අද (03) උදෑසන තායිවානයේ නැගෙනහිර පළාතේ Hualien Country වෙරළට ඔබ්බෙන් සිදු වූ රිච්ටර් මාපක 7.2 ක භූමිකම්පාවකින් ගොඩනැගිලිවලට හානි සිදු වූ අතර සුනාමි අනතුරු ඇඟවීමක් ද නිකුත් විය.

එරට වේලාවෙන් පෙරවරු 7.58 ට Hualien Country වෙරළට ඔබ්බෙන් සිදු වූ භූමිකම්පාව එහි අගනුවර වන තායිපේ ඇතුළු දිවයින පුරාවටම සංවේදනය වූ බව බලධාරීහු පවසති.

තායිවානයේ ගිනි නිවන දෙපාර්තමේන්තුව පැවසුවේ අවම වශයෙන් පුද්ගලයින් සිව් දෙනෙකු මිය ගොස් 97 දෙනෙකු තුවාල ලබා ඇති බවයි.මේ අතර ප්‍රාදේශීය මාධ්‍ය වාර්තා කළේ ඇතැම් පුද්ගලයන් තවමත් නිවෙස් තුළ සිරවී සිටින බවයි.

තායිවානයේ මධ්‍යම කාලගුණ පරිපාලනයේ භූ කම්පන මධ්‍යස්ථානයේ ප්‍රධානී Wu Chien-fu ට අනුව  1999 වසරෙන් පසු තායිවානයට බලපෑ ප්‍රබලතම භූමිකම්පාව මෙම භුමි කම්පාව වේ.

 උස් ගොඩනැගිලි කිහිපයක් අර්ධ වශයෙන් කඩා වැටී ඇති අතර අනෙකුත් ප්‍රදේශවල භූමිකම්පාව හේතුවෙන් නායයෑම් සිදුව  තිබේ.

තායිවානයේ නගර කිහිපයක අධිවේගී දුම්රිය සේවා මෙන්ම Hualien ප්‍රදේශයේ රජයේ කාර්යාලවල කටයුතු පෞද්ගලික කර්මාන්තශාලාවල කටයුතු මෙන්ම පාසල් වල කටයුතුද අත්හිටුවා තිබේ.

ග්ලෝබල් ටයිම්ස් පුවත්පතට අනුව ෂැංහයි ඇතුළු චීනයේ ප්‍රධාන භූමියේ නගර කිහිපයකට ද භූමිකම්පනය දැනී තිබේ.

මේ අතර දකුණු ජපානයට සහ පිලිපීනයේ උතුරු ප්‍රදේශවලට සුනාමි අනතුරු ඇඟවීම් නිකුත් කර තිබේ. ජපානයේ ඔකිනාවා හි නාහා ගුවන් තොටුපළ සියලුම ගුවන් ගමන් අත්හිටුවා ඇති බව නිවේදනය කර තිබේ.

https://twitter.com/i/status/1775323105440698837

ජපානයේ කියෝඩෝ ප්‍රවෘත්ති ඒජන්සිය වාර්තා කළේ සුළු සුනාමි තත්වයක් යොනාගුනි, ඉෂිගාකි සහ මියාකෝ යන ජපානයේ දකුණු දූපත් වෙත ළඟා වී ඇති බවයි.ජපාන කාලගුණ විද්‍යා සේවය මුලින් මීටර් 3 ක් දක්වා වන සුනාමියක් පුරෝකථනය කළ නමුත් පසුව එය මීටර 1 දක්වා අඩු වන  බව නිවේදනය කළේය.

https://twitter.com/i/status/1775343685091176466