අනුරගේ අලුත් ආණ්ඩුවට චීනයේ සහයෝගය... චීන සමූහාණ්ඩුව පිහිටුවීමේ 75 වැනි සංවත්සරය අමතා චීන තානාපතිවරයා කළ කතාව මෙන්න...

Sep 28, 2024 at 01:14 PM

|

Lanka Leader

මහජන චීන සමූහාණ්ඩුව පිහිටුවීමේ 75 වැනි සංවත්සරය වෙනුවෙන් විශේෂ සමරු උත්සවයක් පසුගිය 25 වැනිදා චීන තානාපති කාර්යාලය විසින් සංවිධානය කර තිබිණි. සියලුම දේශපාලන පක්ෂ නියෝජිතයන් ඇතුළු සම්භාවනීය අමුත්තන් රැසකගේ සහභාගීත්වයෙන් පැවති මේ උත්සවයේ ප්‍රධාන ආරාධිතයා වූයේ වත්මන් විදේශ කටයුතු පිළිබද අමාත්‍යවරයා වූ විජිත හේරත් මහතාය.

මෙහිදී සභාව ඇමතීම චීන තානාපති චී ෂෙන්හොන් මහතා සහ විජිත හේරත් මහතා විසින් සිදු කළ අතර, එහිදී නව රජයට සුබ පතමින් චීන තානාපතිවරයා අවධාරණය කළේ පවත්නා අර්බුදය ජයගනිමින් ශ්‍රී ලංකාව යළි ඔසවා තැබීමට සිය සම්පූර්ණ සහයෝගය අනුර කුමාර දිසානායක මහතාගේ නව රජයට ලබාදෙන බවය. එහිදී ලංකාවේ නව තත්ත්වය මෙන්ම ගෝලීය දේශපාලනය හා ඒ තුළ චීනයේ භූමිකාව පිළිබද තානාපතිවරයා මෙසේ අදහස් දැක්වීය.

"චීනයට පසුගිය වසර 75ක කාලය වනාහී නොයෙක් සුළං කුණාටුවලට මුහුණ දෙමින් අභීතව පෙරට පැමිණි ගමනකි. චීන කොමියුනිස්ට් පක්ෂයේ (CPC) නායකත්වය යටතේ 1949 දී මහජන චීනය ස්ථාපිත කළ දා සිට අද දක්වා සිය සමෘද්ධිය කරා යන ගමනේ විශාල පරිවර්තනයක් අත්කරගැනීමට චීන ජාතිය සමත් වී තිබේ. දැන් චීන ජනතාව සෑම අතින්ම ශ්‍රේෂ්ඨ නවීන සමාජවාදී රටක් ගොඩනැගීමේ නව මාවතේ විශ්වාසයෙන් යුතුව ඉදිරියට යමින් සිටින අතර චීන නව්‍යකරණය තුළින් ජාතික පුනර්ජීවනය අත්කර ගනිමින් සිටිති.

චීනයේ මේ කැපී පෙනෙන යෝධ සංවර්ධනයේ මූලික හේතුව අන් කිසිවක් නොව ප්‍රතිසංස්කරණ හා විවෘතභාවය ඔස්සේ විශිෂ්ට ගමනක් ආරම්භ කිරීමට චීන ජනතාවට මග පෙන්වූ චීන කොමියුනිස්ට් පක්ෂයේ නායකත්වයයි. වසර 46කට පෙර 1978 දී 11 වැනි කොමියුනිස්ට් පක්ෂ මධ්‍යම කාරක සභාවේ තුන්වන පූර්ණ සැසිවාරයේදී ගනු ලැබූ මෙම ඓතිහාසික තීරණය, එනම් ප්‍රතිසංස්කරණ හා විවෘතභාවය විසින් සමාජවාදී නවීකරණයේ නව යුගයකට චීනයේ ප්‍රවේශය සනිටුහන් කළේය. මේ වසරේ 20 වැනි පක්ෂ මධ්‍යම කාරක සභාව ජූලි මාසයේදී සිය තුන්වන පූර්ණ සැසිවාරය සාර්ථකව කැඳවා, ප්‍රතිසංස්කරණය සහ විවෘතභාවය සඳහා සිය නව වැඩපිළිවෙළ සම්මත කරන ලදී. එය චීන කොමියුනිස්ට් පක්ෂයේ ප්‍රතිසංස්කරණ පුළුල් ලෙස ඉදිරියට ගෙන යාම පිළිබඳ මධ්‍යම කාරක සභාවේ යෝජනාවයි. මෙම යෝජනාව මගින් චීන ලක්ෂණ සහිත සමාජවාදය අඛණ්ඩව සංවර්ධනය කරමින් නවීකරණය කරමින් පෙරට ගෙන යාමට අපේක්ෂා කෙරේ. එය 2029 දී මහජන චීන සමූහාණ්ඩුවේ 80 වැනි සංවත්සරය වන විට සම්පූර්ණ කළ යුතු ප්‍රධාන ප්‍රතිසංස්කරණ 300කට වඩා වැඩි ප්‍රමාණයක් ඉදිරිපත් කර ඇත.  

