රනිල්ගේ වැල්පාලම දිව්‍යලෝකයට ද? අපායට ද? - වෛද්‍ය වසන්ත බණ්ඩාරගෙන් අනාවරණයක් (වීඩියෝ)

Jul 18, 2024 at 06:03 PM

|

Lanka Leader

ජනාධිපති රනිල් වික්‍රමසිංහ මහතා වැල්පාලමෙන් එගොඩකර රට දිව්‍යලෝකයට ගෙන යන බව පවසන බවත්, ඔහු රට ගෙන යන්නේ දිව්‍යලෝකයට ද?, අපායට ද? යන්න විමසා බැලීමේ දී මේ තුළ ඉතා භයංකාර තත්ත්වයක් බවතින බවත් දේශහිතෛෂී ජාතික ව්‍යාපාරයේ මහලේකම් වෛද්‍ය වසන්ත බණ්ඩාර මහතා පවසයි.

ඒ මහතා මේ බව පැවසුවේ ජාතික සංවිධාන එකමුතුව විසින් පැවැත්වූ මාධ්‍ය හමුවකට එක්වෙමිනි.

1977 සිට රනිල් වික්‍රමසිංහ මහතා මෙරට දේශපාලනය තුළ රැඳී සිටින බවද, 1977 දී ඔහු නියෝජනය කළ පක්ෂය අනුගමනය කළ පරාධීන ආර්ථික මොඩලය තුළ මෙරට අපනයන ආදායම් අඩුවී, ආනයන වියදම් වැඩි වූ බවද පෙන්වාදෙන වසන්ත බණ්ඩාර මහතා, මෙරට ප්‍රධාන ආර්බුදය නිර්මාණය වන්නේ එතැන් සිට බව සඳහන් කරයි.

රනිල් වික්‍රමසිංහ මහතා කර්මාන්ත ඇමැතිව සිටිය දී ඇමරිකානු ඩොලර් මිලියන 250ක් වියදම්කර තැනූ අග්නිදිග ආසියාවේ විශාලම යූරියා කර්මාන්ත ශාලාව තමන්ගේ හෙංචයියන් යොදා වසාදමන තත්ත්වයට පත්කර පසුව පරණ යකඩවලට විකුණා දැමූ බවත් වසන්ත බණ්ඩාර මහතා මෙහිදී පැවසීය.

ජනාධිපතිවරයාට අද වන තෙක්ම පැමිණි ආර්ථික මොඩලය පිළිබඳව කිසිඳු විවේචනයක් නොමැති බවත්, මෙම ආර්ථික මොඩලයම පවත්වාගෙන යමින් 2015 - 2019 කාලය තුළ ලංකා ඉතිහාසය තුළ  වැඩිම පොළියට අරගත් ඇමරිකානු ඩොලර් බිලියන 12ක වැඩිම වාණිජ ණය තොගය අරගත් බවත් ඒ මහතා පවසයි.

සාමාන්‍යයෙන් ද්වී පාර්ශ්වික, බහු පාර්ශ්වික ණය 2%ක පමණ ප්‍රමාණයෙන් ලබාගත්ත ද මෙම වාණිජ ණය තොගය ගැනීම සිදු වූයේ පොලිය 6.8% - 7.5% වැනි ප්‍රමාණයේ විශාල පොලියකට බවද, ගෝඨාභය රාජපක්ෂ හිටපු ජනාධිපතිවරයාට ගෙවාගැනීමට නොහැකි වී හිර වන්නේ ද මෙම අධික පොළියකට ලබාගත් කෙටි කාලීන ණය බවද වසන්ත බණ්ඩාර මහතා මෙහිදී පෙන්වා දෙන ලදී.

රට ණය උගුලේ හිරකරන ලද්දේ ද වර්තමාන ජනාධිපතිවරයා බවත්, ඔහු කිසිවිටක දී මෙම ආර්ථික මොඩලය වැරැදි යැයි පිළිනොගන්නා බව හා ඔහු විසින් තවදුරටත් පවත්වාගෙන යන්නේ ද මෙම වැරදි ආර්ථික මොඩලයම බවත් ඒ මහතා මෙහිදී සඳහන් කළේය.

රනිල් වික්‍රමසිංහ ජනාධිපතිවරයා මේ උත්සාහ දරන්නේ දේශීය කර්මාන්ත පද්ධතිය ගොඩගැනීමට ද, නැතිනම්  හිතාමතාම වැට්ටීමට දැයි වසන්ත බණ්ඩාර මහතා ප්‍රශ්න කළේය.

දේශීය නිෂ්පාදකයාට වැට් බද්ද 10%ක් ගසා ආනයනකරුවා වැට් බද්දෙන් නිදහස් කර ඇති බවත් පවසන වසන්ත බණ්ඩාර මහතා, මෙහිදී පොල්තෙල් ආනයනකරුවන් අඩු මිලට පොල්තෙල් ගෙනවිත් දේශීය පොල්තෙල් කර්මාන්තකරුවා වැට්ටවීමට ක්‍රියාකරන බවත්, තේ මණ්ඩලය විසින් ශ්‍රී ලංකාවේ නිපදවන ලද යන වාක්‍ය ඛණ්ඩය ඉවත්කර ශ්‍රී ලංකාවේ අසුරන ලද  යන වාක්‍ය ඛණ්ඩය ඉතුරුකර සිංහයා ලකුණ සහිත සන්නාමය නිකුත් කරන බවත් පවසයි.

