මහනුවර ශ්‍රී දළදා මාලිගාවට ජවිපෙ පහර දුන්නේ දළදා වහන්සේ පැහැර ගන්නද?

Oct 14, 2026 at 10:10 AM

|

Lanka Leader

මහනුවර ශ්‍රී දළදා මාළිගාවේ ප්‍රහාරය සිදුවූයේ දළදා වහන්සේ පැහැර ගැනීමට නොව පොලිස් මුරපොලවල් 5කට ප්‍රහාරයක් එල්ලකර ආයුධ පැහැර ගැනීමටය. මේ පිළිබඳ සොයා බැලීමට මම මෙයට වසර 20කට පමණ පෙර දළදා මාලිගා ප්‍රහාරයට සම්බන්ධවීමේදී එම ස්ථානයේදී අත්අඩංගුවට ගෙන ප‍්‍රහාරය සම්බන්ධයෙන් නඩු පැවරූ තිදෙනාම නුවරට ගොස් හමුවිය. එමෙන්ම නඩුව විභාගකළ නුවර මහාධිකරණ විනිසුරු විනිසුරු නිශ්ශංක උදලාගම (එවකට විශ්‍රාමික) සහ ආරක්ෂක අංශයේ පාර්ශ්වයන්ද ප්‍රහාරයට එක්වී එයට හසුනොවූ කැරලිකරුවන් කීපදෙනෙක් සමගද සාකච්ඡා කළෙමි. මහනුවර ශ්‍රී දළදා මාළිගාවේ පොලිස් මුරපොලවල් 5කට ප්‍රහාරයක් එල්ලවූයේ 1989 පෙබරවාරි 8දාය.

ජවිපෙ 2වැනි කැරැල්ලේදී මහනුවර දිස්ත්‍රික්කයේ පොලිස් කොට්ඨාශ ජවිපෙ මගින් කලාප 8කට බෙදා තිබිණි. ඒ වත්තේගම(පාතදුම්බර, වත්තේගම, පන්විල සහ අලවතුගොඩ), උඩුදුම්බර(රංගල, උඩුදුම්බර, තෙල්දෙණිය, මාඩුගොඩ සහ හසලක), කුණ්ඩසාලේ (මැණික්හින්න සහ කුණ්ඩසාලේ/පල්ලකැලේ), මහනුවර (කටුගස්තොට සහ නුවර), හාරිස්පත්තුව (හාරිස්පත්තුව, අංකුඹුර සහ ගලගෙදර), නාවලපිටිය(ගම්පොල, නාවලපිටිය සහ පුස්සැල්ලෑව), යටිනුවර (පේරාදෙණිය, දවුලගල, කඩුගන්නාව) හේවාහැට (තලාතුඔය සහ හඟුරන්කෙත කොටසක්) වශයෙනි. 

මින් කැරැල්ල සඳහා වැඩිම පූර්ණකාලීනයින් පිරිසක් බිහිවූයේ කුණ්ඩසාල කලාපයෙනි. 1989 අගෝස්තු වන විට නුවර දිස්ත්‍රික්කයේ පමණක් පූර්ණකාලීනයින් 425ක් සිටි අතර ඉන් 62ක් කාන්තාවන්ය. ජවිපෙ ක්‍රියාත්මක වූ දිස්ත්‍රික්ක අතරින් වැඩිම තුවක්කු ප‍්‍රමාණයක් එකතුකර ගැනීමට හැකිවූයේද මහනුවර දිස්ත්‍රික්කයෙනි. ඉන් බොහෝමයක් තුවක්කු රටේ අනිකුත් ස්ථානවලට බෙදා හරින ලදී. ජවිපෙ සම්බන්ධීකරණ කාර්යාල ක්‍රියාත්මක වූයේ උඩපේරාදෙණියේ සහ ගම්පොල පාරේ අඟුනාවල කුලියට ගත් නිවාසයන්හිදීය.

