ ජනපති අපේක්ෂකත්වය ලැබෙනකල් බලාගෙන ඉන්නවා - ධම්මික පෙරේරා

Jul 6, 2024 at 07:35 AM

|

Lanka Leader

ඉදිරි ජනාධිපතිවරණයට ඉදිරිපත් වීම සඳහා තමන් ශ්‍රී ලංකා පොදුජන පෙරමුණේ අපේක්ෂකත්වය අපේක්ෂාවෙන් සිටින බව ව්‍යාපාරික, ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී ධම්මික පෙරේරා මහතා ඊයේ (05දා) පැවැසීය.

ඒ මහතා ඒ පිළිබඳව සඳහන් කර සිටියේ ශ්‍රී ලංකා පොදුජන පෙරමුණේ වෘත්තීයවේදීන්ගේ මෙහෙයුම් කාර්යාලය විවෘත කිරීමේ අවස්ථාවට එක් වෙමිණි. එම කාර්යාලය ඊයේ (05දා) දිනයේදී එම පක්ෂයේ මහලේකම් සාගර කාරියවසම් මහතාගේ ප්‍රධානත්වයෙන් ආරම්භ වූ අතර එම අවස්ථාවට එම පක්ෂයේ ජාතික සංවිධායක නාමල් රාජපක්ෂ මහතා මෙන්ම වෘත්තීයවේදීන් විශාල පිරිසක් එක්ව සිටියහ.

එහිදී මාධ්‍ය වෙත අදහස් දැක්වූ ධම්මික පෙරේරා මහතා මෙසේද පැවැසීය.

"ශ්‍රී ලංකා පොදුජන පෙරමුණ කියන්නේ ශ්‍රී ලංකාවේ තිබෙන ලොකුම පක්‍ෂයයි. දැන් මේ රටේ තිබෙන ලොකුම ප්‍රශ්නය තමයි ආර්ථිකය දියුණු කරන්නේ කොහොමද කියන එක. රටක ආර්ථික දියුණුව ඒකපුද්ගල ආදායමෙන් තමයි මනින්නේ. 2005 දී මහින්ද රාජපක්‍ෂ මහතා රට භාර ගන්න කොට ඒකපුද්ගල ආදායම ඩොලර් 1250යි. 2005 දී ආරම්භ කළ මහින්ද චින්තන හා බැඳුණු ආර්ථික සංවර්ධන වැඩපිළිවෙළ නිසා 2014 දී මහින්ද රාපක්‍ෂ මහතා යළි රට භාර දෙන කොට ඒකපුද්ගල ආදායම 3850 දක්වා වැඩිවී තිබුණා. එදා සිට අද වනවිට වසර 10ක් ගත වී තිබෙනවා. දැන් ඒකපුද්ගල ආදායම 3830යි. ඒ කියන්නේ 2014ට වඩා ඩොලර් 20ක් පිටුපසින් සිටින්නේ. පසුගිය වසර 10ක කාලය තුළ කිසිම දෙයක් සිද්ධ වෙලා නැහැ. ඒක තමයි ඔබලාට දැනෙන ප්‍රශ්නය. මේ රටේ ජනතාවගෙන් 40%ක් තවම තීරණය කරලා නැහැ කාටද ඡන්දය දෙන්නේ කියලා. තව දවස් 90න් මැතිවරණය තිබෙනවා. ශ්‍රී ලංකා පොදුජන පෙරමුණ සෑම දෙයක්ම නිවැරදි වෙලාවෙ දි තීරණය කරලා තිබෙනවා. රටේ ආර්ථිකය නැංවීමට අවශ්‍ය වැඩපිළිවෙළක් මම සකස් කරලා තිබෙනවා. මට අපේක්ෂකත්වය දෙනකොට ඒ පිළිබඳව විමසාවි කියලා මම සිතනවා."