Institute of Politics ආයතනයේ වාර්ෂික ඩිප්ලෝමා ප්‍රදානෝත්සවය පසුගිය දා අභිමානවත් අයුරින් ශ්‍රී ලංකා පදනම් ආයතනයේ දී පවත්වන ලදී. 

Institute of Politics ආයතනයේ සභාපති මහාචාර්ය අමින්ද මෙත්සිල පෙරේරා මහතා ඇතුළු ආචාර්ය මණ්ඩලය සහ නීතිඥ සමන් සේනාධීර, නීතිඥ අකලංක හෙට්ටිආරච්චි, නීතිඥ වින්ද්‍යා මුතුලිංගම් සහ ජ්‍යේෂ්ඨ පර්යේෂක හරීන්ද්‍ර බී දසනායක ඇතුළු අධ්‍යක්ෂ මණ්ඩල සමාජිකයින් ද රාජ්‍ය නොවන සංවිධාන පිළිබඳ ජාතික මහ ලේකම් කාර්යාලයේ අධ්‍යක්ෂ ජනරාල් සංජීව විමලගුණරත්න මහතා ද මෙම අවස්ථාවට එක්විය. 

මෙම උළෙලේ විශේෂ ආරාධිත සම්ප්‍රාප්තිය ලෙස ශ්‍රී ලංකාභිමාන්‍ය කරු ජයසුරිය මැතිතුමන් සහභාගීවූ අතර ඩිප්ලෝමා ප්‍රදානෝත්සවයට සමගාමී වශයෙන් දැනට දේශපාලනයේ සිටින කෘතහස්ත දේශපාලන භාවිතාවක් ඇත්තාවූ ජනතා නියෝජිතයින් ඇගයීමක් ද සිදුවිය. 

මෙහිදී Institute of Politics විසින් වසරේ හොඳම ව්‍යවස්ථාදායක කාර්යය ඇගයීම වෙනුවෙන් වූ සම්මානය ශ්‍රී ලංකා පාර්ලිමේන්තුවේ කාන්තා මන්ත්‍රී සංසදය වෙත පිරිනමනු ලැබීය. 

දේශපාලන පක්ෂ බේදයෙන් තොරව කාන්තා මන්ත්‍රී සංසදයේ සියලුම මන්ත්‍රීවරියන් එක්ව කාන්තා අයිතිවාසිකම් සුරක්ෂිත කිරීම වෙනුවෙන් වූ පනත් කෙටුම්පත් සතරක් මේ වනවිට පාර්ලිමේන්තුව වෙත ඉදිරිපත් කිරීමට කටයුතු යොදා තිබීම මෙම ඇගයීම සඳහා හේතු පාදක කරගන්නා ලදී.

එමෙන්ම Institute of Politics ආයතනය විසින් ජීවිතයේ එක්වරක් පමණක් පිදෙන ප්‍රජාත්නත්‍රවාදයේ රන් සම්මානය මෙවර මහාචාර්ය තිස්ස විතාරණ මහතා වෙත පිරිනමනු ලැබීය. 

2008/2009 සර්ව පාක්ෂික නියෝජිත සමුළුවේ සභාපතිධූරය දරමින් ජාතික ගැටළුව විසඳීම සඳහා බලය බෙදීම පදනම් කරගත් නව ආණ්ඩුක්‍රම ව්‍යවස්ථාවක් සම්පාදනය කිරීම සඳහා එතුමන් දරන ලද නිර්ව්‍යාජ කැපවීම මෙහිදී විශේෂ ඇගයීමට භාජනය විය. 

වසරේ දක්ෂතම Institute of Politics විද්‍යාර්ථයාට හිමි සම්මානය සම සම්මානයන් වශයෙන් දමිතා අබේරත්න සහ මිෂෙල් මනමේන්ද්‍ර මෙහිදී දිනා ගන්නා ලදී. 

Institute of Politics මීළඟ පාඨමාලාව දෙසැම්බර් මස ආරම්භ වීමට නියමිතව ඇත.