ආන්දෝලනයට ලක් වූ කුරුණෑගල රෝහලේ මොහොමඩ් සාෆි වෛද්‍යවරයාට එල්ල වූ වඳ සැත්කම් සිදුකිරීමේ චෝදනාව දිවයින පුවත්පතේ හේමන්ත රණ්දුණු නිර්මාණය කළ කතාවක් නොවන බව මේ සම්බන්ධයෙන් එවකට පරීක්ෂණ පැවැත්වූ අපරාධ පරීක්ෂණ දෙපාර්තමේන්තුවේ පොලිස් අධිකාරී ශානි අබේසේකර මහතා පළමු වරට හෙළි කර ඇති බව වාර්තා වේ. 

සාෆි වෛද්‍යවරයාද සහභාගි වූ රැස්වීමකදී මේ බව අබේසේකර මහතා පවසා ඇති අතර, ඔහුට අනුව පොලිසිය මේ සම්බන්ධයෙන් ආරම්භක පරීක්ෂණය සිදුකර ඇති බවත්, හේමන්ත රන්දුණු සිදු කර ඇත්තේ එම විමර්ශන පිළිබඳ තොරතුරු දැනගෙන පුවතක් පළ කිරීම බවත් සඳහන්ය. 

පුවත දැකීමෙන් පසු එවකට පොලිස්පති සී.ඩී. වික්‍රමරත්න විසින් ශානි අබේසේකර අමතා උපදෙස් දී ඇත්තේ පොලිස් විමර්ශන පිළිබඳව තොරතුරු එලියට ගියේ කවර ආකාරයෙන්ද යන්න පිළිබද විමර්ශනයක් කරන ලෙසයි. මේ හෙළිදරව්ව සමග සාෆිගේ සිද්ධිය දිවයින පුවත්පත පතේ නිර්මාණයක් බවට වූ අදහස ප්‍රතික්ෂේප වෙයි. 

පැහැදිලි කළ නොහැකි පරිදි අතිවිශාල මුදලක් එක් වර සාෆිගේ ගිණුමට බැරවීම ගැන මුදල් විශුද්ධිකරන චෝදනාවට සාෆි අත්අඩංගුවට පත් විය. තමා අත්අඩංගුවට ගැනීම වැරදි බව පවසමින් වෛද්‍ය සාෆි ශ්‍රේෂ්ඨාධිකරණය හමුවේ පෙත්සමක් ගොනු කළ ද එම අත්අඩංගුවට ගැනීම නිවැරදි බව ශ්‍රේෂ්ඨාධිකරණය තීරණය කළේය. 

2015 වසරේ මහ මැතිවරණයට එක්සත් ජාතික පක්ෂයෙන් කුරුණෑගල දිස්ත්‍රික්කයට තරඟ කළ වෛද්‍ය සාෆි මේ වන විට රාජ්‍ය සේවා කොමිෂමේ තීරණයකට අනුව නැවත කුරුණෑගල රෝහලේ සේවය කරයි. ඔහු ඉදිරි මැතිවරණයට සමගි ජන බලවේගය නියෝජනය කරමින් කුරුණෑගල දිස්ත්‍රික්කයට තරග කිරීමට සැරසෙන බව පැවසේ.