මහනුවර ශ්‍රී දළදා මාළිගාවේ පොලිස් මුරපොලවල් 5කට 1989 පෙබරවාරි 8 ප‍්‍රහාරයක් එල්ලකළ ජවිපෙ 2වැනි කැරැල්ලේ කණ්ඩායම් 5කට අයත් කැරලිකරුවන් 43දෙනෙකු ඒවායේ තිබූ ටී. 81 රයිෆල් තුවක්කු 9ක් සහ ටී. 56 රයිෆල් තුවක්කු 2ක් ඇතුළු ගිනි අවි 17ක් පැහැරගනු ලැබීය. මෙම මහනුවර ශ්‍රී දළදා මාළිගාවේ පොලිස් මුරපොලවල් 5හේ ප‍්‍රහාරය පිළිබඳ සැලසුම සඳහා සාකච්ඡාව පැවතියේ කෘෂිකර්ම දෙපාර්තමේන්තුවේ නිලධාරියෙකු වූ දිගන කොලොන්ගහවත්තේ සිරිසේන ගේ නිවසේදීය. සැලසුමේ නායකයා වූ දිස්ත්‍රික් දේශපාලන ලේකම් උපාලි ජයවීර (මානෙල්, කිංස්ලි හෙවත් නුවන් ලෙසද හැඳින්විණි) සහ ප‍්‍රහාරයේ නායකයා වූ නිකවැරටියේ ප්‍රියන්ත ඇතුළු 7ක් එයට එක්ව සිටියහ. 

දෙදිනකට පසු දළදා මාලිගයේ පොලිස් මුරපොලවල් වලින් ආයුධ පැහැරගැනීම සිදුවූ අතර එයට එක්වූ 43න් 12ක් කාන්තාවන්ය. එම කාන්තාවන් අතර මාතලේ ගංගා, මංගලිකා, නදීකා, ලිලන්ති සහ වීරසිංහද විය. කැරලිකරුවන් තැබූ වෙඩි ප‍්‍රහාරවලින් හමුදා සෙබළ හේරත් මුදියන්සේලාගේ මුතු බංඩා, ඩිංගිත්තා හේනයලාගේ ගෙදර ප‍්‍රැන්සිස්ට තුවාල සිදුවිය. ටී. 81 රයිෆල් තුවක්කු 9ක් සහ ටී. 56 රයිෆල් තුවක්කු 2ක් ඇතුළු ගිනි අවි 17ක් පැහැරගනු ලැබීය. එහිදී පැහැරගත් ආයුධ රංගල මගුල්දෙණිය නිවසක සහ උපාලි නවරත්න ගේ නිවසේ සඟවා තැබිණි. 

එම අවි පැහැර ගැනීමේදී උඩුවෙල මොනරංල සුදලිකාරගේ පද්මා චාන්දනී හෙවත් තනූජා, ඌරාපොල දියතලේ ගෙදර හීන්කෙන්ද මිදියන්සේලාගේ නවරත්න බණ්ඩා සහ මැණික්හින්න කෙන්ගල්ලේ තිලක් බන්දුල විජේසිරි අත්අඩංගුවට පත්විය. පන්විල රාජසිංහ මහා විද්‍යාලයෙන් අධ්‍යාපනය ලත් බන්දුල විජේසිරි ජවිපෙට එක්වූයේ නුවර වරාපිටියේ පදිංචි කුණ්ඩසාලේ සෙනෙවිරත්න මගිනි. පසුව ඒ පිළිබඳව මහනුවර මහාධිකරණය ඉදිරියේ මහාධිකරණ විනිසුරු නිශ්ශංක උදලාගම හමුවේ පැවති නඩු විභාගය අවසානයේ බන්දුල විජේසිරි 1994 ඔක්තෝබර් 19 නිදොස් කොට නිදහස් කරන ලදී. එයට අදාළ මහාධිකරණ නඩු තුනේ නියෝගද ඔබගේ පරිශීලනය සඳහා මේ සමග යොමුකර ඇත. මහනුවර ශ්‍රී දළදා මාළිගාවේ ප්‍රහාරය සිදුවූයේ දළදා වහන්සේ පැහැර ගැනීමට නොව පොලිස් මුරපොලවල් 5කට ප්‍රහාරයක් එල්ලකර ආයුධ පැහැර ගැනීමට බව මේ අනුව පැහැදිලිය.

මහනුවර ශ්‍රී දළදා මාළිගාවේ පොලිස් මුරපොලවල් 5කට පහරදීමේ සැලසුමේද නායකයා වූ දිස්ත්‍රික් දේශපාලන ලේකම් උපාලි ජයවීර ඇතුළු ඇතුළු 5 දෙනෙකු අත්අඩංගුවට ගැනීමට තොරතුරක් සපයන අයෙකුට තෑගි පිරිනමන බව විජේවීර ඝාතනයෙන් පසු පොලිස් මූලස්ථානය 1989 නොවැම්බර් 28 නිවේදනය කර තිබිණි. නුවරඑළියේ හාවාඑළියේ නිවාස සංකිර්ණයකදී 1990 ජනවාරි 2 අලූයම 1.45ට උපාලි අත්අඩංගුවට ගැනුණේ නුවර හතරලියද්දේ ජවිපෙ නායකයෙකු සමඟිනි.අත්අඩංගුවට ගත් උපාලි කොළඹ මත්තේගොඩ ආරක්ෂක හමුදා කඳවුරට ගෙන ආවේය. 

