විශිෂ්ට සිනමාකරුවන්ටත්, කැමරා අධ්‍යක්ෂකවරුන්ටත් නැතුවම බැරිවූ හෙළ සිනමාවේ සැඟවුනු මිනිසා.. - පාලිත මැදිවක

May 19, 2026 at 02:34 PM

|

Lanka Leader

සිංහල සිනමාවේ පෝෂණය සඳහා දායක වූ ඇතැම් පිරිසක් රිදි තිරය මත පෙනුණේ නොපෙනුනා සේම සිනමාව ගැන අලුතෙන් සිතා අලුත් නිර්මාණ කළ එබඳු අපූරු මිනිසුන් ගැන වැඩිපුර ලියැවුනේද නැත.  පාලිත මැදිවක ද එබන්දෙකි. 

මේ අපූරු නිර්මාණකරුවා පසුගියදා එනම්  2026  මැයි මස 10 වැනි දින  සිය 91 වැනි ජන්ම දිනයේදීම අප අතරින් සදහටම නික්ම ගියේය. ඔහුගේ අවසන් කටයුතු පසුගිය 13 වැනි දා  බලගල්ලේ දී සිදුකෙරිණ.

මේ සටහන ඔහු වෙනුවෙනි,

පාලිත ඩබ්ලිව්. මැදිවක ගැන බොහෝ දෙනා නොදන්නවා මෙන්ම ඔහු ප්‍රචාරයට කැමැතිවූයේ ද නැති බව බොහෝ දෙනෙකු පවසති.  

මෙයට දශක දෙකකට පමණ ඉහත මෙරට චිත්‍රපට තැනූ බොහෝ විශිෂ්ට සිනමාකරුවන්ටත්, විශේෂයෙන් කැමරා අධ්‍යක්ෂකවරුන්ටත් ඔහු නැතිවම බැරි වූයේ ඔහු විසින් ගොඩ නගන ලද සම්පන් ෆිල්ම් ඉක්වියුප්මන්ට් හෙවත් සම්පන් සිනමා කාර්මික ආයතනය හේතුවෙන්ය. 

එකල සම්පන් යුනිට් එක නමින් ක්ෂත්‍රයේ පතලව තිබුණු එම ආයතනය හුදෙක් චිත්‍රපට කැමරා හෝ ආලෝක උපකරණ සේවා සැපයූ ආයතනයකට වඩා පතලව තිබුණේ නිර්මාණ ශිල්පි මිනිසෙකුගේ පරිකල්පනා ශක්තිය හේතුවෙන්ය. පාලිත ඩබ්ලිව්. මැදිවක වෘත්තියෙන් ඉංජිනේරුවෙකි. ඔහු අලුත් නිර්මාණ තැනූ ඉංජිනේරුවෙකි.  

ඔහු සතු බොහෝ උපකරණ ඔහු විසින්ම සිය න්‍යාත්මක දැනුම ප්‍රායෝගිකව භාවිතයෙන් ගොඩ නැගූ ඒ්වා  විය. අද මෙන් ඩ්‍රෝන භාවිත කොට රූප ගත නොකරන ඒ දවස රූප ගත කිරිම් උදෙසා යොදා ගත් කැමරා දොඹකරය විදෙස් රටකින් ආනයනය කළේ නම් එය විශාල මුදලක් වැය වන එකකි. එහෙත් පාලිත එය සිය දැනුමෙන් ගොඩ නැංවූයේය. එය කෙතරම් ශක්තිමත් හා සිනමාකරණයේදී විශිෂ්ට නිර්මාණයක් වී ද යත් මෙරට විශිෂ්ට සිනමා කැමරා අධ්‍යක්ෂවරුන් පමණක් නොව මෙරට ජාත්‍යන්තර චිත්‍රපට නිෂ්පාදනයේදී ද එතෙරින් ආනයන නොකොට එම දොඹකරයම යොදා ගැණින. ස්ටීවන් ස්පිල්බර්ග් විසින් නිර්මාණය කරන ලද ඉන්ඩියානා ජෝන්ස්  ඇන්ඩ් ද ටෙම්පල් ඔෆ් ඩූම්  චිත්‍රපටය ඒ් අතරින් එකකි. මෙරට නිර්මාණය කළ දැවැන්ත චිත්‍රපටයක් වූ එය සඳහා අවශ්‍ය දොඹකර එතෙරින් ආනයනය කළ හැකි වුවත් සම්පන් දොඹකරයේ ක්‍රියාකාරිත්වය සුද්දන් මවිත කරවන එකක් විය. 

(තොරතුරු  අන්තර්ජාලයෙන් උපුටා ගන්නා ලදී)