යුටෝපියාවේ නැගීම.. කවුද මේ 'ඕෂෝ' ?..

Jun 28, 2026 at 11:51 AM

|

Lanka Leader

ඕෂෝ යනු ලොව පුරා ඉහළ ආකර්ෂණයක් දිනාගත් සේම, විසිවන සියවසේ පහළ වූ වඩාත්ම මතභේදාත්මක සහ විවේචනයට ලක්වූ ආගමික නායකයෙකි. ඔහුගේ දර්ශනයට එහා ගිය, සමාජය තුළ දැඩි කතාබහට සහ අප්‍රසාදයට ලක්වූ අයහපත් පැතිකඩ බොහෝ තිබූ බව විවිධ තොරතුරු හරහා අනාවරණය වේ.

1980 ගණන්වල ඇමරිකාවේ ඔරෙගන් ප්‍රාන්තයේ ඕෂෝගේ අනුගාමිකයින් විසින් ගොඩනැඟූ "රජ්නීෂ්පුරම්" නගරය තුළ දැවැන්ත නීතිවිරෝධී ක්‍රියා රැසක් සිදුවිය. ප්‍රාදේශීය ඡන්ද ප්‍රතිඵල තමන්ට පක්ෂපාතී කරගැනීම සඳහා, ඕෂෝගේ ප්‍රධාන ලේකම්වරිය වූ මා ආනන්ද් ශීලා ඇතුළු පිරිසක් විසින් අසල නගරයක වැසියන්ගේ කෑමවලට "සැල්මොනෙල්ලා" (Salmonella) නැමැති බැක්ටීරියාව මිශ්‍ර කර දැවැන්ත ජෛව-ත්‍රස්ත ප්‍රහාරයක් (Bio-terror attack) එල්ල කරන ලද බව පැවසේ. මෙයින් පුද්ගලයන් 750 කට අධික පිරිසක් රෝගාතුර වූ බවත් සඳහන්ය.

අධ්‍යාත්මික ගුරුවරයෙකු වුවද, ඔහු අතිශය සුඛෝපභෝගී ජීවිතයක් ගත කළේය. ඔහු සතුව "රෝල්ස් රොයිස්" (Rolls-Royce) වර්ගයේ සුඛෝපභෝගී මෝටර් රථ 93ක් තිබූ අතර, දියමන්ති එබ්බවූ ඔරලෝසු සහ මිල අධික ඇඳුම් පැළඳුම් භාවිත කිරීම නිසා ඔහුව විවේචකයින් විසින් "ධනවතුන්ගේ ගුරු" (Rich man's guru) ලෙස හඳුන්වන ලදී.

ලිංගික නිදහස සහ අපවාද: සාම්ප්‍රදායික පවුල් සංස්ථාව ප්‍රතික්ෂේප කරමින්, ලිංගික නිදහස අත්‍යවශ්‍ය බව ඔහු ප්‍රකාශ කළේය. මේ නිසා බටහිර මාධ්‍ය ඔහුව "ලිංගික ගුරු" (Sex Guru) ලෙස හැඳින්වූ අතර, ඔහුගේ ආශ්‍රම තුළ සිදුවූ විවිධ ලිංගික අපචාර සහ සූරාකෑමීම් පිළිබඳව හිටපු අනුගාමිකයින් විසින් පසුව විවිධ හෙළිදරව් කිරීම් සිදුකරන ලදී.

පහත දැක්වෙන්නේ ඕෂෝ සම්බන්ධයෙන් සමාජ මාධ්‍යයේ කොටස් වශයෙන් පළකර තිබූ සවිස්තරාත්මක සටහනක පළමු දිගහැරුමය.

රාජ්නිශ්පුරම්:(  1 කොටස) 

🔵යුටෝපියාවේ නැගීම🔵

1974 දී චන්ද්‍ර මෝහන් ජෛන් කියන හිටපු විශ්ව විද්‍යාල ආචාර්යාවරයෙක් භගවාන් " රාජ්නීෂ්" ලෙස තමන්ව හදුන්වා ගනිමින් ඉන්දියාවේ 'පූනේ' නගරයේ දී ආශ්‍රමයක් ආරම්භ කලා.

මේ වෙන කවුරුත් නෙවෙයි..රැඩිකල් සමාජවාදීන් ගෙ පපුව ඇතුලේ චේ ගුවේරා සහ දළයි ලාමා ගෙ මැද්දේ ඉන්න "ඕෂෝ".

