ජනතාවගේ හෘද සාක්ෂිය අකා මකා දැමීමේ ආඛ්‍යාන යුද්ධය..

Sep 11, 2026 at 09:20 AM

|

Lanka Leader

ජාතියක ඉරණම තීරණය වන්නේ එහි ආර්ථික ශක්තියෙන් හෝ යුද බලයෙන් පමණක් නොවේ. එය තීරණය වන්නේ එම සමාජය සත්‍යය හඳුනාගන්නා ආකාරය, තම ඉතිහාසය තේරුම් ගන්නා ආකාරය සහ අනාගතය පිළිබඳ තීරණ ගන්නා ආකාරය මතය.

විද්‍යාත්මක චින්තනය, තර්කය සහ විචාරශීලීභාවය වෙනුවට මිථ්‍යා විශ්වාස, ව්‍යාජ පැහැදිලි කිරීම් සහ වයිරය ක්‍රෝධය වපුරන චිත්තවේගීය ආඛ්‍යාන සමාජ මනස තුළ ප්‍රමුඛත්වය ගන්නා විට එය හුදෙක් සංස්කෘතික ප්‍රවණතාවක් නොවේ. එය ජනතාවගේ තීරණ ගැනීමේ හැකියාව දුබල කරන ගැඹුරු සමාජ ක්‍රියාවලියකි.

මෙය එක් ආණ්ඩුවකට, එක් දේශපාලන පක්ෂයකට හෝ එක් යුගයකට පමණක් සීමා වූ සංසිද්ධියක් නොවේ. ඉතිහාසය පුරාම බලය රැක ගැනීම සඳහා මිනිසුන්ගේ විශ්වාස, බිය, බලාපොරොත්තු සහ මතකය හැඩගැස්වීමට විවිධ ආඛ්‍යාන භාවිතා කර ඇත. වෙනස ඇත්තේ ඒවා භාවිත කරන ආකාරය සහ ඒවාට ලබාදෙන පිළිගැනීමේ මට්ටම තුළය.

මෙයයි ආඛ්‍යාන යුද්ධයේ මූලික ස්වභාවය.

යුද්ධයක් ජයග්‍රහණය කළ පමණින් ජාතියක ආරක්ෂාව සම්පූර්ණ වන්නේ නැත. භූමිය නිදහස් කරගැනීම පළමු ජයග්‍රහණය පමණි.

එහෙත් ජාතියක මනස, මතකය සහ හෘද සාක්ෂිය ආරක්ෂා කරගැනීම අවසාන ජයග්‍රහණයයි.

මානව ඉතිහාසය පෙන්වා දෙන්නේ සමාජයක් ඇතුළතින් දුර්වල වීමට පෙර එහි විශ්වාස පද්ධති, සාමූහික මතකය සහ අනාගතය පිළිබඳ විශ්වාසය දුර්වල විය හැකිය.

ඒ නිසා නූතන ගැටුම් තේරුම් ගැනීමේදී ආයුධ පමණක් නොව, තොරතුරු, මතවාද සහ මනෝවිද්‍යාත්මක බලපෑම්ද අවධානයට ගත යුතුය.

ත්‍රස්තවාදය සහ බෙදුම්වාදී ව්‍යාපාර බොහෝවිට හුදෙක් ආයුධ සටන් නොවේ. ඒවා දේශපාලන අරමුණු, ආර්ථික ජාල, ප්‍රචාරණ ක්‍රම සහ ජන මතය හැඩගැස්වීමේ උපාය මාර්ග සමඟ බැඳී පවතී. 

එහෙත් අද ලෝකයේ බලවත්ම ආයුධයක් තුවක්කුව නොවේ.

👉🏿එය ආඛ්‍යානයයි.

රටක් පාලනය කිරීමට හෝ සමාජයක් දුර්වල කිරීමට සෑම විටම හමුදාවක් අවශ්‍ය නොවේ. 

ජාතියක හෘද සාක්ෂිය දුර්වල වීම ආරම්භ වන්නේ එහි ජනතාවට තමන්ගේම උරුමය පිළිබඳ සැකයක් ඇති කිරීමෙනි.

ශ්‍රී ලංකාව වැනි රටකට එහි ඉතිහාසය යනු හුදෙක් අතීතයේ සිදුවීම් එකතුවක් නොවේ. රුවන්වැලි මහා සෑය, බිසෝකොටුව, දැවැන්ත වාරි තාක්ෂණය සහ අනුරාධපුර පොළොන්නරු යුගවල නිර්මාණ, ජාතියක බුද්ධිය, සංවිධාන හැකියාව සහ නිර්මාණශීලීත්වයේ සංකේතයන්ය.

එවැනි සාමූහික මතකයක් දුර්වල වූ විට, රටක් භෞතිකව පැවතියද එහි ආත්ම විශ්වාසය දුර්වල විය හැකිය.

බෙදුම්වාදයේ එක් මානයක් භූමිය වෙන් කිරීම වුවද, තවත් ගැඹුරු මානයක් වන්නේ ජනතාවගේ සාමූහික මතකය වෙන් කිරීමයි. එකම ඉතිහාසයක් වෙනුවට එකිනෙකට සතුරු ඉතිහාස කතා නිර්මාණය කිරීමයි.

👉🏿අද ආඛ්‍යාන යුද්ධය ක්‍රියාත්මක වන්නේ සමාජ මාධ්‍ය, ව්‍යාජ ප්‍රවෘත්ති, අර්ධ සත්‍ය, සංවේදී ප්‍රචාරණ සහ සැලසුම් සහගත තොරතුරු මෙහෙයුම් හරහාය. 

අපි තෝරා ගන්නවා යැයි සිතන අදහස්වලින් සමහරක්, ඇත්ත වශයෙන්ම බාහිරව අප වෙත තෝරා දෙන ලද අදහස් විය හැකිය.

👉🏿ඒ නිසා අද විශාලතම සටන තොරතුරු පිළිබඳ සටනකි. සත්‍යය සහ අසත්‍යය අතර සටනකි. මතකය සහ අමතක කිරීම අතර සටනකි.

ජාතියක් විනාශ වන්නේ එහි භූමිය අහිමි වූ දවසේ පමණක් නොවේ. තමන්ගේම සත්‍යය හඳුනාගැනීමේ හැකියාව, තම ඉතිහාසය පිළිබඳ විශ්වාසය සහ තම හෘද සාක්ෂිය අහිමි වූ දවසේය.

👉🏿භූමිය නිදහස් කරගැනීම පළමු ජයග්‍රහණයයි.

👉🏿මනස නිදහස් කරගැනීම අවසාන ජයග්‍රහණයයි.

- විජය දිසානායක