කාලගුණ විද්‍යා දෙපාර්තමේන්තුවට ඊයේ (02 වැනිදා) දිනය සම්බන්ධයෙන් නිවැරදි කාලගුණ වාර්තාවක් ඉදිරිපත් කිරීමට නොහැකි වූ බව අනාවරණය වී තිබේ.

කාලගුණ විද්‍යා දෙපාර්තමේන්තුව පසුගිය 31 වැනිදා පස්වරුවේ නිකුත් කරන ලද ඉදිරි පැය 36 සදහා වූ කාලගුණ නිවේදනය මගින් සඳහන් කරන ලද්දේ බස්නාහිර, සබරගමුව පළාත්වලත්, ගාල්ල සහ මාතර දිස්ත්‍රික්කවලත් මිලි මීටර් 100 ට වැඩි වර්ෂාපතනයක් ඇදහැලෙන බව වුවත්, ඊයේ (02 වැනිදා) පෙරවරු 8.30 න් අවසන් වූ පැය 24 ක කාලය තුළදී රත්නපුර දිස්ත්‍රික්කයේ ඇහැලියගොඩ ප්‍රදේශයෙන් මිලි මීටර් 436 ක වර්ෂාපතනයක් වාර්තා විය.

නිවැරදි අනාවැකියක් ලබාදීමට නොහැකිවීම සම්බන්ධයෙන් කාලගුණ විද්‍යා දෙපාර්තමේන්තුවේ බලධාරීන් මාධ්‍ය හමුවේ කියා සිටියේ ඩොප්ලර් රේඩාර් (Doppler Radar) පද්ධතියක් නොමැතිවීම නිසා වැසි තත්ත්වය පිළිබඳව නිශ්චිතවම සඳහන් කිරීමට නොහැකිවූ බවය.

ඩොප්ලර් රේඩාර් පද්ධතියක් මගින් වායුගෝලීය සාධක හඳුනාගැනීමෙන් ඉදිරි පැය දෙක තුනක කාලගුණ අනාවැකිය ප්‍රකාශ කිරීමේ හැකියාව පවතී. මෙම තාක්ෂණය ලෝකයේ රටවල භාවිත කෙරෙන්නේ දැනට අවුරුදු 20 කට වැඩි කාලයක සිටය.

ශ්‍රී ලංකාවට ද නවීන ඩොප්ලර් රේඩාර් පද්ධතියක් මිලදී ගැනීම සඳහා රුපියල් මිලියන 400 ක මුදලක් අය වැයෙන් වෙන් කෙරිණි. මෙම පද්ධතිය ගොංගල කඳු මුදුනේ සවි කිරීමටද සැලසුම් කෙරිණි. ඇමෙරිකාවෙන් 2011 වසරේදී ආනයනය කරන ලද මෙම පද්ධතිය ගොංගල කඳු මුදුනට ප්‍රවාහනය කරද්දී රථය පෙරළී ගියේය. 

කෙසේ නමුත්, මෙම පද්ධතිය භාවිත කිරීමට මෙතෙක් නොහැකිවී තිබේ. මෙම පද්ධතිය සඳහා රුපියල් කෝටි 20 ක මුදලක් වැයවී ඇතැයි ද පැවසේ.

කෙසේ නමුත්, මේ දක්වා නවීන ඩොප්ලර් රේඩාර් පද්ධතියක් කාලගුණ විද්‍යා දෙපාර්තමේන්තුවට නොමැතිවීම නිසා ඉදිරි පැය කීපය තුළදී ක්ෂණිකව ඇතිවන කාලගුණ විපර්යාස සම්බන්ධව නිවැරදි අනාවැකි තත්ත්වයන් ප්‍රකාශ කිරීමට නොහැකිවී ඇත.