එහි දී ඔහු දේශනා කලේ 

🛑  "ලිංගිකත්වය කියන්නේ මිනිසුන්ගේ සොභාවික ශක්තියක් මිසක්, ලැජ්ජාවෙන්න හංගන්න ඕන දෙයක් නෙවෙයි... 

🛑 "ලිංගික ආශාවන් බලහත්කාරයෙන් හිර කරගෙන ඉන්න (Suppress) මිනිස්සුන්ට කවදාවත් ආධ්‍යාත්මික නිදහසක් ලබන්න බැහැ, ඒ නිසා ලිංගිකත්වය හරහාම ඉහළ ආධ්‍යාත්මික තලයකට (Superconsciousness) යන්න ඕනේ!"...වගේ දේවල්

ඔහු බටහිර මනෝවිද්‍යා ක්‍රම සහ භාවනා එකතු කරලා විශේෂ කණ්ඩායම් වැඩසටහන් (Encounters/Groups) පැවැත්වුවා.

ඒවා වල දි මිනිස්සුන්ගේ හිතේ තියෙන බිය, ලැජ්ජාව සහ සමාජයීය බාධක (Inhibitions) කඩා බිඳ දාන්න කාමර ඇතුළේ කරන වැඩසටහන්වලදී ඇඳුම් සම්පූර්ණයෙන්ම ගලවන්න (Nudity) නියෝග කරා..

⭕ගෑණු  සහ පිරිමි නිරුවතින් කරන භාවනාවකින් පටන් ගන්න මේ වැඩසටහන් ඉවර වෙන්නේ සමුහ(Group sex) ලිංගික හැසිරීම් වලින්!⭕

මේ වගේ  දේවල් නිසා මොහුගේ මේ ආශ්‍රමය බටහිර පුද්ගලයන් අතර ඉතා ජනප්‍රිය වුනා.. බටහිරෙන් ඉන්දියාවට පැමිණි සිටි හිපියන් ද විශාල වශයෙන් මොහු වටා එක්‌වුනා.

⭕ අනිත් ආගම් සියල්ල විවේචනය කිරීම, ආශ්‍රමය තුල සිදුවෙන අසභ්‍ය හැසීරීම් වගේ දේවල් නිසා රාජනීෂ් ගෙ ආශ්‍රමය ගැන ඉන්දියානු රජයට සහ මහජනතාවට තිබුනේ දැඩි අප්‍රසාදයක්.

මේ දැඩි අප්‍රසාදය නිසා ඉන්දියාව අතහැර තමන්ගේ සහ අනුගාමිකයන්ට නිදහසේ කටයුතු කරන්න සුදුසු තැනක් ඕෂෝ හෙව්වා.

🔺🔺ඇමරිකාවට පලා යාම🔺🔺

⭕1981 දි හොර රහසේම ඇමරිකාවට පැන ගිය ඕෂෝ ලෝකයේ කිසිම රජයකට හෝ නීතියකට ඇඟිලි ගහන්න බැරි, තමන්ගේම නීති රීති ක්‍රියාත්මක වන "ස්වයංපෝෂිත ආගමික රාජ්‍යය" (Utopia) ඔරිගොන් ප්‍රාන්තයේ අක්කර 64.0000 ක අති විශාල ඉඩමක ගොඩනැගීම ආරම්භ කලා.... 

⭕ඒ තමයි "රාජ්නිශ්පුරම්" හෙවත් රාජනිෂ් පුරය.⭕

ඕෂෝ ගෙ අනුගාමිකයන් අතර මිලියනපතියන් සිටිය නිසා මුදල් වලින් ඔහුට ප්‍රශ්නයක් තිබුනේ නැහැ

ඒවගෙම විශාල අනුගාමිකයන් පිරිසක් සිටිය නිසා ශ්‍රමයෙන්ද අඩුවක් වුනේ නැහැ.

⭕නගරය ගොඩනැගිම සදහා ඕෂෝ ගෙ දකුණු අත වගේ හිටියේ "ආනන්ද් ශීලා" නැමති කාන්තාව.. ඒ වගේම නගරයේ පරිපාලනය මුළුමනින්ම සිදුකරේ ඇය යි.

⭕මේ නගරය ගොඩනැගිම සහ නඩත්තුව සඳහා ඕෂෝ අමුතු භාවනාවක් හඳුන්වල දීලා තිබ්බා.. ඒ තමයි "worship of work"  හෙවත් වැඩ කරන භාවනාව. එක තැනක සිටිමින් කරන භාවනාව ප්‍රතික්ෂේප කරපු ඔහු අනුගාමිකයන් හැම දෙනාටම යම් වැඩ කොටසක් පවරලා ඒ වැඩ කොටස භාවනාවක් ලෙස කරන්න උපදෙස් දුන්නා.

