65 වන කියුබානු විප්ලව දින සැමරුම වෙනුවෙන් අද(31) දින මෙරට කියුබානු තානාපති කාර්යාලයේ දී චාම් උත්සවයක් සංවිධානය කර තිබිණි.

ඒ සඳහා කියුබානු තානාපති අන්ද්‍රෙස් ගොන්සාලෙස් ගරීදො මහතා එක්ව සිටි අතර, ඒ මහතා එහිදී පවසා සිටියේ ඉකුත් කාලසීමාවේ ඇතිවූ කොවිඩ් වසංගතය හේතුවෙන් කියුබානු ආර්ථිකයේ යම් පසුබෑමක් ඇති වුවද, අද වන විට එම තත්ත්වය වෙනස් වෙමින් පවතින බවයි.

එසේම වසර 31 ක් තිස්සේ කියුබාවට විරුද්ධව පනවා තිබූ සම්බාධක ඉවත් කරන ලෙස එක්සත් ජාතීන්ගේ සංවිධානයට යෝජනා කළ බවත් 31 වතාවක දීම එම යෝජනාව ජයගත් බවත්, පසුගිය වසරේ දී එම යෝජනාවට අමෙරිකාව හා ඊශ්‍රායලය පමණක් විරුද්ධ වූ බවත් ඒ මහතා මෙහිදී පැවසීය.

කලාපයේ හා ලෝකයේ හොඳම මානුෂීය රට බවට කියුබාව පත්වී ඇති බව සංගණන වර්තාවලින් පෙන්වා දී ඇති බවත් කියුබානු තානාපතිවරයා පවසයි.

මෙහිදී ලංකා සමසමාජ පක්ෂයේ මහ ලේකම් තිස්ස විතාරණ මහතා පවසා සිටියේ කියුබාව අමෙරිකාව ප්‍රමුඛ අධිරාජ්‍යවාදී කඳවුරට එරෙහිව දක්වන සටන්කාමීත්වය මෙරටට ද ආදර්ශයක් බවය. 'දියෝගාෂියා' දිවයින අමෙරිකාව අහිමි වීමත් සමග අමෙරිකාව ශ්‍රී ලංකාව දෙසට ඉව අල්ලමින් සිටින බවත්, ඒ සඳහා මෙරට නායකයන් ද සාහය දක්වන බවත් ඒ මහතා මෙහිදී පැවසීය. වර්තමාන ජනාධිපති රනිල් වික්‍රමසිංහ හා අමෙරිකානු පුරවැසියකු වන බැසිල් රාජපක්ෂ එම සහාය සපයන බව ද ඔහු මෙහිදී ප්‍රකාශ කර සිටියේ ය.

මෙම අවස්ථාවට ජනතා විමුක්ති පෙරමුණ නියෝජනය කරමින් සුනිල් හඳුන්නෙත්ති, සම සමාජ පක්ෂය නියෝජනය කරමින් මහාචාර්ය තිස්ස විතාරණ, පාර්ලිමේන්තු මන්ත්‍රීවරුන් වන වාසුදේව නානායක්කාර, තිලංග සුමතිපාල, ඩලස් අලහප්පෙරුම මෙන්ම ජාතික නිදහස් පෙරමුණ හා පෙරටුගාමී සමාජවාදී පක්ෂය නියෝජනය කරමින් සභිකයන් ද එක්ව සිටියහ.