ලයිකා මොබයිල් හිමිකරු සුභාෂ්කරන් අලි රාජා ලබන සතියේ යළි ලංකාවට පැමිණීමට නියමිතව ඇතැයි ප්‍රවෘත්ති වෙබ් අඩවි වාර්තා කර තිබිණි.

සුභාෂ්කරන් ඉදිරිපත් කරන ලද එක්සත් රාජධානියේ ලයිකා සමූහයට අයත් පෙටිගෝ කොමර්සියො ඉන්ටර්නැෂනල් සමාගම (Pettigo Comercio International LDA c/o NDB Investment Bank Ltd) ටෙලිකොම් ආයතනයේ කොටස් මිලදී ගැනීම සඳහා කෙටි ලයිස්තුගත කරන ලද සමාගම් ලයිස්තුවට ඇතුළත් නොවීම ගැන ජනපති හා සාකච්ඡා කිරීමට ඔහු මෙසේ ලංකාවට පැමිණනෙ බවයි පැවසෙන්නේ.

අදාළ කෙටි ලයිස්තුවට මේවන විට ඇතුළත්ව ඇත්තේ චීනයේ ගෝවූන් ඉන්ටර්නැෂනල් ඉන්වෙස්ට්මන්ට් හෝල්ඩිංග්ස් (Gortune International Investment Holding Ltd c/o Capital Alliance Limited) සහ ඉන්දියාවේ ජියෝ ප්ලැට්ෆෝර්ම්ස් (Jio Platforms Ltd, Gujrat, India) යන සමාගම් දෙකය.

ශ්‍රී ලංකා ටෙලිකොම් ආයතනයේ රජය සතු 50.23% කොටස් විකුණා දැමීම අවශ්‍ය පියවර ගනිමින් ඇති අතර, ටෙලිකොම් මිලදී ගැනීමට කෙටි ලැයිස්තුගත කිරීම සිදුකරනු ලැබුවේ මුදල් අමාත්‍යාංශයේ විශේෂ ව්‍යාපෘති කමිටුව සහ කැබිනට් මණ්ඩලය පත්කළ විශේෂ සාකච්ඡා කමිටුව විසිනි.

මේ අතර, ඥානම් ෆවුන්ඩේෂන් හි ශාඛා 25ක් ලංකාව පුරා ස්ථාපනය කරමින් අලිරාජා සුභාෂ්කරන් මහතා කරාමය ලකුණෙන් මැතිවරණ කොමසාරිස් කාර්යාලයේ ලියාපදිංචි අරුණලු ජනතා පෙරමුණ (Arunalu People’s Alliance) දේශපාලන පක්ෂය මිලදී ගැනීමට උත්සාහයක නිරතව ඇති බවද වාර්තා වේ.

මේ සම්බන්ධයෙන්  අරුණලු ජනතා පෙරමුණේ නායක දොස්තර කේ.ආර්. ක්‍රිෂාන් මහතාගෙන් කළ විමසීමක දී ඔහු පවසා ඇත්තේ සුභාෂ්කරන් මහතා සිය පක්ෂය සමඟ එක්ව කටයුතු කිරීමට සාකච්ඡා කළ බවය.

‍කෙසේවුවද, සුභාෂ්කරන් මහතාගේ දේශපාලන අරමුණට රජයේ ප්‍රබල දේශපාලඥයකුගෙන් එල්ලවූ බලපෑමක් හේතුවෙන් මේවන විට ඔහු තාවකාලික පසුබෑමක් ලබා ඇතැයි ද වාර්තා වේ.