🛑 ඒ අනුව බටහිර රටවලින් ආපු ලොකු දොස්තරලා, නීතිඥයෝ, සහ මහාචාර්යවරු පවා තමන්ගේ සුඛෝපභෝගී ඇඳුම් අයින් කරලා, රතු පාට කම්කරු ඇඳුම් ඇඳගෙන පාරවල් හදන්න පස් කැපුවා, ගඩොල් ඇද්දා, වැසිකිළි පවිත්‍ර කළා.

🛑 ආනන්ද් ශීලා විසින් නගරය ඉක්මනින් ඉදි කිරීමට ඕනෑ වූ නිසා අනුගාමිකයින් ලවා දිනකට පැය 16ක් වැනි අධික කාලයක් වැඩ ගත්තා. සමහර අයට මහන්සිය නිසා අසනීප වීමට පවා සිදුවුණා.🛑

(මුල් කාලයේ කැමැත්තෙන් කරපු වැඩ වන්දනාව, පසුව ශීලාගේ තද නීති සහ තර්ජන නිසා අනිවාර්යයෙන්ම කල යුතු "වහල් සේවයක්" (Forced labor) බවට පත්වුණු බව පසුව නගරය අතහැර ගිය සමහර අනුගාමිකයන් ප්‍රකාශ කළා.)

වසර තුනක් ඇතුලත නොමිලේ ලැබුණු ශ්‍රම දායකත්වයෙන් අංග සම්පුර්ණ නගරයක් ඔරිගොන් හී ඉදිකෙරුණා.

🔺🔺නගරයේ සොභාවය 🔺🔺

⭕ ඕෂෝ තමන්ගේ තරුණ කාලයේදී සමාජවාදී(Socialist) සහ කොමියුනිස්ට් (Communist අදහස් දැඩිව කියවපු සහ ඒවායින් ආභාෂය ලබපු කෙනෙක් නිසා රජ්නීෂ්පුරම් නගරයේ ක්‍රියාකාරකම් නීති, රීතින් සියල්ල සමාජවාදී ස්වරූපයක් ගත්තා.

⭕ .රජ්නීෂ්පුරම් නගරයේ ස්තිර පදිංචි වෙන්න එන අයට තමන්ගේ බාහිර ලෝකයේ තිබුණු ගෙවල් දොරවල්, ව්‍යාපාර විකුණලා, බැංකු ගිණුම්වල තිබුණු සියලුම සල්ලි සහ රත්තරන් බඩු ආශ්‍රමයේ පොදු අරමුදලට (Rajneesh Foundation) පරිත්‍යාග කරන්න සිද්ධ වුණා.නගරයේ තිබුණු ගෙවල්, වාහන, කෑම බීම හැමදේම අයිති වුණේ පොදුවේ ආශ්‍රමයටයි.

⭕ සල්ලි ඔක්කොම ආශ්‍රමයට දුන්නට පස්සේ, නගරය ඇතුළේ කිසිම කෙනෙක්ට පුද්ගලිකව සල්ලි පාවිච්චි කරන්න අවස්ථාවක් තිබුණේ නැහැ. නගරය ඇතුළේ මිලදී ගැනීම්වලට ආශ්‍රමයෙන් නිකුත් කරපු විශේෂ කූපන් හෝ කාඩ්පත් ක්‍රමයක් තමයි තිබුණේ.

මේ දේපළ අත්හැරීමේ ක්‍රියාවලියේ තිබුණු ලොකුම අර්බුදය තමයි, කෙනෙක් තමන්ගේ සියලුම සල්ලි ආශ්‍රමයට දුන්නට පස්සේ, ඒවා ලියකියවිලිවල සටහන් වුණේ. "ස්වේච්ඡාවෙන් දුන් පරිත්‍යාග" (Donations)  විදිහටයි  

(ඒ නිසා පසුව ආශ්‍රමයේ පාලනය ගැන කලකිරිලා හෝ ශීලා එක්ක රණ්ඩු වෙලා නගරයෙන් අයින් වෙලා යන්න හදපු අයට තමන් දුන්නු සල්ලිවලින් එක සතයක්වත් ආපසු ලැබුණේ නැහැ.බොහෝ දෙනෙක් තමන්ගේ මුළු ජීවිත කාලයම හම්බ කරපු සල්ලි ආශ්‍රමයට දීලා තිබුණු නිසා, පසුව නගරය බිඳ වැටෙද්දී ඔවුන් කිසිම දෙයක් නැති අන්ත අසරණයන් බවට පත්වුණා.)🛑

