උතුරු, නැගෙනහිර ඒකාබද්ධ කරන්නේ නෑ... ඉඩම්, පොලිස් බලතල දෙන්නෙත් නෑ - නාමල් පොහොට්ටුවේ මංගල ජන රැලියේ දී කියයි

Aug 22, 2024 at 08:10 AM

|

Lanka Leader

ඡන්ද කාලයේ දී උතුරු නැගෙනහිර ජනතාවට බොරු පොරොන්දු දී රවට්ටා පලක් නැති බවත් උතුරු නැගෙනහිර ඒකාබද්ධ කිරීමත් පළාත් සභාවලට ඉඩම් පොලිස් බලතල ලබාදීමත් තමන් කිසිසේත් නොකරන බවත් ශ්‍රී ලංකා පොදු ජන පෙරමුණේ ජනාධිපති ධුර අපේක්ෂක නාමල් රාජපක්ෂ මහතා ඊයේ (21දා) පැවසීය.

නාමල් රාජපක්ෂ මහතාගේ ජය තහවුරු කරන ශ්‍රී ලංකා පොදු ජන පෙරමුණේ මංගල රැලිය අනුරාධපුර කඩපනහ ප්‍රදේශයේ ඊයේ පැවැති අවස්ථාවේදී ඔහු මේ බව කීවේය.

එහිදී වැඩිදුරටත් අදහස් දැක්වූ ශ්‍රී ලංකා පොදුජන පෙරමුණේ ජනාධිපති ධුර අපේක්ෂක නාමල් රාජපක්ෂ මහතා,

"අපේ පක්ෂය මේ රටේ දේශපාලන සිතියම වෙනස් කරපු බලවේගයක්. මහින්ද රාජපක්ෂ ජනාධිපතිතුමා මායිම් ගම්මාන කියන වචනය ශබ්දකෝෂයෙන් අයින් කළා. ග්‍රාමීය ආර්ථිකය ශක්තිමත් කළා. 2015 අපි පැරදුණා. ගෝඨාභය මැතිතුමාට ලැබුණේ මහින්ද රාජපක්ෂ මහත්තයා භාර දීපු රට නෙවෙයි. කොවිඩ් වසංගතය වෙලාවෙදි අපේ ජනාධිපතිවරයා තීරණය කළේ ආර්ථිකය වෙනුවට රටේ ජනතාවගේ ජීවිත සුරකින්න. එදා අපි එන්නත් ගෙනත් දුන්නා. නිරෝධායන වෙන ජනතාවට රුපියල් 15000 බැගින් දුන්නා. එදා යම් කුමන්ත්‍රණ වැඩපිළිවෙළක් නිසා ආණ්ඩුව වැටුණා.

ආණ්ඩුව වැටුණත් අපි රාජ්‍ය වැටෙන්න දෙන්න බැරි නිසයි රනිල් වික්‍රමසිංහ මහත්තයට සහයෝගය දුන්නෙ. කෙටි කාලීන වරදාන වරප්‍රසාද අපිට අවශ්‍ය නෑ. ඒ නිසා අපේ පක්ෂය විශ්වාස කරන දේශීය චින්තන වැඩපිළිවෙළ සහ දේශීය ආර්ථිකය සුරකින වැඩපිළිවෙළ ඔස්සේ අපි යනවා. මම අභියෝගවලට ආදරේ කරනවා. ඒක ඉගෙන ගත්තේ මගේ තාත්තාගෙන්. අපි ප්‍රතිපත්ති ආරක්ෂා කරන බල කඳවුරක්. 2005- 2015 කාලයේදී තිබුණු කෘෂිකර්ම ප්‍රතිපත්තිය ආරක්ෂා කරමින් එය නවීකරණය කරමින් අරගෙන යන්න මම ඔබට පොරොන්දු වෙනවා. තරුණ පරම්පරාවට තාක්ෂණය අපි දෙනවා. ඒ හරහා පොහොසත් පුරවැසියෙක් බිහි කිරීමේ වගකීම මම භාරගන්නවා.

මහින්ද රාජපක්ෂ යුගයේදී සමෘද්ධියෙන් ගෘහස්ථ ආර්ථිකය ගොඩනැගුවා. දැන් කරන්නේ පිටින් ගෙන්නලා මෙහෙ විකුණන එක. දැන් සමෘද්ධිය කප්පාදු කරලා. පැහැදිලිවම පොදු ජන පෙරමුණු ආණ්ඩුවක් යටතේ අපි සමෘද්ධි ව්‍යාපාරය ශක්තිමත් කරලා දැවැන්ත වැඩපිළිවෙළක් කරනවා. අපේ රට ඒකීය රටක්. අපි දේශපාලනයේ ඉන්නකම් යළිත් මේ රට තුළ මායිම් ගම්මාන ඇති වෙන්න ඉඩ තියන්නේ නෑ. මේ බෞද්ධ රට තුළ සියලු ආගම්වලට ගරුත්වය දෙන්න අපි සූදානම්. පළාත් සභා තුළ ඉඩම්, පොලිස් බලතල නම් අපි දෙන්නේ නෑ. උතුරේ දමිළ අම්මා තාත්තව, සහෝදර සහෝදරියන් අපි ඡන්දෙ කාලෙකට රවට්ටල වැඩක් නෑ. අපි භාෂාව රැකලා දෙන්නම්. හැබැයි උතුරු නැගෙනහිර ඒකාබද්ධ කරන්න බෑ.

ඒ වගේම මේ රටේ අසීමිත බදු බරින් රටේ ජනතාව මුදාගන්න වැඩපිළිවෙළක් අපි ක්‍රියාත්මක කරනවා. වක්‍ර බදු වෙනුවට සෘජු බදුවලට යමු. දේශීය ව්‍යාපාරිකයා ව්‍යවසායකයා සුරකිමු. එතකොට තමයි ගමේ ආර්ථිකය ශක්තිමත් වෙන්නේ."