ආර්ථික අර්බුදයට වගකිවයුත්තෝ කවුද? - වෛද්‍ය වසන්ත බණ්ඩාර පැහැදිලි කරයි

Dec 13, 2023 at 09:42 AM

|

Lanka Leader

මේ වන විට මෙරටට විරුද්ධව ක්‍රියාත්මක වන ජාත්‍යන්තර න්‍යායපත්‍ර 6ක් රනිල් වික්‍රමසිංහ ජනාධිපතිවරයාගේ අතට ලබාදී ඇති බවත්, ආර්ථික ආර්බුදයට වගකිවයුත්තන් සම්බන්ධව ශ්‍රේෂ්ඨාධිකරණය විසින් ලබාදුන් නඩුතීන්දුව ද අතිශයෙන් වැදගත් ඓතිහාසික නඩු තීන්දුවක් බවත් දේශහිතෛෂී ජාතික ව්‍යාපාරයේ මහ ලේකම් වෛද්‍ය වසන්ත බණ්ඩාර මහතා පවසයි.

ගෝඨාභය රාජපක්ෂ ජනාධිපතිවරයා පළවා හැරීම හා එමගින් රනිල් වික්‍රමසිංහ මහතා බලයට පැමිණීම මෙන්ම, වික්ටෝරියා නූලන්ඩ් හා මෙරට අමෙරිකානු තානාපතිනිය වන ජූලි චන්ග් මෙයට දායක වූ ආකාරය ගැන ද සමාජය තුළ යම් කතාබහක් නිර්මාණය වී ඇති පසුබිමක මෙම ආර්ථික අර්බුදයට වගකිව යුත්තන් සම්බන්ධ මෙම නඩු තීන්දුවද අතිශයෙන්ම වැදගත් බවයි ඒ මහතා පවසන්නේ.

මෙම නඩුව මූලික අයිතිවාසිකම් නඩුවක් වන හෙයින් එවැනි නඩුවක දී අධිකරණය සැලකිල්ලට ගන්නේ නඩුව පවරන පෙත්සම්කාර පාර්ශ්වය ඉල්ලා තිබෙන දේ පමණක් බවත්, මෙම නඩුවේ ප්‍රධාන වගඋත්තර කරුවකු වන රනිල් වික්‍රමසිංහ ජනාධිපතිවරයා ඔහුගේ ජනාධිපති මුක්තිය නිසා ආර්ථික අර්බුදයට වගකිවයුතු පුද්ගලයන් ලැයිස්තුවෙන් ඉවත්වී ඇති බවත් වසන්ත බණ්ඩාර මහතා පෙන්වා දෙයි.

ආර්ථික අර්බුදයක් ඉස්මතු වීමට නිශ්චිත කාලරාමුවක් ගතවන බවද පවසන වසන්ත බණ්ඩාර මහතා, මෙම නඩුව පවරන පෙත්සම්කාර පාර්ශ්වය කාලරාමුව ලෙස සඳහන්කර ඇති 2019 නොවැම්බර් සිට 2022 අප්‍රේල් දක්වා කාලය පමණක් බන හෙයින් රට බංකොලොත් බව ප්‍රකාශ කළ වර්තමාන මහ බැංකු අධිපතිවරයා පවා වගඋත්තරකාර පාර්ශ්වයෙන් නිදහස් වී ඇති බවත් පෙන්වා දෙයි.

ඒ මහතා මේ බව පැවසුවේ ජාතික සංවිධාන එකමුතුව විසින් ඊයේ(12) දින පවත්වනු ලැබූ 'අර්බුදයේ සැබෑ පීතෘවරු කවුද?' අධිකරණ තීන්දුවෙන් ඔබ්බට' විද්වත් කථිකාවට එක් වෙමිනි.

සවිස්තරාත්මක වීඩියෝව නරඹන්න...