ලෝකයේ බලගතුම රටවල් ගණනාවක් සමග සමීපව ගනුදෙනු කරන තමා ජනාධිපති වුවහොත් එම රටවල් සමග සම්බන්ධ කරගනිමින් මෙරට විශාල ආර්ථික ප්‍රබෝධයක් ඇතිකළ හැකි බව අපේ ජනබල පක්‍ෂයේ ජනාධිපති අපේක්‍ෂක ප්‍රකට බලශක්ති හා කර්මාන්ත ඉංජිනේරුවකු වන කීර්ති වික්‍රමරත්න මහතා පැවසීය.

සුනිත්‍ය බලශක්ති අධිකාරියේ සභාපතිවරයා ලෙස සූර්ය බල සංග්‍රාමය ආරම්භ කර ජාතික විදුලිබල පද්ධතියට මෙගාවොට් 1000කට වැඩි ධාරිතාවක් එකතු කිරීමට තමාට හැකිවූ බව පැවසූ වික්‍රමරත්න මහතා මේ වනවිට ලෝකය පාලනය කරනු ලබන්නේ ඛනිජ තෙල් සම්පත සහිත රටවල් බවද පවසයි.

මේ පිළිබඳව වැඩිදුර අදහස් දක්වන ඒ මහතා,

"ඉදිරියේදී ලෝකයේ ආර්ථිකය පාලනය කරන්නේ ග්‍රැනයිඩ් හා ග්‍රැෆීන් කියලා බොහෝමයක් විශේෂඥයන් අවධාරණය කර තිබෙනවා. ලංකාව ලෝකයේ අංක 01 ආර්ථිකය හිමි කරගන්න පුළුවන් ඒ හරහා. එදා ආතර් සී. ක්ලාක් මහත්මා කිව්වා ලංකාව ලෝකයේ ආර්ථික වශයෙන් අංක 01 ට එනවා කියලා. දැන් අපි යන්න හදන්නේ එතැනට. ඒ හරහා අපේ රටේ ණය ගෙවන එක ඉතා සුළු දෙයක්. මේ ඛනිජ සම්පත ගන්න ලෝකයේ බලගතු රටවල් සේරම බලාගෙන ඉන්නවා. හැබැයි මම හිතන්නේ නැහැ ලංකාවේ මිනිස්සු එතරම් අවාසනාවන්ත වෙයි කියලා.

2000 ඉඳලා මම ලංකාවේ කර්මාන්ත දියුණු කිරීමට උත්සාහ කරනවා. ලංකාවේ පළමු ඛනිජ සම්පත් ගවේෂණ සමාගම ආරම්භ කළේ මම. ඒ හරහා මම හොයා ගන්නවා ලංකාව ආර්ථික වශයෙන් ඉතා දියුණු තත්ත්වයකට ගේන්න පුළුවන් ඛනිජ සම්පත් තිබෙන්නේ කොහේද කියලා.

රට ගොඩගන්න වැඩපිළිවෙළ හා දැක්මක් ඉදිරිපත් කරලා තියෙන්නේ මමයි. අනික් හැමෝම කතා කරන්නේ ණය අරගෙන රට ගොඩගන්න විදිය. නමුත් මේ රටේ සම්පත් ගොඩඅරගෙන රට දියුණු කරන විදිය ගැන කතා කරලා තිබෙන්නේ මම විතරයි."

මූලාශ්‍ර - දිවයින