විදුලිබල ඇමැති කංචන විජේසේකරගේ හිතුවක්කාර තීරණය හේතුවෙන් මෙගා වොට් 70කට ආසන්න සූර්ය බල ව්‍යාපෘති අකර්මණ්‍ය වී ඇතැයි විදුලිය පාවිච්චි කරන්නන්ගේ සංගමයේ ලේකම් සංජීව ධම්මික මහතා ඊයේ (5 දා) චෝදනා කළේය.

එම සංගමය කොළඹදී ඊයේ පැවැත් වූ ප්‍රවෘත්ති සාකච්ඡාවකදී හෙතෙම මේ බව කීවේය.

එහිදී සංජීව ධම්මික මහතා වැඩිදුරටත් මෙසේ ද පැවසීය.

"පසුගියදා විදුලිබල ඇමැතිවරයා විසින් සූර්ය බල ව්‍යාපෘති සඳහා ගෙවන මිල ගණන් හදිසියේම අඩු කළ බවට කළ ප්‍රකාශයක් හේතුවෙන් දේශීය ආයෝජකයින්ගේ නව විදුලි බල ව්‍යාපෘති ඇනහිටලා. සෝලා විදුලි බල පද්ධතිවලින් විදුලිය මිලදී ගැනීමේදී මෙතෙක් ඒකකයට ගෙවූ රුපියල් 37ක මුදල රුපියල් 27 දක්වා අඩු කළ බවට ඇමැතිවරයා ප්‍රකාශ කළේ ජුලි 2 වැනිදායි. නමුත් එම තීරණය ජුලි 1 වැනිදා සිට බලපවත්වන බවටද අමාත්‍යවරයා ප්‍රකාශ කර තිබුණා. මේ ආකාරයට හදිසියේ පුනර්ජනනීය විදුලිය මිලදී ගැනීමේ මිල අඩු කළේ ඉදිරියේදී අධික මිලට හදිසි විදුලිය මිලදී ගැනීමේ අරමුණ ඇතිව ද කියා අපට සැකයි.

පසුගිය කාලයේදී ඇඹිලිපිටිය ඒස් බලාගාරයෙන් ඒකකය රුපියල් 110 වැනි අධික මිල ගණන්වලට මිලදී ගෙන ඇති අවස්ථාද තිබෙනවා. මේ සැරසෙන්නේ එවැනි කොල්ලයකට විය හැකියි. වහල මත සවිකරන සූර්ය බල පද්ධතිවල ආයෝජනය කරන්නේ දේශීය ව්‍යවසායකයින්. සූර්ය බල පද්ධතිවලින් විදුලිය මිලදී ගැනීමේදී ගෙවීම් කරනු ලබන්නේ දේශීය රුපියල්වලින්. ඩීසල් විදුලිය මිලදී ගැනීමේදී ඩොලර්වලින් ගෙවීමට සිදුවන නිසා ඩීසල්, නැප්තා හා දැවිතෙල් සඳහා මෙරට විදේශ විනිමය පිටරටට ඇදී යනවා. මෙරට දිගුකාලීන බලශක්ති සුරක්ෂිතතාව සඳහා පුනර්ජනනීය විදුලි බලාගාර වැඩි වශයෙන් ප්‍රවර්ධනය කළ යුතු අවධියක වත්මන් විදුලිබල ඇමැතිවරයා විසින් ඩීසල් ඇතුළු ආනයනික පොසිල ඉන්ධන මත පදනම් විදුලි බලාගාර ප්‍රවර්ධනයක් කරනවා.

අමාත්‍යවරයා විසින් සූර්ය බල විදුලිබලාගාරවලට ගෙවන ගාස්තු සංශෝධනය කර ඇත්තේ නව විදුලි බල පනතේ 29 වන වගන්තිය උල්ලංඝනය කරමින්. එම වගන්තියට අනුව මෙවැනි ගාස්තු සඳහා ශ්‍රී ලංකා මහජන උපයෝගිතා කොමිෂන් සභාවේ අවසරය තිබිය යුතුයි. නමුත් මහජන උපයෝගිතා කොමිෂන් සභාව එවැනි අවසරයක් ලබා දී නැති බව තහවුරු කර තිබෙනවා."

- දිවයින -