හුණුගල් කැණීමට ඉඩම් ගැනීමට එරෙහි පොන්නාවේලි ප්‍රදේශයේ ජනයා විරෝධයේ... විරෝධය අතරට ආ ඇමැති දේවානන්දවත් පන්නයි

Apr 8, 2024 at 07:35 AM

|

Lanka Leader

සිමෙන්ති කම්හලකට හුණුගල් ලබාගැනීමට කිලිනොච්චිය පුනරීන් පොන්නාවේලි හා කිරාංචි ප්‍රදේශවල ඉඩම් ලබාදීමේ සූදානමකට එරෙහිව පොන්නාවේලි ප්‍රදේශයේ ජනතාව දැක්වූ විරෝධතාවක් නතර කිරීමට ගිය ධීවර අමාත්‍ය ඩග්ලස් දේවානන්දා මහතාව උද්ඝෝෂකයන් විසින් පලවා හරිනු ලැබීය.

එම ස්ථානයට පැමිණි අමාත්‍යවරයාට උද්ඝෝෂකයන් විසින් පහරදීමට උත්සාහ කළ අවස්ථාවේ අමාත්‍යවරයාගේ ආරක්ෂකයින් හා ආධාරකරුවන් ඔහු යතුරුපැදියක නංවාගෙන ආරක්ෂිත ස්ථානයකට රැගෙන ගොස් තිබේ. ගම්වාසීන් පැවසූවේ අමාත්‍යවරයා සිය හිතවාදීන් පිරිසක් සමඟ පැමිණ තම ඉඩම් සිමෙන්ති කම්හලකට පැවරීමේ සූදානමක් පැවති බැවින් තමන් ඊට විරෝධය දැක්වු බවයි.

කිලිනොච්චිය පූනකරි ප්‍රාදේශීය ලේකම් කොට්ඨාසයට අයත් පොන්නාවේලි ගම්මානයේ ජනතාව යුද්ධය නිසා දැඩි පීඩාවට පත්ව සිය උපන් ගම්මාන අතහැර ගොස් වසර ගණනක් අවතැන්ව සිට නැවත පදිංචියට පැමිණ සිටිති. යුද්ධය හේතුවෙන් සිය මුල් ගම්මාන අතහැර මුලතිව් වෙත ගොස් අවසන් යුද සමයේ හමුදාවට භාරවී ඇති මෙම ගම්මුන් අනතුරුව වවුනියාව,සෙට්ටිකුලම්හි අවතැන් කඳවුරු තුළ කාලයක් රැඳී සිට 2010 හා 2011 වසරවල යුද්ධයෙන් විනාශ වු ගම්මාන වෙත නැවත පැමිණ තිබේ.

ප්‍රදේශයේ ක්‍රියාත්මක කිරීමට යෝජිත හුණුගල් හෑරීමේ ව්‍යාපෘතියක් නිසා තම ගම්බිම් යළි අහිමි වනු ඇතැයි ඔවුහු දැන් බියෙන් පසු වෙති. පොන්නාවේලි ගම්මානය ආශ්‍රිතව හුණුගල් හෑරීමේ ව්‍යාපෘතියක් ආරම්භ කිරීමට මේ වන විට හුණුගල් ඇති සීමා සොයා බැලීමට පොන්නාවේලි ගම්මානය අවට සීමාවේ භූ කැණීම් කර පරීක්ෂණ පවත්වා ඇතැයි ගම්වැසියෝ පවසති.

ගම්මානය කේන්ද්‍ර කර ගනිමින් හෙක්ටයාර් 1000 කට ආසන්න ප්‍රදේශයක හුණුගල් කැණීමට සිමෙන්ති කර්මාන්ත ශාලාවකට මූලික අනුමැතිය ලබාදී ඇති බවත්, හුණුගල් කැණීම ගම්මානය ආශ්‍රිත ප්‍රදේශයේ සිදු කළහොත් තමන්ට ගම්මානයේ ජිවත්විය නොහැකි බවත් සඳහන් කරමින් පොන්නාවේලි ගම්වාසීහූ දින 100ක් ඉක්වමා මේ වන විට අඛණ්ඩ විරෝධතා පවත්වමින් සිටිති.

- දිනසේන රතුගමගේ