2024 ජූනි 12 වනදාට යෙදෙන 34 වන රුසියානු ජාතික දිනය වෙනුවෙන් ජාතික නිදහස් පෙරමුණ උණුසුම් සුබ පැතුම් එක්කර තිබේ.

ඒ නිවේදනයක් නිකුත් කරමින් එම පෙරමුණ පවසන්නේ යුක්රේන භූමියේ සාමූහික බටහිරයන්ට එරෙහිව රුසියානුවන් විසින් සිදු කරන ලද ආරක්ෂණවාදී මෙහෙයුම් මෙතෙක් සාමූහික බටහිරයන්ට දැවැන්ත පරාජයන් අත් කර දී ඇති බවත්, රුසියානු ජනාධිපති අතිගරු ව්ලැඩිමීර් පුටින් මැතිතුමාගේ නායකත්වයෙන් යුත් රුසියානු රාජ්‍යය මෙම  සියලු අභියෝග ජය ගන්නා බවට තරයේ විශ්වාස කරන බවත්ය.

ඉමහත් උද්යෝගයෙන් තම ජාතික දිනය සමරනු ලබන අපගේ සාම්ප්‍රදායික මිතුරන් වූ රුසියානු ජනතාවට උණුසුම් සුබ පැතුම් පිරිණමන බවද එම පෙරමුණ සඳහන් කරයි.

අදාළ නිවේදනය පහළින්...

ශ්‍රී ලංකාවේ රුසියානු තානාපති ගරු ලෙවාන් එස්. දගාරියන් මැතිතුමා,
ශ්‍රී ලංකාවේ රුසියානු තානාපති කාර්යාලය,
404, බෞද්ධාලෝක මාවත,
කොළඹ 07.

ගරු තානාපතිතුමනි,

2024 ජූනි 12 වනදාට යෙදෙන 34 වන රුසියානු ජාතික දිනයට ජාතික නිදහස් පෙරමුණේ උණුසුම් සුබ පැතුම්!

එක්සත් සමාජවාදී සෝවියට් රුසියාව දිය කර හැරීමෙන් පසුව පිහිටුවාගත් රුසියානු සෝවියට් සමාජවාදී සමූහාණ්ඩු ජනරජයේ මහජන නියෝජිතයෝ 1990 ජූනි 12 වනදා පැවැත්වූ පළමුවන කොංග්‍රසයේදී ජූනි 12 වන දිනය රුසියානු ජාතික දිනය ලෙස නම් කරනු ලැබූහ. 

කෙසේ වෙතත්, 1990න් ඇරඹි දශකය තුළ දී රුසියාව විසින් මෙම දිනය ඉමහත් උද්යෝගයකින් යුතුව සමරනු ලැබුවේ නැත. 2000-2008 කාලසීමාව තුළ වත්මන් රුසියානු ජනාධිපති අතිගරු ව්ලැඩිමීර් පුටින් මැතිතුමන් ප්‍රථම වරට රුසියාවේ ජනාධිපති පදවිය දැරූ අවස්ථාවේදී රුසියානු ජාතික දිනයට නව වටිනාකමක් එක් කිරීමට පියවර ගත්තේය. එතැන් පටන් රුසියාව සිය ජාතික දිනය, ජූනි 12 වන දින ඉමහත් උද්යෝගයෙන් සමරයි.

රුසියානුවන් විශිෂ්ට ජයග්‍රහණයක් ලබා ගැනීමෙන් පසු මේ වසරේ ජූනි 12 වන දින රුසියානු ජාතික දිනය සමරන බව අපගේ කියැවීමයි. යුක්රේන භූමියේ සාමූහික බටහිරයන්ට එරෙහිව රුසියානුවන් විසින් සිදු කරන ලද ආරක්ෂණවාදී මෙහෙයුම් මෙතෙක් සාමූහික බටහිරයන්ට දැවැන්ත පරාජයන් අත් කර දී තිබේ.

රුසියානුවන්ගේ ජයග්‍රහණය අධිරාජ්‍ය විරෝධී කඳවුරට නොමද ආස්වාදයක් ගෙන දුන් බව මේ මොහොතේ අපි ඉමහත් සතුටින් අවධාරණය කරන්නෙමු. කෙසේ වෙතත්, පරාජය හමුවේ අවසානයේ දී සාමූහික බටහිරයන් සිහි එලවාගත නොහැකිව, විවිධ සදාචාර විරෝධී ක්‍රම භාවිතා කරමින් රුසියානු රාජ්‍යයට පහර දීමේ අනතුරක් ඇති බව අපට හැඟේ.

සාමූහික බටහිරයන් රුසියාවට එරෙහිව මිලිටරි සහ මතවාදී යුද්ධයක් දියත් කිරීමට සියලු උපක්‍රම භාවිතා කරනු ඇති බවට සැකයක් නැත. නමුත් රුසියානු ජනාධිපති අතිගරු ව්ලැඩිමීර් පුටින් මැතිතුමාගේ නායකත්වයෙන් යුත් රුසියානු රාජ්‍යය එකී සියලු අභියෝග ජය ගන්නා බව අපගේ විශ්වාසයි.

අවසන් වශයෙන් ඉමහත් උද්යෝගයෙන් තම ජාතික දිනය සමරනු ලබන අපගේ සාම්ප්‍රදායික මිතුරන් වූ රුසියානු ජනතාවට උණුසුම් සුබ පැතුම් පිරිනැමීමට අපි කැමැත්තෙමු. මෙම මිත්‍රත්වය අතිගරු ව්ලැඩිමීර් පුටින් මැතිතුමන් විසින් අඛණ්ඩව ශක්තිමත් කරනු ලබන බව අපගේ විශ්වාසයයි. රුසියානු ජාතික දින සැමරුමට සම්බන්ධ වීමට ලැබීම අපට ගෞරවයක් බව ද මෙහිලා සඳහන් කරනු කැමැත්තෙමු.

ස්තුතියි.
මෙයට විශ්වාසී,
විමල් වීරවංශ(පා. ම.),
නායක,
ජාතික නිදහස් පෙරමුණ,