ආර්ථික අර්බුදයට වගකිවයුතු පුද්ගලයන් ලෙස ශ්‍රේෂ්ඨාධිකරණය විසින් රාජපක්ෂවරු තිදෙනෙක් ඇතුළු කිහිපදෙනෙකු නම්කරමින් ලබාදුන් තීන්දුවට හේතුවූ කරුණු ඉතා වැදගත් බවත්, කවර හෝ රාජ්‍ය නිලධාරියෙක්, රාජ්‍ය ආයතනයක්, දේශපාලකයෙක් ජනතා පරමාධිපත්‍ය බලයෙන් තනතුරකට පත් වූ විට එම තනතුරේ වගකීම ඉටුකිරීම සම්බන්ධයෙන් මෙම නඩු තීන්දුවෙන් වැදගත් පණිවුඩයක් ලබාදී ඇති බවත් ජ්‍යෙෂ්ඨ නීතිඥ කල්‍යානන්ද තිරාණගම මහතා පවසයි.

මෙම නඩු තීන්දුව ලබාදීමට සලකා බලා තිබුනේ ආර්ථික ක්‍රියාකාරීත්වය සම්බන්ධයෙන් කෙටි කාලසීමාවක දී සිදුවූ සිදුවීම් බවද ඒ මහතා සඳහන්කරයි.

ඒ මහතා මේ බව පැවසුවේ ජාතික සංවිධාන එකමුතුව විසින් ඊයේ(12) දින පවත්වනු ලැබූ 'අර්බුදයේ සැබෑ පීතෘවරු කවුද?' අධිකරණ තීන්දුවෙන් ඔබ්බට' විද්වත් කථිකාවට එක් වෙමිනි.

2019 දී බලයට පත්වූ ගෝඨාභය රාජපක්ෂ ජනාධිපතිවරයා ධුරයේ රැඳී සිටි කෙටි කාලසීමාවේ බරපතළ වැරදි දෙකක් සිදු කළ බවද, එනම් දෙයක් කිරීම සහ දෙයක් නොකර සිටීම යන කාරණා දෙක බවද තිරාණගම මහතා මෙහිදී පැවසීය.

බදු අඩුකිරීම මගින් කුඩා හා මහා පරිමාණ ව්‍යාපාරිකයන්ට, ඉදිකිරීම් ක්ෂේත්‍රයට, කෘෂිකාර්මික, ධීවර වැනි ක්ෂේත්‍රවලට මෙන්ම ආගමික ස්ථානවල ඔහු යම් දෙයක් ලබාදීමට උත්සාහ දැරූවද, එම උත්සාහය හරහා අනෙක් පැත්තෙන් රාජ්‍ය ආදායම අඩු වූ බව ද ඒ මහතා පෙන්වා දෙයි.

එම ආදායම වැඩිකර ගැනීමට කිසිවක් කිරීමට ඔහුට නොහැකි වූ බව පෙන්වා දෙන කල්‍යානන්ද තිරාණගම මහතා පවසන්නේ යමක් කිරීමේ හා කිසිවක්ම නොකර සිටීමේ ප්‍රතිපත්තිය මත අර්බුද රාශියක් නිර්මාණය වූ බවයි.

සවිස්තරාත්මක වීඩියෝව නරඹන්න...