පුනර්ජනනීය බලශක්තිය හරහා වසරකට රුපියල් බිලියන 125 ක් රටට ඉතිරි කර දුන්නා - කීර්ති වික්‍රමරත්න

Sep 9, 2024 at 10:34 AM

|

Lanka Leader

‘සූර්ය බල සංග්‍රාමය’ හරහා මෙගාවොට් 1000ක සූර්ය බල ශක්තියක් ප්‍රධාන විදුලිබල ප්‍රවාහයට එක්කරදීම සඳහා මූලිකත්වය ගනිමින් වසරකට රුපියල් බිලියන 125 බැගින් රටට ඉතිරි කර දුන් බව සුනිත්‍ය බල ශක්ති අධිකාරියේ හිටපු සභාපති ජනාධිපති අපේක්ෂක කීර්ති වික්‍රමරත්න මහතා පැවසීය.

ඩීසල්, ගෑස් හා ගල්අඟුරු සඳහා විශාල වශයෙන් විදෙස් විනිමය ගලායෑම නැවැත්වීම සඳහා පුනර්ජනනීය බලශක්ති (සුළං,ජල, සූර්ය, භූගත තාප හා මුහුදු ජල තරංග බල) භාවිත කිරීම හැකි තරම් වැඩි කිරීම තුළින් නිෂ්පාදන වියදම අඩු කිරීමත්, දැනට පවතින අධික විදුලි බිල අඩු කිරීම තුළින් ජීවන වියදම අඩු කිරීමත්, රටේ පවතින ඉතා ඉහළ ප්‍රවාහන වියදම් අඩු කිරීමත්, මෙම පුනර්ජනනීය බලශක්තිය තුළින් ළඟා කර ගැනීමට හැකි වන බවද අපේ ජනබල පක්ෂයේ ජනාධිපති අපේක්ෂක කීර්ති වික්‍රමරත්න මහතා කියා සිටියේය.

එමෙන්ම ‘ආලෝක පූජා’ සංකල්පය යටතේ සියලු පූජනීය ස්ථානවලට නොමිලේ විදුලි බලය ලබාදීම හා ‘සැමට සෝලා’ සංකල්පය යටතේ සමෘද්ධිලාභීන්ට හා අනෙකුත් රාජ්‍ය හා රාජ්‍ය නොවන සේවකයන් සඳහා ඉතාමත් අඩු මිලට සූර්ය බලශක්තිය ඇතුළු පුනර්ජනනීය බල ශක්තිය ලබාදීම. ‘ගමන – බිමන හිරු එළියෙන්’ සංකල්පය යටතේ කාර්, බස්, ත්‍රිරෝද හා යතුරුපැදි සඳහා ෑඪ බැටරි තාක්ෂණය හඳුන්වාදීමටත් කටයුතු කරන බවද ඒ මහතා ප්‍රකාශ කළේය. මෙහිදී වැඩිදුරටත් අදහස් දැක්වූ ජනාධිපති අපේක්ෂක කීර්ති වික්‍රමරත්න මහතා මෙසේද කීය.

“අපි දැනටමත් සෝලා පැනල් හදන කර්මාන්තශාලා සමග කාලයක සිට වැඩ කරනවා. ඒ කර්මාන්ත ශාලා සඳහා අපි තිරිවානා ඇතුළු අවශ්‍ය කරන ප්‍රධාන සංඝටක යම් ප්‍රමාණයකට අගය එකතු කරල යවනවා මේ වන විටත්. ඒගොල්ලන් මේ රටේ සෝලා පැනල් හදන්න ආවේ. හැබැයි මේ රටේ උද්ඝෝෂණය කරල ඒවා විරුද්ධවාදීන් විසින් නවත්වා දැම්මා. අපිට බලය ලැබුණාම අපිට ඉදිරියේදී පුළුවන් වෙනවා ඒ අය ලංකාවට ගෙනල්ලා සෝලා පැනල් දෙන්න.

එතකොට මේ රටට ඉතා අඩු මිලකට සෝලා දෙන්න ගන්න පුළුවන්. ඒ වගේම තමයි විදුලි වාහනවලට අවශ්‍ය බැටරි නිෂ්පාදනය කරන්න අපිට හැකි වෙනවා. එම බැටරි අපේම මිනිරන්වලින් නිෂ්පාදනය කිරීමේ හැකියාව අපට තියෙනවා. එමගින් ජනතාවට අවශ්‍ය ගමන් බිමන් අඩු වියදමට හෝ වියදමක් නැතිව කර ගැනීමට හැකියාව ලැබෙනවා. ඒක නිසා විශාල ප්‍රගතියක් වෙනවා මේ රටේ පරිසරය සංරක්ෂණයට හා රටේ ඩොලර් ඉතිරි කරගැනීමට."

- දිවයින