🛑ඕෂෝ මේ ක්‍රමය සාධාරණීකරණය කළේ ආධ්‍යාත්මික දර්ශනයක් හරහායි.. ඔහු කිව්වේ "මමත්වය (Ego) සහ තණ්හාව නැති කරන්න නම් මුලින්ම තමන්ගේ දේපළවලට තියෙන බැඳීම අතහරින්න ඕන" කියලයි!🛑

🔺🔺ලිංගික නිදහස 🔺🔺

🅾️ මේ නගරයේ තිබූ විශේෂ දෙයක් තමයි ලිංගික නිදහස.. එය ප්‍රායෝගිකව අත්හදා බැලුවේ බටහිර මනෝවිද්‍යාඥයන් විසින් මෙහෙයවපු විශේෂ කාමර ඇතුළෙයි. තමන්ගේ ශරීරය ගැන තියෙන ලැජ්ජාව සහ සමාජයෙන් දාපු වැටකඩොලු කඩන්න මේ සමහරක් භාවනා කණ්ඩායම්වලදී (Groups) ඇඳුම් සම්පූර්ණයෙන්ම ගලවා නිරුවත් වෙන්න අනුගාමිකයන්ට නියෝග කෙරුණා.

⭕ මේ කාමර ඇතුළේ එකට එකතු වෙන පිරිසට තමන්ගේ ලිංගික ආශාවන් සහ ෆැන්ටසි (Sexual fantasies) විවෘතව අත්හදා බලන්න ඉඩ දුන්නා. ඔවුන් විශ්වාස කළේ මේකෙන් තමන්ගේ හිත ඇතුළේ තියෙන මානසික ගැටලු සහ ආතතිය නැති වෙලා හිත සැහැල්ලු වෙනවා කියලා.

කැමති කෙනෙක් සමග ලිංගිකව හැසිරීමට නිදහස මේ නගරයේ තිබුනා.

 නගරයේ සම්පත් ආරක්ෂා කරගන්න ඕන නිසා අනුගාමිකයන්ට දරුවන් බිහි කිරීම තහනම් වුණා. ලිංගික නිදහස තිබුණේ විනෝදයට සහ ආධ්‍යාත්මික නිදහසට මිසක් පවුල් සංස්ථාවක් හදන්න නෙවෙයි. මේ නිසා බොහෝ කාන්තාවන්ට වන්ධ්‍යාකරණ සැත්කම් (Sterilization) සහ ගබ්සා කිරීම් සිදු කරන්න වුණා!

⭕ඕෂෝ මේ ආශ්‍රමය සිටි සුන්දරම තරුණියන්  පිරිස තමන්ගේ ලිංගික සහකාරියන් විදිහට තබාගත්තා🛑

ඕෂෝගෙ විධානයෙන් ඔහුත් සමග ලිංගිකව එකතු වීමට මොවුන් සුදානමින් සිටියා.

භගවාන්(ඔෂෝ) සමග ලිංගිකව එකතුවෙන්න ලැබීම ම ඔවුන් සැලකුවේ භාග්‍යයක් විදිහට!

🔺🔺සමුහය 🔺🔺

⭕හැමෝම එහි තිබූ එකම පොදු කුස්සියෙන් (Magdalena Dining Hall) ආහාර ගත්තා.තමන්ට කැමති ආහාර පවා තෝරා ගැනීමට ඔවුන්ට හැකියාවක් තිබුනේ නැහැ. දෙන දෙයක් ඔවුන්ට කෑමට සිදුවුණා.

ඕෂෝගේ දර්ශනයට අනුව ආශ්‍රමය ඇතුළේ මස්, මාළු හෝ බිත්තර කෑම තහනම් වුණා. ඔවුන් ආහාරයට ගත්තේ 100% නිර්මාංශ කෑම වර්ගයි.

කෑමවලට ගත්තු හැම එළවළුවක්, පළතුරක් සහ ධාන්‍ය වර්ගයක්ම වගේ ඔවුන් ලබාගත්තේ රජ්නීෂ්පුරම් නගරය ඇතුළෙම අනුගාමිකයන් විසින් කාබනික ක්‍රමයට (Organic farming) වගා කරපු දැවැන්ත ගොවිපළවල්වලින්.