මෙකී පුළුල් ප්‍රතිසංස්කරණ සහ විවෘතභාවය ඔස්සේ චීන නව්‍යකරණය පෙරට ගෙන යාම හුදු චීනයේ ජයග්‍රහණයකින් නොනැවතී සමස්ත ලෝකය කෙරේම සාධනීය බලපෑමක් ඇති කරන්නකි. බිලියන 1.4කට අධික යෝධ ජනතාවක් නවීකරණයට පිවිසීම යනු ලෝක පරිමාණ මහා වෙළෙ‍ඳපොළකට ඉඩහසර විවෘත කිරීමකි. ඒ වෙළෙ‍ඳපොළ දැනට ලෝකයේ පවතින සියලු සංවර්ධිත රටවල වෙළෙ‍ඳපොළට වඩා විශාලය. චීන නව්‍යකරණය සමස්ත ගෝලීය ආර්ථිකයේ වර්ධනයකට මෙන්ම ගෝලීය සහයෝගීතාව ශක්තිමත් කිරීමටද ඉවහල් වන්නකි. මේ වසරේ ජුනි මාසයේ පැවති උත්සවයකදී ජනාධිපති ෂී ජින්පින් ප්‍රකාශ කළේ වර්ෂ 2030 දක්වා වූ ඉදිරි කාලය තුළ සංවර්ධනය වෙමින් පවතින රටවලින් චීනයේ ආනයන ප්‍රමාණය ඇමරිකානු ඩොලර් ට්‍රිලියන 8 ඉක්මවා යනු ඇති බවය.

අපි සියල්ලෝම ජාත්‍යන්තර පවුලක සමාන සාමාජිකයෝ වෙමු. එසේ වුවද අද අප අභියස ඇත්තේ ඉහළ හස්තයන් හා බලාධිකාරීන් විසින් අනෙකා පෙළන අධිපතිවාදී ලෝකයක් මිස සාධාරණ හා යුක්ති සහගත ලෝකයක් නොවේ. බලවතා විසින් දුබලයා පෙළන කැලෑ නීතිය යළිත් හිස ඔසවමින් පවතින අතර, “බලය පරම වේ” යන්න ඔවුන්ගේ ඒකායන දෘෂ්ටිය තිබේ. ඒ තුළ මනුෂ්‍යත්වය නැවතත් ඉතිහාසයේ සන්ධිස්ථානයකට පැමිණ ඇත. මෙවැනි ගෝලීය සන්දර්භයක් තුළ ඒ සියලු අභියෝගයන්ට මුහුණ දෙමින් බහුපාර්ශ්විකත්වයේ ධජය ඉහළට ඔසවා තබමින් “සාමය, සංවර්ධනය, සමානාත්මතාවය, යුක්තිය, ප්‍රජාතන්ත්‍රවාදය සහ නිදහස” යන සාරධර්ම ප්‍රවර්ධනය කරමින්, විශ්ව සාධාරණ හා බහු ධ්‍රැවීය ලෝකයක් වෙනුවෙන් පෙනී සිටීම චීනයේ ඒකායන අභිප්‍රාය වෙයි. ඒ සදහා බෙල්ට් ඇන්ඩ් රෝඩ් සහයෝගීතා වැඩසටහන සාර්ථකව ස්ථිරව ඉදිරියට ගෙන යන අතරම, සමස්ත මානව වර්ගයා උදෙසා කල්පවත්නා සාමය, ගෝලීය ආරක්ෂාව සහ පොදු සමෘද්ධිය සහිත සුන්දර අනාගත ලෝකයක් ගොඩනැගීමට චීනය ජාත්‍යන්තර ප්‍රජාව හා සහයෝගයෙන් කටයුතු කරනු ඇත. 

