පවුලේ පෝෂණය සුරකිමින්, ආහාර සුරක්ෂිතතාව ගොඩනගමින් වීදියේ ගනුදෙනු අවම කරන "සුව දිවි අරණ - අපේ ගෙවත්ත" ජාතික ගෙවතු වගා වැඩසටහන - රට පුරා ගෙවතු ලක්ෂයක් ඉලක්ක කර ගනිමින් පළමු අදියර බාස්නාහිර පළාත තුළ ක්‍රියාත්මක කිරීම සිදුවිය.

මේ මොහොතේ රටේ පවතින ආර්ථික අර්බුදය හමුවේ කාන්තාවන් හට සිය පවුලේ පෝෂණය වෙනුවෙන් අවශ්‍ය කරන තම ගෙවත්ත තුළදීම වගා කරගත හැකි එළවළු ඇතුළු අත්‍යවශ්‍ය දෑ වගා කරගැනීමට අත්වැලක් මෙන්ම, දරුවන්ගේ නිරෝගී බව රැක ගැනීම වෙනුවෙන් ජාතික කාන්තා එකමුතුව විසින් පොහොර, බීජ සහ පැල නොමිලේ ලබා දෙමින් "සුව දිව් අරණ - අපේ ගෙවත්ත" ගෙවතු වගා ජාතික වැඩසටහන කොළඹ දිස්ත්‍රික්කය තුළ ආරම්භ කරන ලද අතර එහි දෙවන වැඩසටහන හෝමාගම ප්‍රාදේශීය ලේකම් කොට්ඨාසය මූලික කරගනිමින් 2024 පෙබරවාරි 12 වන සඳුදා දින ප. ව. 2.30 ට හෝමාගම කටුවාන පින්බිම ප්‍රජාශාලා පරිශ්‍රයේ දී පවැත්විණි.

ජාතික කාන්තා එකමුතුව සංවිධානය කරන ලද මෙම වැඩසටහන සඳහා මග පෙන්වීම හා උපදේශකත්වය සපයනු ලැබුවේ ජාතික ගොවිජන එකමුතුව සහ යහපත් කෘෂිකර්මාන්තයක් උදෙසා වූ ජාතික ව්‍යාපාරය මගිනි.

මෙම වැඩසටහන වෙනුවෙන් පොහොර සඳහා අනුග්‍රාහක දායකත්වය 'සතුට කාබනික පොහොර නිෂ්පාදන සමාගම' සැපයූ අතර, මෙම අවස්ථාවට ජාතික ගොවිජන එකමුතුවේ සහ යහපත් කෘෂි කර්මාන්තයක් උදෙසා වූ ජාතික ව්‍යාපාරයේ සභාපති අනුරාධ තෙන්නකෝන් , ජාතික කාන්තා එකමුතුවේ සභාපතිනි හෂිනි සිල්වා, ජාතික කාන්තා එකමුතුවේ ලේකම් තමරා කලුපහන, ජාතික කාන්තා එකමුතුවේ මූල්‍ය ලේකම් සුනීතා මීපාවල, ජාතික කාන්තා එකමුතුවේ හෝමාගම සංවිධායිකා කුමාරි සුදසිංහ, යන මහත්ම මහත්මීන් ඇතුළු විශාල පිරිසක් එක්ව සිටියහ.