⭕මේ කුස්සියේ උයන, පිඟන් සෝදන, එළවළු කපන හැම කෙනෙක්ම "වැඩ වන්දනාවේ" (Work as Meditation) යෙදෙන අනුගාමිකයින්.ඔවුන් මෙහි වැඩ කාලේ භජන් (භක්ති ගීත) ගායනා කරමින්.

🔺🔺පරිපාලනය🔺🔺

රජ්නීෂ්පුරම් නගරයේ පරිපාලන කටයුතු (Administration) සිද්ධ වුණේ හරි පුදුම හිතෙන විදිහකට. එක පැත්තකින් ඒක අතිශය දියුණු, ආදර්ශමත් නගර සභා පාලනයක් වගේ පෙනුණත් තිරය පිටුපස තිබුණේ ආනන්ද් ශීලාගේ ඒකාධිපති (Dictatorial) සහ රහස් පොලිස් පන්නයේ දැඩි පාලනයක්.

 ⭕ ඕෂෝගේ පූර්ණ බලය සහ විශ්වාසය තිබුණේ ශීලාටයි. ඇය තමයි නගරයේ ප්‍රධාන විධායක නිලධාරියා (CEO) වුණේ. ඇය ගන්නා තීරණවලට උඩින් යන්න නගරයේ කිසිම කෙනෙක්ට බලයක් තිබුණේ නැහැ. ඇය ඉතාම දක්ෂ, කපටි වගේම දැඩි පාලනයක් ගෙනගිය කාන්තාවක්.

ඇමරිකානු නීතියෙන් බේරෙන්න සහ නගරයේ පාලනය නීත්‍යානුකූල කරගන්න ඔවුන් උපක්‍රමශීලීව කටයුතු කලා. ඔවුන් 1982 දී ඔරෙගන් ප්‍රාන්ත රජයෙන් නීත්‍යානුකූලව අවසර අරන් මේ ඉඩම "රජ්නීෂ්පුරම් නගරය" (City of Rajneeshpuram) විදිහට ලියාපදිංචි කළා.

 නීතියට අනුව නගරයට නගරාධිපතිවරයෙක් (Mayor) සහ නගර සභාවක් (City Council) ඡන්දයෙන් පත් කරගත්තා. හැබැයි මේ හැම තනතුරකටම පත්වුණේ ශීලාට පක්ෂපාතී අනුගාමිකයින් විතරයි. ඒ නිසා නීත්‍යානුකූල නගර සභාව ක්‍රියාත්මක වුණේ ශීලාට ඕන විදිහටයි.

⭕ නගරයේ සාමය පවත්වාගන්න ශීලා රහසිගත ක්‍රමවේද රැසක් භාවිත කළා. නගරයේ හැමතැනම රහස් කැමරා සහ දුරකථනවලට සවන්දීමේ උපකරණ සවි කර තිබුණා. ශීලාට හෝ ඕෂෝට විරුද්ධව අදහස් දක්වන අයව පරිපාලනය මඟින් වහාම හඳුනාගත්තා.

⭕ ශීලාගේ නීතිවලට පිටින් යන, නැත්නම් නගරයේ පාලනය විවේචනය කරන අනුගාමිකයින්ව"පොදු ද්‍රෝහීන්" ලෙස සලකා නගරයෙන් පන්නා දැමීම හෝ ඔවුන්ට දැඩි මානසික පීඩනයන් එල්ල කිරීම සිදුවුණා.

🔺🔺ගැටුමක මුල පිරුම 🔺🔺🔺

මෙසේ රාජනීෂ්පුරය නැතිනම් ඕෂෝගේ යුටෝපියාවේ වැඩ කටයුතු සිද්දවෙනකොට අසල්වැසි ඇමරිකානුවන් සිටියේ මේ අලුතින් පැමිණි අමුතු පිරිස ගැන ඇහැගහගෙන..

ක්‍රිස්තියානින් වූ ඔවුන්ට මේ අලුත්  පිරිසේ හැසිරීම් දිරෙව්වේ නැහැ..විශේෂයෙන් ඔවුන් රෑ එළිවෙනතුරු ශබ්දවාහිනී යන්ත්‍ර ආදාරයෙන් සිදු කරන භජන් ගීත ආදී දේවල්. 

රාජනිශ්පුරය සහ ඇමරිකානුවන් ගැටෙන්නේ පටන් ගත්තේ මෙතැන් සිටයි..

(මතු සම්බන්දයි....)