රට බංකොලොත් යැයි කිසිදු අවස්ථාවක රජය විසින් ප්‍රකාශයට පත් නොකළ බව මහ බැංකු අධිපති ආචාර්ය නන්දලාල් වීරසිංහ මහතා පවසයි.

රට බංකොලොත් භාවයට පත් කිරීම පිළිබඳව සොයා බැලීම සඳහා පත්කර ඇති පාර්ලිමේන්තු තේරීම් කාරක සභාව හමුවේ සාක්ෂි ලබාදෙමින් ඔහු මේ බව ප්‍රකාශ කර ඇත.

ඒ පිළිබඳව තවදුරටත් අදහස් දැක් වමින් මහ බැංකු අධිපතිවරයා ප්‍රකාශ කර ඇත්තේ එම අවස්ථාවේදී සිදු කළේ ඇතැම් විදේශීය ණය හිමියන්ගේ ණය වාරික ගෙවිය නොහැකි බව දැනුම් දීම පමණක් බවයි. 

කොරෝනා වසංගත තත්ත්වය නිසා රට වසා දැමීම, රට තුළ ආර්ථික අර්බුදයක් නිර්මාණය වීමට ප්‍රධාන හේතුවක් වූ බවත් එම තේරීම් කාරක සභාව හමුවේ ඔහු වැඩිදුරටත් පවසා ඇත.

එහෙත් ආර්ථික බංකොලොත්භාවය සෙවීමට පත් කෙරුණු පාර්ලිමේන්තු විශේෂ කාරක සභාවට මීට පෙර පැමිණි  හිටපු මහ බැංකු අධිපති අජිත් නිවාඩ් කබ්රාල් මහතා පවසා තිබෙුනේ, ශ්‍රී ලංකා මහ බැංකු අධිපතිවරයා රට බංකොලොත් බවට ප්‍රකාශ කිරීමට පෙර සැබෑ තත්ත්වය පිළිබඳව පාර්ලිමේන්තුව, කැබිනට් මණ්ඩලය සහ නීතිපතිවරයා දැනුවත් නොකිරීම රටේ ආර්ථිකය සහමුලින්ම විනාශකිරීමක් බවය.

එමෙන්ම 2023 සැප්තැම්බර් මස 15 වනදා පාර්ලිමේන්තුවේ පැවති “රට බංකොලොත් බව ප්‍රකාශ කිරීම පිළිබඳව සොයා බැලීම සඳහා පත් කර තිබෙන පාර්ලිමේන්තු තේරීම් කමිටුව” හමුවේ අදහස් දක්වමින් එක්සත් ජාතික පක්ෂ සභාපති, පාර්ලිමේන්තු මන්ත්‍රී වජිර අබේවර්ධන ප්‍රකාශ කර තිබුනේ වර්තමාන මහ බැංකු අධිපති ආචාර්ය නන්දලාල් වීරසිංහ සහ භාණ්ඩාගාර ලේකම් මෙන්ම මුදල් අමාත්‍යාංශ ලේකම් මහින්ද සිරිවර්ධන එම තනතුරුවලට පත්වීමත් සමග අත්තනෝමතික ලෙස රට බංකොලොත් බව ප්‍රකාශ කර විදේශ ණය ගෙවීම අත්හිටවීම සම්බන්ධයෙන් පරීක්ෂණයක් පැවැත්විය යුතු බවය.

එසේම පසුගිය කාලයේ දී රට බංකොලොත් බව ප්‍රකාශ කළා යැයි විවිධ පාර්ශව විසින් වර්තමාන මහ බැංකු අධිපතිවරයාට එරෙහිව මාධ්‍ය මගින් දැඩි චෝදනා එල්ල කරන ලදී.

මෙම තත්වය හමුවේ මහ බැංකු අධිපතිවරයා රට බංකොලොත් යැයි ප්‍රකාශ නොකළ බව පැවසීම පිළිබඳව සමාජය තුළ දැඩි කතාබහක් නිර්මාණය වී ඇති අතර, ඇතැම් පාර්ශව පෙන්වා දෙන්නේ ජාතික ජනබලවේගයේ අනුර කුමාර දිසානායක මහතා මෙන් මහ බැංකු අධිපතිවරයාද අද එකක් කියා හෙට එසේ නොකීව බව පවසන තාලයේ පුද්ගලයකු ද යන්න ගැටලුවක් මතුවී ඇති බවයි.