යුදමය පරිසරය හමුවේ වසර 28 ක කාලයක් අධිආරක්ෂිත කාලපයට අයත්වීමෙන් වැසී තිබූ යාපනය මයිලිඩ්ඩි විද්‍යාලය සංවර්ධනය කිරීමට ශ්‍රීලංකා ගුවන් හමුදාව විසින් පියවර ගෙන තිබේ.

මෙම විද්‍යාලයේ ඉගෙනුම ලබන සිසුදරුවන්ට අවශ්‍යව තිබූ ප්‍රධාන ශාලාව රුපියල් ලක්ෂ 80 ක් වැනි මුදලකින්  ගුවන් හමුදා ශ්‍රම දායකත්වයෙන් මාස 02 ක් වැනි  කාලයකදී ඉදිකිරීමට සැලසුම් කිරීම විශේෂත්වයකි.

උතුරු පළාත් ආණ්ඩුකාර පී.ඒස්.ඒම්.චාල්ස් මහත්මියගේ සහ ශ්‍රී ලංකා ගුවන් හමුදාවේ ගුවන්යානා ඉංජිනේරු අංශයේ අධ්‍යක්ෂ ජනරාල් එයාර්වයිස් මාර්ෂල් මුදිත මහවත්තගේ මහතාගේ ප්‍රධානත්වයෙන් මුල්ගල  තබා ප්‍රධාන ශාලාවේ ඉදිකිරීම් කටයුතු ඊයේ ආරම්භ විය.

1918 ජුනි 14 වනදා ආරම්භ කොට ඇති මෙම විද්‍යාලය ත්‍රස්තවාදී බලපෑම් හේතුවෙන් 1990 ජූලි 16 වනදා ත්‍රිවිද හමුදා භාරයට ගත් අතර මෙම විද්‍යාලය පසුව නම්කරන ලද අධිආරක්ෂිත කලාපයට අයත් විය.

යුද්ධය නිමාවීමෙන් පසුව 2018 සැප්තැම්බර් 06 වන දින මෙම විද්‍යාලය දරුවන්ගේ අධ්යාපන කටයුතු සදහා යළි විවෘත්ත විය.‍

ඉතා අඩු පහසුකම් යටතේ මේ වනවිට අධ්‍යාපනය ලබමින් සිටින 150 ක් පමණ වූ සිසු දරුවන්ගේ අධ්‍යාපනය දියුණු කිරීමේ අරමුණින් මෙන්ම ශ්‍රී ලංකා ගුවන් හමුදාවේ 73 වන සංවත්සරයට සමගාමීව මෙම විද්‍යාලයේ ඉදිකෙරෙන නව ප්‍රධාන ශාලාව දින 60 කින් ඉදිකිරීම අවසන් කිරීමට නියමිතව ඇත.‍

මුල් ගල තැබීමේ අවස්ථාවට සහභාගී වූ ප්‍රධාන ආරාධිත අමුත්තා වූ උතුරු පලාත් ආණ්ඩුකාර පී.ඒස්.ඒම්. චාල්ස් මහත්මිය ප්‍රකාශ කර සිටියේ උතුරේ සිසු දරුවන්ගේ අධ්‍යාපනය නගාසිටුවීමට රජය විසින් මෙම විද්‍යාලයේ හිමිකාරීත්වය ඇති ඉඩමෙහි ඉතිරිව ඇති කොටසේ නීත්‍යානුකූල අයිතියද මෙම විද්‍යාලයට ඉදිරියේදී ලබාදීමට කටයුතු සලසන බවටත් ලබන වසර වන විට උතුරු පළාතේ අවතැන් වැසියන් සියලු දෙනා යළි පදිංචි කිරීමේ කටයුතු සම්පූරණයෙන් අවසන් කිරීමටත් ඉඩම් ගැටලු සම්පූරණයෙන් නිරාකරණය කිරීමටත් කටයුතු කරන බව පැවසීය.

– වන්නි රොමේෂ් මධූෂංඛ