මෙහිදී, සති තුනකට පෙර බීජිං හි සාර්ථකව පැවැත්වූ චීන-අප්‍රිකා සහයෝගිතා (FOCAC) සමුළුව පිළිබඳ සිහිපත් කිරීමට මම කැමැත්තෙමි. චීනයේ සහ අප්‍රිකානු රටවල් 53ක නායකයින් මෙන්ම අප්‍රිකානු සංගමයේ කොමිසමේ සභාපතිනියද මීට සහභාගී වූ අතර එය “ගෝලීය දකුණ” අතර සහයෝගීතාවයේ නව පරිච්ඡේදයක් විවෘත කළේය. සමුළුව අතරතුර, ජනාධිපති ෂී ජින්පිං නිවේදනය කළේ ඉදිරි වසර තුන තුළ චීන රජය RMB යුවාන් බිලියන 360ක මූල්‍ය ආධාර අප්‍රිකානු කලාපය වෙත ලබා දෙන බවය. මෙය RMB යුවාන් බිලියන 210ක ණය සහ RMB යුවාන් බිලියන 80ක විවිධ ආකාරයේ ආධාර සහ අවම වශයෙන් RMB බිලියන 70ක ආයෝජනවලින්ද සමන්විත වන්නකි. මේ ආකාරයට චීනය ශ්‍රී ලංකාව සහ අනෙකුත් සංවර්ධනය වෙමින් පවතින රටවල් සමඟ එක්ව “ගෝලීය දකුණ” සංවර්ධනය හා පුනර්ජීවනය කරාගෙන යාමට කැපවී සිටින අතර, ඔවුන්ගේ වර්ධනය තුළින් පොදු යහපැවැත්ම වැඩිදියුණු කිරීමට සහ ගෝලීය ආරක්ෂාව ශක්තිමත් කිරීමට කටයුතු කරනු ඇත. 

චීනය සහ ශ්‍රී ලංකාව සාම්ප්‍රදායික මිතුරන් හා අසල්වැසියන් වන අතර, අපගේ මිත්‍රත්වය වසර 2000කට වැඩි කාලයක් ඈතට දිවෙන්නකි. 1957 දෙරට රාජ්‍ය තාන්ත්‍රික සබඳතා ගොඩනඟා ගන්නා මොහොත වන විටත්, දෙරට අතර ස්වාධීනත්වය, ස්වයං විශ්වාසය, සහ අන්‍යෝන්‍ය සහයෝගය මූර්තිමත් කළ ඓතිහාසික රබර්-සහල් ගිවිසුම අත්සන් කිරීමට එරෙහිව පැවති බාධා ජයගැනීමට අප සමත්ව තිබුණි. පසුගිය වසර 67 පුරාවට චීනය සහ ශ්‍රී ලංකාව අන්‍යෝන්‍ය ගෞරවය, සමානාත්මතාවය සහ අන්‍යෝන්‍ය ප්‍රතිලාභ යන මූලධර්ම මත පදනම්ව සහයෝගයෙන් කටයුතු කොට ඇත. ජාත්‍යන්තර තත්ත්වය කෙසේ වෙනස් වුවද නොයෙක් තර්ජන අභියෝගවලට මුහුණ දුන්නද චීන රජය සහ ජනතාව සැමවිටම ශ්‍රී ලංකා රජය සහ ජනතාව සමඟ ස්ථිරව සිටින බව ඉතිහාසය සනාථ කර ඇත. චීනය සහ ශ්‍රී ලංකාව අතර සහයෝගීතාවය වඩ වඩාත් වර්ධනය වන තරමට ශ්‍රී ලංකාවේ ස්වෛරීභාවය, ආරක්ෂාව, සංවර්ධනය සහ අභිමානය ආරක්ෂා කර ගැනීමටත්, කලාපීය හා ජාත්‍යන්තර කටයුතුවලදී විශාල කාර්යභාරයක් ඉටු කිරීමටත් ශ්‍රී ලංකාව සමත් වන බව ඉතිහාසය යළි යළිත් පෙන්වා දී තිබේ. 

සාර්ථක ජනපතිවරණයට මුහුණ දුන් ශ්‍රී ලංකාවේ සිටින අපේ සහෝදර සහෝදරියන්ට නැවත වරක් මගේ උණුසුම් සුබ පැතුම් පිරිනැමීමට මෙය අවස්ථාවක් කර ගනිමි. ශ්‍රී ලංකාවාසී ජනතාව දැන් නව යුගයකට අවතීර්ණ වී සිය ඉතිහාසයේ නව පරිච්ඡේදයක් ලියමින් සිටිති. චීනයේ සහ අනෙකුත් මිත්‍ර රටවල සහයෝගය ඇතිව සහ නව ජනාධිපති අනුර දිසානායකගේ ශක්තිමත් නායකත්වය යටතේ ලංකාවේ ජනතාවට සියලු අවදානම් හා අභියෝග පරදවා වත්මන් අර්බුදය ජයගෙන නැවත නැගී සිටිය හැකි බව බව මම තරයේ විශ්වාස කරමි. අනාගතයේදී "ඉන්දියන් සාගරයේ මුතු ඇටය" ලෙස ශ්‍රී ලංකාව වඩාත් දීප්තිමත් වනු ඇති අතර, අවංක අන්‍යෝන්‍ය සහයෝගීතාව සහ සදාකාලික මිත්‍රත්වය මත පදනම් වූ චීන ශ්‍රී ලංකා උපායමාර්ගික සහයෝගීතා හවුල්කාරිත්වය ඉහළ මට්ටමකින් අඛණ්ඩව පෙරට යනු ඇත."