රටේ ඇතිවන අර්බුදය කළින්ම දැක ගෝඨාභය රාජපක්ෂ පාලනය ඇහැරවීමට උත්සාහ දැරූ බවත්, එහෙත් එය කළ නොහැකි තැනකට ඒ වන විට ගෝඨාභය පාලනය පත්ව තිබූ බවත් ජානිපෙ නායක, පාර්ලිමේන්තු මන්ත්‍රී විමල් වීරවංශ මහතා පවසයි.

ජනහමුවකට එක්වෙමින් ඒ මහතා පැවසුවේ ආර්ථික අර්බුද ලෝකයට අලුත් දෙයක් නොවන බවත්, 1990 දී ඉන්දියාවේ ද මෙවැනිම ආර්ථික අර්බුදයක් ඇති වූ බවත් ය.

එහිදී එවකට ඉන්දියාවේ අග්‍රාමාත්‍යවරයා වූ වජ්පායි මහතා විසින් එරට ආර්ථිකය යළි ගොඩනැගීම සඳහා ආර්ථික විශේෂඥයකු වූ මන්මෝහන් සිං මහතාව ගෙන්වාගත් බවත්, ආර්ථිකය ගොඩනැගීමට ඔහුට පවරා වජ්පායි මහතා දේශපාලනයේ නිරත වූ බවත් විමල් වීරවංශ මහතා පැවසීය.

එහෙත් ලංකාවේ සිදුවූයේ මොළහතක් ඇති බව පැවසූ බැසිල් රාජපක්ෂ ගෙන්වාගෙන ආර්ථිකය භාරදීම බවද, ඔහු රටේ ඩොලර් හිඟය සතියෙන් විසඳන බව පැවසූ බවද ඒ මහතා සඳහන් කරයි.

අද වන විට පාකිස්තානයේ ද දැවැන්ත ආර්ථික අර්බුදයක් ඇති වී තිබෙන බවත්, ණය ගෙවීමට නොහැකි බව වහාම ප්‍රකාශයට පත්කරන ලෙස ජාත්‍යන්තර මූල්‍ය අරමුදල පාකිස්තානයේ නායකයාට ද පවසා ඇති නමුත් ඔහු ඊට එකඟ වී නැති බවද වීරවංශ වහතා පවසයි.

රටේ ආර්ථික අර්බුදයක් ඇති වීමට ප්‍රධානතම හේතුවක් වූයේ 2018 වසරේ රනිල් වික්‍රමසිංහලා, සිරිසේනලා, අනුර දිසානායකලා එක්ව ගොඩනැගූ යහපාලන ආණ්ඩුවෙන් ජාත්‍යන්තර ස්වෛරී බැඳුම්කර ණය 12.5ක ප්‍රමාණයක් ලබාගැනීම බවද, අද මෙම අර්බුදයට ප්‍රතිකාර ලෙස රනිල් වික්‍රමසිංහ ලබා දෙමින් සිටින්නේ ඔහුගේ නියෝ ලිබරල්, රට විකුණාගෙන කන, රට යටත් විජිත කොළණියක් බවට පත්කරමින් යන ගමන බවද විමල් වීරවංශ මහතා වැඩිදුරටත් පවසයි.

සවිස්තරාත්මක වීඩියෝව නරඹන්න...