25 පොහොට්ටු අපේක්ෂකයා නම්කරන්න එපා... තවත් ටික දවසක් දෙන්න - රාජපක්ෂලාගෙන් රනිල් ඉල්ලීමක් කරලා

Jul 22, 2024 at 11:27 AM

|

Lanka Leader

පාර්ලිමේන්තුවට ඉදිරිපත් කිරීමට නියමිත ආර්ථික පරිවර්තන පනත් කෙටුම්පත සම්මත කරගැනීම සදහා සජබ මන්ත්‍රීවරුන් 18 දෙනකු සහාය දැක්වීමට සූදානමින් සිටින බවත්, එතෙක් පොහොට්ටුවේ ජනාධිපති අපේක්ෂකයා පිළිබද කිසිදු ප්‍රකාශයක් සිදු නොකරන ලෙසත් ජනාධිපතිවරයාගේ පාර්ශ්වයෙන් පොහොට්ටුව වෙත දැනුම් දීමක් කොට ඇති බව ආරංචි මාර්ග පවසයි.

ජනාධිපතිවරයා පසුගිය කාලයේ දිගින් දිගටම සජබයෙන් මන්ත්‍රීවරුන් 25ක කණ්ඩායමක් ආණ්ඩුවට එක් වන බව ප්‍රකාශ කර තිබීම හේතුවෙන් එම කණ්ඩායම ආණ්ඩුවට එක්කරගෙන පෙක්වන ලෙස පොහොට්ටුවෙන් ජනාධිපතිවයාට දින වකවානු ලබා දී තිබූ අතර, පළමුව එසේ ලබා දී තිබූ දිනය වූයේ ජුනි 15 වන දිනය.

පසුව ජනාධිපතිවරයා තවත් මාසයක කාලයක් ඒ සදහා ලබා ගැනීම හේතුවෙන් එය ජුලි 15 දක්වා කල් ගියේය.

නමුත් එම දිනටද සජබ මන්ත්‍රී කණ්ඩායම ආණ්ඩුවට එක් කර ගැනීමට නොහැකි වීම නිසා ජනාධිපතිවරයා පෞද්ගලිකවම මහින්ද රාජපක්ෂ මහතා හමුවී තවත් සති 2ක් ඒ සදහා ලබා ගෙන තිබිණ.

එම දිනය ජුලි 25 වැනි දින අවසන් වීමට නියමිත නිසා ලබන 25 වැනිදාට ප්‍රථම එම කණ්ඩායම එක්කොටගෙන පෙන්වන ලෙසට පොහොට්ටුව මීට පෙර දැනුම් දීමක් කොට තිබිණ.

එසේ නොවුණහොත් ලබන 25 වැනි දින පොහොට්ටුවේ අපේක්ෂකයා ප්‍රකාශයට පත් කරන බවද රාජපක්ෂවරුන් ජනාධිපතිවරයාගේ පාර්ශ්වය වෙත දැනුම් දී තිබිණ.

නමුත් මේ වනවිට ජනාධිපතිවරයාගේ පාර්ශ්වයෙන් දැනුම් දී ඇත්තේ ආර්ථික පරිවර්තන පනත සම්මත කරගැනීම සදහා සහාය දැක්වීමට සජබයෙන් 18ක කණ්ඩායමක් සූදානමින් සිටින නිසා ඊට ප්‍රථම පොහොට්ටුවේ අපේක්ෂකයා නම් කිරීමෙන් වැළකී සිටින ලෙසය.

මෙම කෙටුම්පත 26 වැනිදා සම්මත කරගැනීමට නියමිතය.

- මව්රට -