ලොහාන්ගේ ජීප් රථ සිද්ධිය පසුපස තවත් සිද්ධි වැලක්... ගාලතැන්නේ කපුවාත් රිමාන්ඩ්

Nov 4, 2024 at 08:09 AM

|

Lanka Leader

තෙල්දෙණිය, දිගන ප්‍රදේශයේ නිවෙසක ගරාජයක තිබී සොයාගත් ව්‍යාජ අංක තහඩු සහිත මිට්සුබිෂි පැජරෝ වර්ගයේ ජීප් රථය සම්බන්ධයෙන් විමර්ශන පවත්වන පොලිසිය ගාල්තැන්න දේවාලයේ ප්‍රධාන කපුවා වන  ගාමිණි ආනන්ද සැකපිට අත්අඩංගුවට ගෙන ඇත.

ඔහු ඊයේ (03දා) තෙල්දෙණිය වැඩ බලන මහෙස්ත්‍රාත් ස්වර්ණා කරල්ලියද්ද වෙත ඉදිරිපත් කිර්මෙන් පසුව ලබන 11 වැනිදා තෙක් රක්ෂිත බන්ධනාගාරගත කෙරිණි.

1997 ඇමැතුම් අංකයට ලැබුණු තොරතුරක් මත මෙම ජීප්රිය දිගන අයි.සී.සී. නිවාස සංකීර්ණයේ පදිංචිකරුවන් නොමැති නිවෙසක ගරාජයේ තිබී තෙල්දෙණිය පොලිසිය විසින් සොයාගෙන තිබිණි.

සිද්ධිය සම්බන්ධයෙන් විමර්ශන පැවැත්වූ පොලිස් කණ්ඩායම එම නිවෙසට යාබද පදිංචි දේවගැතිවරයාගේ ඥාති පුතකුගෙන් මේ සම්බන්ධයෙන් ප්‍රශ්න කර ඇති අතර ඉන් අනතුරුව දේවගැතිවරයාගෙන්ද ඒ සම්බන්ධයෙන් විමසීමක් කර ඇත.

එහිදී දේවගැතිවරයා පවසා ඇත්තේ එම රථය මීට සති කිහිපයකට පෙර වෙඩි තබාගෙන මියගිය, හිටපු රාජ්‍ය අමාත්‍ය ලොහාන් රත්වත්තේගේ පෞද්ගලික ලේකම්වරයා විසින් එම ස්ථානයට ගෙනැවිත් දැමූ බවය.

ඒ අතර විමර්ශන නිලධාර්න් එම රථයේ අංක තහඩුව සම්බන්ධයෙන් මෝටර් රථ දෙපාර්තමේන්තුවෙන් විමසීමක් කර ඇති අතර එහිදී අනාවරණය වන්නේ එම අංකය සහිත ලියාපදිංචි වූ තවත් ජීප්රියක් මහනුවර, පිලවල ප්‍රදේශයේ කාන්තාවකට අයත්ව ඇති බවය.

එමෙන්ම එම රථය නිත්‍යනුකූලව ලියාපදිංචි කර ඇති බවත්ය.

ඒ අනුව විමර්ශන නිලධාරීන් අනාවරණය කර ගත්තේ නිත්‍යනුකූල ලියාපදිංචි අංකය භාවිත කරමින් එම ප්‍රාඩෝ රථයද ධාවනය කර ඇති බවය.

එමෙන්ම එම රථය මීට සති කිහිපයකට පෙර ඔහුට ලබාදී ඇති බව ගාලතැන්නේ කපුවා ප්‍රකාශ කළද විමර්ශනවලදී සැකකරනුයේ එම රථය වසරකට වැඩි කාලයක් ඔහු සන්තකයේ තිබූ බවය.