රාජ්‍යය දුර්වල වූ සෑම අවස්ථාවක දීම රණවිරුවන් දංගෙඩියට ගෙන යන සත්‍ය සෙවීමේ කොමිසම පනත වැනි දුෂ්ට අණපනත් ඉදිරියට ආවා... යුද සමයේ රණවිරුන් පාවාදීමට කටයුතු කළ අය ගැන අද සිටින රණවිරුවන් දැනගත යුතුයි - දිලිත් ජයවීර (වීඩියෝ)

Sep 2, 2024 at 02:38 PM

|

Lanka Leader

සත්‍ය සෙවීමේ කොමිසම නමින් එන රණවිරුවන් පවාදීමේ ක්‍රියාදාමය පරාජය කළ යුතු බවත්, මාතෘභූමිය බේරාදීමට ක්‍රියාකරන ලද්දේ රණවිරුවන් බවත් සර්වජන බලයේ ජනාධිපති අපේක්ෂක දිලිත් ජයවීර මහතා පවසයි.

ඒ මහතා මේ බව පැවසුවේ ඉකුත් 01 දා   කොළඹ 5, සම්බුද්ධත්ව මන්දිරයේ දී පැවැති " අපි වෙනුවෙන් අපි" රණවිරු හමුවට සහභාගී වෙමිනි.

මෙවැනි දුෂ්ඨ පනත් හා දුෂ්ඨ උත්සාහයන් රාජ්‍යය දුර්වල වූ සෑම අවස්ථාවක දීම ඉදිරියට පැමිණි බවත් දිලිත් ජයවීර මහතා පවසයි.

රණවිරුවන් විසින් දිවිහිමියෙන් රට වෙනුවෙන් කළ කාර්ය කිසිදා මිනිසුන් විසින් අමතක නොකරනු ඇතැයි සිතීම නිසා රණවිරුවන්ට මෙවැනි පනත් පිළිබඳව දැනුවත් කළ ද ඔවුන් ඒ පිළිබඳව විශ්වාස නොකරන බවත්, එසේ සිතා සිටින අහිංසක රණවිරුවන් දංගෙඩියට ගෙනයාම සඳහා වර්තමානයේ පාලකයන් දැඩි උත්සාහයක නිරතවී සිටින බවත් ඒ මහතා මෙහිදී පැවසීය.

අද සේවයේ යෙදී සිටින බොහෝ රණවිරුවන් තරුණයන් බවද, ඔවුන් යුද සමයේ ත්‍රිවිධ හමුදාවේ හෝ පොලිසියේ නොසිටි පිරිසක් බැවින් ඔවුන් වීරෝධාර රණවිරු යුගය පිළිබඳව හරිහැටි නොදන්නා බවත් පවසන දිලිත් ජයවීර මහතා, රණවිරුවාගේ වීරත්වය ජාතියක  කෂේරුකාව බව ඔවුන් නොදන්නා නිසා ඔවුන්ට ඒ පිළිබඳව හැඟීමක් ඇති කළ යුතු බවත් සඳහන් කරයි.

එයට හේතුව ඔවුන්ව අද තවත් රාජ්‍ය සේවකයෙක් බවට පත්කර තිබීම නිසා බවද ඒ මහතා පවසයි.

ආදරණීය මාතෘභූමිය අහිමිවීමේ අවදානමක් තිබූ යුගයක් තිබූ බවත්, මාතෘභූමිය රැකගැනීමට ගිය වීරෝධාර රණවිරුවන්ගේ තාරුණ්‍ය පාවාදුන් යුගයක් තිබූ බවත් වර්තමානයේ සේවයේ යෙදී සිටින තරුණ රණවිරුවන්ට අවබෝධකර දිය යුතු බවත් දිලිත් ජයවීර මහතා මෙහිදී පැවසීය.

අද ප්‍රධාන ජනාධිපති අපේක්ෂකයන් ලෙස සැලකෙන තිදෙනෙක් සිටින බවත්, ඔවුන් එදා යුද සමයේ දී පාර්ලිමේන්තුවේ සිටි බවත්, ඔවුන් එදා සිටියේ යුද විරෝධී කණ්ඩායමේ බව හා යුද්ධය පවා වාදීමට කටයුතු කළ රාජ්‍ය නොවන සංවිධානවලින් යැපෙන කණ්ඩායමේ  බවත් ඒ මහතා පවසයි.

යුද්ධයේ තීරණාත්මක අවස්ථාවේ ඔවුන් කටයුතු කළ ආකාරය හේතුවෙන් අද ඇඳුමක් ඇඳගෙන රණවිරු ඉදිරියට යාමටවත් ඔවුන්ට සදාචාරාත්මක අයිතියක් නොමැති බවද, එම තීරණාත්මක මොහොතේ එවකට ආණ්ඩුව පෙරලන්නට උත්සාහ දැරූ උතුර දකුණ මාරුවූ අයට උතුර දකුණ සොයාගන්නේ මොන මාලිමාවෙන් දැයි ප්‍රශ්නකළ යුතු බවත් ඒ මහතා මෙහිදී පැවසීය.

ඔවුන්ගේ උත්සාහය එදා සාර්ථක වූවා නම් අදත් අප ජීවත්වන්නේ යුද්ධයක් ඇති බෙදී ගිය රටක බවත්, ඔවුන් අද තමන්ගේ ප්‍රතිපත්ති ප්‍රකාශවලද දක්වා ඇත්තේ රණවිරුවන් දංගෙඩියට ගෙන යන බවත් යැයි පවසන ඒ මහතා මාලිමාවේ ප්‍රතිපත්ති ප්‍රකාශනයේ 230 වැනි පිටුවේ මේ පිළිබඳව පැහැදිලිවම සටහන්කර ඇති බවත් සඳහන් කරයි.