මෙහිදී ඉන්දියාවේ තේ වෙළෙන්දන්ට ඉන්දියාවේ තේ ශ්‍රී ලංකාවේ අසුරා යවා මෙරට වෙළඳපොළ අත්පත්කර ගැනීමට හැකි බවත්, මෙවැනි තීන්දු ලංකාවේ කර්මාන්තකරුවන් වැට්ටවීමට මිස ගොඩගැනීමට ගෙන ආ තීන්දු නොවන බවත් වසන්ත බණ්ඩාර මහතා මෙහිදී පෙන්වාදෙන ලදී.

ලංකාවේ තේ වලින් 10% පමණ ප්‍රතිශතයක් අපනයනය කරන්නේ රුසියාවට බව ද,  රුසියාවට සම්බාධක පනවා ඇති හෙයින් එම අපනයන ආදායම් රට තුළට ගෙන ඒමට හැකියාවක් නොමැති වී ඇති බවත් පවසන ඒ මහතා, මෙරට මහ බැංකු අධිපතිවරයාට අපනයනකරුවන් විසින් දිගින් දිගටම මේ පිළිබඳව දැනුම් දුන්නද ඔහු බීරි අලියකු ලෙස සිටින බවත්, එමගින් අපනයන ආදායම් රට තුළට ගෙන ඒමට නොහැකි වී ඇති බවත් සඳහන් කරයි.

රටේ ආර්ථිකය බිඳ දමා වැල්පාලමෙන් දිව්‍යලෝකයට යන වැඩ මේවාදැයි ඒ මහතා මෙහිදී ප්‍රශ්න කළේය.

මෙවැනි ආර්ථික ඝාතක තීන්දු රාශියක් ක්‍රියාත්මක කරමින් වර්තමාන ආණ්ඩුව කටයුතු කරන  බවත්, ඉඩම් අයිතිය ඇති පුද්ගලයන්ට ඉඩම් අයිතිය දෙන බව පවසමින් ලබා දෙන්නේ ඉඩම් අයිතිය නොව ඉඩම් විකිණීමේ අයිතිය බවත් වසන්ත බණ්ඩාර මහතා මෙහිදී පැවසීය.

කොළඹ තට්ටු නිවාසවල ඒවායේ මුල් අයිතිකරුවන් දැනට 10%ක්වත් නැති බවද, මෙම ඔප්පු ලබාදුන් පසු ඔවුන් එම නිවාස විකුණා දමා යන බවද, ගොවියා කුඹුර විකුණා කොළඹට පැමැණ වෙනත් රැකියාවක් කිරීමට පටන්ගන්නා බවද, අවසානයේ සිදුවන්නේ මෙම කුඩා ඉඩම් මහා ඉඩම් බවට පත්කරන තැරැව්කාර සමාගම් ඒවා බහුජාතික සමාගම්වලට අත්පත්කර ගැනීමේ ක්‍රමවේදය සකස් කිරීම බවද වසන්ත බණ්ඩාර මහතා මෙහිදී පෙන්වා දෙන ලදී.

ඉඩම් විකුණා දමා ඉඩම් අහිමි කිරීමේ MCC ගිවිසුමේ කූඨ සැලසුම මෙම ක්‍රියාවලිය තුළ ක්‍රියාත්මක වන බව පවසන වසන්ත බණ්ඩාර මහතා, මෙය ආර්ථිකය ගොඩ ගැනීමේ සැලසුමක් නොව ඡන්ද ගුණ්ඩුවක් පමණක් බවද සඳහන් කරයි.

මැඩගස්කරය තුළ අද මෙම ක්‍රියාවලිය සිදුවීමෙන් 70%ක ජනතාවට අද ඉඩම් අහිමිවී ඇති බවත්, සියලු ඉඩම් මහා සමාගම් විසින් අත්පත්කරගෙන ඇති බවත් වැල්පාලමෙන් එගොඩකර මෙරට ජනයා ගෙනයාමට සූදානම් වන්නේ දිව්‍යලෝකයටද?, අපායටද? යන්න මෙහිදී ප්‍රශ්නයක් මතුවන බවත් ඒ මහතා වැඩිදුරටත් පවසයි.

ජනාධිපතිවරණය, මහ මැතිවරණය සියල්ල කල් දමා ජනමත විචාරණයක් පවත්වනවා යැයි දින නියම  කරමින්, මහා භාණ්ඩාගාරයේ මුදල් නැති බව පවසා මෙම කටයුතු ටිකෙන් ටික පස්සට දමා දුරාචාර ප්‍රවර්ධන පනත් ටික, රණවිරුවන් දංගෙඩියට ගෙන යන පනත් ටික, ඉඩම් ටික විකුණා ආර්ථිකය පරිවර්තනය නමින් ගෙන ආ පනත වැනි පනත් සම්මත කර, එට්කා ගිවිසුම අත්සන් කර, සෝෆා ගිවිසුමට YES කියූ ලියුම යවා, වැල්පාලමෙන් ගොඩබහින රටේ නමත් වෙනස්කර, ඉන්දියාවේ 29 වැනි ප්‍රාන්තය හා ආමෙරිකාවේ වහල් කඳවුරක්  බවට රට පත්කිරීමට රනිල් වික්‍රමසිංහ ජනාධිපතිවරයා ප්‍රමුඛ ආණ්ඩුව මේ වන විට කටයුතු කරමින් සිටන බවට ද ඒ මහතා මෙහිදී චෝදනා නැගීය.