WhatsApp දුරකතන අංක හැකරුන් පැහැර ගනියි! අංකය හිමිකරුගේ හිතවතුන්ගේ මුදල් හැකරුන් ක්ෂණිකව පැහැර ගනියි!

Jun 21, 2026 at 11:44 PM

|

Lanka Leader

මේ වන විට ශ්‍රී ලංකාවේ වෛද්‍යවරුන්, ඉංජිනේරුවන්, නීතිඥයන්, ව්‍යාපාරිකයන් සහ සමාජයේ පිළිගත් පුද්ගලයන් ඇතුළු විවිධ වෘත්තීය කණ්ඩායම්වල පුද්ගලයන්ගේ WhatsApp ගිණුම් සයිබර් අපරාධකරුවන් විසින් අනවසරයෙන් අත්පත් කර ගැනීමේ (hacking) සිද්ධීන් ඉහළ යමින් පවතින බව වාර්තා වේ.

එම ගිණුම් අත්පත් කර ගැනීම සඳහා සයිබර් අපරාධකරුවන් පහත ක්‍රම එකක් හෝ කිහිපයක් භාවිත කරන බව අනාවරණය වී ඇත.

OTP (One-Time Password) හෙවත් එක් වරක් පමණක් භාවිත කළ හැකි මුරපදය වංචා සහගත ලෙස ගිණුම් හිමියන්ගෙන් ලබා ගැනීම.

Two-step Verification Code හෙවත් දෙපියවර සත්‍යාපන කේතය ලබා ගැනීම සඳහා රැවටීම් සිදු කිරීම.

Phishing හෙවත් අන්තර්ජාල වංචා මගින් පුද්ගලික තොරතුරු සහ සත්‍යාපන දත්ත ලබා ගැනීම.

App Permissions හෙවත් යෙදුම්වලට අනවශ්‍ය ප්‍රවේශ අවසර ලබා දීමට පරිශීලකයන් රැවටීම.

මෙවැනි ක්‍රම මගින් WhatsApp ගිණුම් අනවසරයෙන් භාවිතයට ලක්වන අතර, පසුව එම ගිණුම් භාවිත කර ගිණුම් හිමියාගේ හිතවතුන් සහ පවුලේ සාමාජිකයන්ගෙන් මුදල් ඉල්ලා වංචා කිරීමේ සිද්ධීන්ද වාර්තා වේ.

WhatsApp ගිණුමක් ආරක්ෂා කර ගැනීම සඳහා:

දෙපියවර සත්‍යාපනය (Two-step Verification) සක්‍රීය කිරීම.

OTP හෝ සත්‍යාපන කේත කිසිවෙකුටත් ලබා නොදීම.

ජංගම දුරකථනය සහ WhatsApp යෙදුම නිරන්තරයෙන් යාවත්කාලීන කිරීම.

ගිණුමට සම්බන්ධ කර ඇති උපාංග නිතර පරීක්ෂා කර නොහඳුනන උපාංග ඉවත් කිරීම.

PIN අංකයක්, ඇඟිලි සලකුණක් හෝ මුහුණු හඳුනාගැනීමක් භාවිත කර දුරකථනයට අගුලක් යෙදීම.

සයිබර් ආරක්ෂක විශේෂඥයන් අවධාරණය කරන්නේ දැනුවත්භාවය සහ මූලික ආරක්ෂක ක්‍රියාමාර්ග අනුගමනය කිරීම මෙවැනි වංචාවලින් ආරක්ෂා වීමට ඇති හොඳම ක්‍රමය බවයි.

ලංකා ලීඩ් වෙත වාර්තා වුණු සිද්ධියකට අනුව අපගේ පාඨකයෙකුගේ WhatsApp ගිනුමක් සයිබර් අපරාධකරුවන් විසින් අනවසරයෙන් අත්පත් කර ගැනීමක් (hacking) වාර්තා වී තිබේ. ඉන් පසුව "හැකරුන්" විසින් ඔහුගේ හිතවතුන්ට තමා කරදරයකට පත්වී ඇති බව පවසමින් දිවයිනේ විවිධ පලාත්වල විවිධ වානිජ බැංකුවල ඇති ගිණුම් අංක වලට මුදල් තැන්පත් කරන ලෙස ඉල්ලා තිබේ. අප පාඨකයාගේ හිතවතුන් මෙම ගිනුම් වලට මුදල් තැන්පත් කර ඇති බවද ඔහු පවසයි.