වසර 30ක් ලේ ගංගාවකින් පිහිනා එතෙර වූ පසු බැසිල් රාජපක්ෂලා උතුරයි දකුණයි අතර මානසික පාලමක් ඉදිකරනවා වෙනුවට කොන්ක්‍රීට් පාලම් ඉදිකර කොමිස් ගසන ආකාරය ගැන කල්පනා කළා - වෛද්‍ය වසන්ත බණ්ඩාර (වීඩියෝ)

May 29, 2024 at 06:47 PM

|

Lanka Leader

ජනාධිපතිවරණය ඉදිරියේ දී පැමිණෙන හෙයින් ජාතික සංවිධානවලට විශාල අභියෝගයක් ඇති බවත්, ඉදිරිපත් වන කිසිඳු අපේක්ෂකයකු මෙරට ජනතාවගේ නළලේ කොටා ඇති ඉරණම වෙනස් කිරීම වෙනුවෙන් කිසිවක් කතාකර නැති බවත් දේශහිතෛෂී ජාතික ව්‍යාපාරයේ මහ ලේකම් වෛද්‍ය වසන්ත බණ්ඩාර මහතා පවසයි.

බලයට ආවිට කොරන්ඥං කියා වැඩක් නැති බවද, එනිසා ජාතික බලවේගයේ වගකීම වන්නේ   මහජනයා රවටා, මහජනයාගේ කණෙන් රිංගා, මහජනයා ගොණාට අන්දවා ආණ්ඩුබලය ගැනීමට සැරසෙන දේශපාලකයන්ට ඒ සඳහා කිසිඳු ඉඩක්  ලබා නොදීම බවද ඒ මහතා පවසයි.

වෛද්‍ය වසන්ත බණ්ඩාර මහතා මේ බව පැවසුවේ ඉකුත් 27 දින ජාතික පුස්තකාල හා ප්‍රෙල්ඛණසේවා ශ්‍රවණාගාරයේ දී පැවති ජාතික න්‍යායපත්‍රයක මූලාරම්භය (ජාතියට එක් න්‍යායපත්‍රයක්) සම්මුතිය අත්සන් තැබීමේ අවස්ථාවට එක්වෙමිනි.

සියලු අපේක්ෂකයන් රටේ පවතින මෙම අර්බුදය විසඳන උපාය මාර්ගික ප්‍රවේශය කුමක්දැයි ජනතාවට පැවසිය යුතු බවද පවසන ඒ මහතා, එසේ උපායමාර්ගික වැඩපිළිවෙලක් නොමැති නායකයන්ට ඡන්දය දීමෙන් වළකින ලෙස ජාතික සංවිධාන විසින් ජනතාව දැන්වත් කළ යුතු බවද සඳහන් කරයි.

වසර 30ක් ලේ ගංගාවකින් පිහිනා 2009 එතෙරවී ලේ තැවරුණු ඇඳුම් ගලවා පැත්තකට දමා අලුත් ඇඳුම් ඇඳගෙන  පරණ සෙල්ලමම කළ බවත්, බැසිල් රාජපක්ෂලා කිසිවෙකුගේ කීමට කන්නොදී උතුරයි දකුණයි අතර මානසික පාලමක් ඉදිකරනු වෙනුවට කොන්ක්‍රීට් පාලම් ඉදිකර කොමිස් ගසන ආකාරය කල්පනා කළ බවත්, උදාවූ ඒ මනරම් අවස්ථාවෙන් ඔවුන් ප්‍රයෝජනයක් නොගත් බවත් වෛද්‍ය වසන්ත බණ්ඩාර මහතා මෙහිදී පෙන්වා දෙන ලදී.

වීඩියෝව නරඹන්න...