ඉන්දු - අමෙරිකා බලපෑමෙන් මිදීමට සමත් විදේශ ප්‍රතිපත්තියක අවශ්‍යතාව වෛද්‍ය වසන්ත බණ්ඩාර පැහැදිලි කරයි (වීඩියෝ)

Apr 17, 2024 at 10:36 PM

|

Lanka Leader

ඉන්දියාව සමග රනිල් වික්‍රමසිංහ ජනාධිපතිවරයා අත්සන් කළ ඒකාබද්ධ ප්‍රකාශනයේ දෙරටේ ආර්ථිකය ඒකාබද්ධ කරන උපාංග 6ක් ඇති බවත්, මුදල් ඒකකය, මූල්‍ය පද්ධතිය, රේගුව, බලශක්ති පද්ධතිය හා විදුලි බල පනත හරහා විදුලි පද්ධතිය යන කොටස් මෙසේ ඒකාබද්ධ කිරීමට එකඟවී ඇති බවත් දේශහිතෛෂී ජාතික ව්‍යාපාරයේ මහ ලේකම් වෛද්‍ය වසන්ත බණ්ඩාර මහතා පවසයි.

ඉන්දියාවේ රෝ සංවිධානයේ විදේශ ප්‍රතිපත්තිය බවට අද පත්ව ඇති 1932 දී සර්ධාර් පණික්කාර්ගේ න්‍යායපත්‍රය මේ වන විට ක්‍රියාත්මක වෙමින් ඇති බවද, එමගින් ගිවිසුම් හරහා රටවල් යටත් කරගැනීමේ ක්‍රියාන්විතය ඉන්දියා විසින් මෙරටට ද ක්‍රියාත්මක කරමින් සිටින බවද ඒ මහතා සඳහන් කරයි.

වෛද්‍ය වසන්ත බණ්ඩාර මහතා මේ බව පැවසුවේ දෙරණ වාද පිටිය දේශපාලන සංවාදය හා එක් වෙමිනි.

මෙම ආර්ථික ඒකාබද්ධකරණ ක්‍රියාවලිය හරහා ශ්‍රී ලංකාව ඉන්දියාවේ 29 වැනි ප්‍රාන්තය බවට පත්කර ගැනීමේ ඔවුන්ගේ සැලසුම ක්‍රියාත්මක වෙමින් ඇති බවද ඒ මහතා පැහැදිලි කරයි.

මෙරට දේශපාලන පක්ෂ මේ පිළිබඳව කතා නොකරන්නේ මෙරට සිටින තානාපතිවරු ආණ්ඩුව පමණක් නොව දේශපාලන පක්ෂ ද කළමණාකරණය කරමින් සිටින නිසා බවත්, මෙරට අමෙරිකානු තානාපතිනී ජූලි චන්ග් හැසිරෙන්නේ යටත්විජිත ලේකම් ලෙසින් හා ජනාධිපතිවරයා හැසිරෙන්නේ ආණ්ඩුකාරවරයා ලෙසින් බවත් වසන්ත බණ්ඩාර මහතා චෝදනා නගයි.

මෙරට විදේශ ප්‍රතිපත්තිය තෝරනු ලබන්නේ එක් එක් ආණ්ඩු තුළින් පත්වන විදේශ ඇමැතිවරුන්ගේ ප්‍රතිපත්ති අනුව බවද පවසන ඒ මහතා, වර්තමානයේ ජාතියක් ලෙසින් භූගෝලීය පිහිටීම මත මුහුණ දීමට සිදුවී ඇති අර්බුදය කුමන්දැයි මෙරට ජනතාව නිවැරදිව වටහාගත යුතුව ඇති බවත් පෙන්වා දෙයි.

සවිස්තරාත්මක වීඩියෝව නරඹන්න...