වසර 1990 ජනවාරි 6 දක්වා මත්තේගොඩ කඳවුරේ තබාගෙන සිටි උපාලි එදින සිට මසක් දක්වා රඳවාගෙන සිටියේ මහනුවර උඩවත්ත කැලය ආසන්නයේ පිහිටි හමුදා සැපයුම් බලකා කඳවුරේය. එම කාලය තුළ “හමුදාවට සමාන ඇඳුමක්” උපාලිට අන්දවා නුවර දිස්ත‍්‍රික්කයේ ජවිපෙ කැරැල්ලට අදාළව ක‍්‍රියාකාරකම් සිදුකළ ස්ථාන රැසකට ඔහු ගෙනයන ලදී. එම කඳවුරේ තවත් ජවිපෙ කැරලිකරුවන් 21 රඳවා සිටි අතර ඔවුහු මාංචු දමා ඇඳවල්වල ගැටගසා තිබිණි. කඳවුර භාරව සිටි අයෙකු වූයේ කපිතාන් කරුණාරත්නය. 

පසුව 1990 පෙබරවාරි 09 උපාලි ඇතුළු කැරලිකරුවන් කිහිපදෙනෙක් පල්ලෙකැලේ ගම්උදාව භූමියේ පිහිටා තිබූ හමුදා කඳවුරට ගෙනයන ලදී. කඳවුර භාරව සිටි අයෙකු වූයේ කපිතාන් රත්නායකය. එහි සිටි බුද්ධි අංශයට අයත් ආරක්ෂක අංශ සාමාජිකයින් අතර ලූතිනන් නලීන් කරුණාරත්න, බුලත්සිංහල මහින්ද, නුවර සපුකොටන, හෝමාගම සේනාරත්න, මාතර ජී. පී. ඞී. ඒ. ගුණසේකර ඇතුළු 12 දෙනෙකු විය. මත්තේගොඩ කඳවුරටද දෙවරක් ගෙන ගියේය. උපාලි වධබන්ධන වලටද ලක්විය. යළිත් පල්ලෙකැලේ කඳවුරට ගෙන එන ලදී. උපාලි ඝාතනයට ලක්වුයේ 1990 මාර්තු 6 රාත‍්‍රී 11.30ට පමණය. සුදු වෑන් රියක පටවාගත් ඔහුගේ සිරැර මාදුගොඩ දුල්වත්ත පාරේ ඉලූක් පඳුරු අතර අතහැර විනාශකර දමන ලදී.

උපාලි ජයවීර ගේ බිරිඳ වූයේ දඹගල්ල පියරත්න පාසැලේ සිට පෙම්වතිය බවට පත්වූ සහකාර වෛද්‍ය නිලධාරි(AMP පසුව RMO) රත්නායක මුදියන්සේලාගේ හේමාවතිය. උපාලි ජයවීර 1989 මාර්තු 12 නුවරදී හේමාවතී සමඟ නුවන් ජයවීර නමින් අවාහ විය. මංගල ඡායාරූපය ගනු ලැබුවේ පිලිමතලාවේ ‘සමන්’ ස්ටුඩියෝ හිදීය. එම අවස්ථාවට සොහොයුරිය සුසිලා ඇතුළු පවුලේ අය සහභාගි වූහ. උපාලි මියයන විට බිරිය ගැබිණි මවක් වූ අතර දරුවා චතුර විමුක්ති 1990 ජූනි 22 උපත ලැබීය. උපාලිගේ වැන්දඹු බිරිය පසුව විවාහ වූයේ හම්බන්තොට දිස්ත්‍රික් පාර්ලිමේන්තු මන්ත්‍රී නිහාල් ගලප්පත්ති සමගය. 

හේමලතා කලක් අම්පාර පදියතලාව රෝහල,දික්වැල්ල නාකුලුගමුව රෝහල සහ දෙහිඅත්තකණ්ඩිය මාවනාවෙල රෝහල ඇතුළු රෝහල් කිහිපයකම සේවය කළාය. සිය වෘත්තීය ජීවිතයේදී "ගිලනුන්ගේ ආදරය" දිනු වෛද්‍ය හේමලතාද 2020 ජනවාරි මස පිළිකා රෝගයට ගොදුරුව දිවියෙන් සමුගත්තාය.

(ධර්මන් වික්‍රමරත්න Dharman Wickremaretne ලියයි)

මුහුණු පොතින් උපුටා ගන්නා ලදී