මහ බැංකු අධිපති, IMF කොන්ත්‍රාත්කාරයෙක්... මහ බැංකුවේ සමහරුන්ට ලක්ෂ හතඅටකින් පඩි වැඩි වෙලා - විමල් හෙළිකරයි
මාර්තුවේ දී එට්කා ගිවිසුම අත්සන් කිරීමෙන් පසු ඕනෑම ඉන්දියානුවකුට රැකියාවකට, වෙළඳාමකට ශ්‍රී ලංකාවට නිදහසේ පැමිණිය හැකි බවත් කලක් ගත වන විට ශ්‍රී ලංකාව ඉන්දියානුවන්ගෙන් පිරී යාම සහ ශ්‍රී ලාංකිකයන් මේ රටේ සුළුතරය බවට පත්වීම නොවැළැක්විය හැකි බවත් ජාතික නිදහස් පෙරමුණේ නායක, පාර්ලිමේන්තු මන්ත්‍රී විමල් වීරවංශ මහතා පෙන්වා දෙයි.
එතැන් සිට අපේ රටට ස්වෛරීත්වය අහිමි වන බවත් රට ආර්ථිකමය වශයෙන් “හතරගාතයෙන්” වැටුණු මේ මොහොතේ රනිල් වික්‍රමසිංහ ජනාධිපතිවරයා සිදුකරමින් සිටින්නේ රටේ ස්වෛරීත්වය බිල්ලට දීම බවත් දිනේෂ් ගුණවර්ධනලා සහ රාජපක්ෂලා එම පාපතර මෙහෙයුමට “පහන” අල්ලන බවත් ඒ මහතා වැඩිදුරටත් පෙන්වා දෙයි.
පසුගියදා කඩුවෙල කොස්වත්තේ දී පැවති “9න් පසුව : ශ්‍රී ලංකාවේ ඉරණම?” යන මැයෙන් පැවති ජන හමුවක් අමතමින් ඒ මහතා මෙසේ පෙන්වා දුන්නේය.
එහිදී වැඩිදුරටත් අදහස් දැක්වූ ඒ මහතා මෙසේ ද සඳහන් කළේය.
කවුද මේ IMF කොන්ත්‍රාත්කාරයා?
“පාකිස්ථානයත් අපි වගේම අර්බුදයක ඉන්නේ. ජාත්‍යන්තර මූල්‍ය අරමුදල පාකිස්ථානයටත් කිව්වා, ‘ශ්‍රී ලංකාව ආදර්ශයට අරන් විදේශ ණය ගෙවන්න බැහැ කියා ප්‍රකාශයට පත් කරන්න’ කියලා. නමුත් පාකිස්ථානයේ හිටියේ මේ වගේ මැට්ටෝ ටිකක් නොවෙයි. ඔවුන් කිව්වා, ‘එහෙම කළොත් අපි ඉවරයි. ලංකාව නොවෙයි මොකා කළත් අපි ඒක කරන්නේ නැහැ’ කියා. චීනය සහ මැද පෙරදිග රටවල් කිහිපයකින් ණය ආධාර අරගෙන පාකිස්ථානය ඒ අර්බුදයෙන් දැන් ගොඩඑමින් තිබෙනවා. එයාලා කිව්වේ නැහැ, ‘ණය ගෙවන්න බැහැ’ කියලා. නමුත් ශ්‍රී ලංකාවේ මහ බැංකු අධිපති, ජාත්‍යන්තර මූල්‍ය අරමුදලේ කොන්ත්‍රාත්කාරයෙක්. ඔහු මහ බැංකු අධිපති ධුරයට පත් වී දවස් දෙකෙන්, ‘ණය ගෙවන්න බැහැ’ කියන කතාව කිව්වා. එයා පාර්ලිමේන්තුවෙන් හෝ කැබිනට් මණ්ඩලයෙන් නොවිමසා එවකට ජනාධිපති ගෝඨාභය රාජපක්ෂට පමණක් දැනුම් දීලා තමන්ගේ මතය ක්‍රියාවට නැංවූවා. ඊට පස්සේ ජාත්‍යන්තර මූල්‍ය අරමුදල ශ්‍රී ලංකාවේ බෙල්ල මුලින්ම අල්ලා ගත්තා.
මහ බැංකුවේ ස්වාධීනත්වයේ තරම මෙන්න!
පනතක් ගෙනත් මහ බැංකුව ස්වාධීන කළාට පසුව සිදුවන දේ බලන්න. මහ බැංකුවේ උන්දැලා තමන්ට සියයට 70කින් පඩි වැඩි කරගෙන තිබෙනවා. ප්‍රශ්න කළාම, ‘අපි පඩි වැඩි කරගත්තේ ඒකාබද්ධ අරමුදලින් නොවෙයි’ කියා කියනවා. නමුත් පඩි වැඩි කරගෙන ඇත්තේ ශ්‍රී ලංකාව සතු මුදල්වලින්නේ. සමහරුන්ට ලක්ෂ හතඅටකින් පඩි වැඩි වී තිබෙනවා. ස්වාධීන කළේ ඔය විදියට පඩි වැඩි කරගන්නද?
‘පාලු ගෙයි වලන් බිඳපු’ හරීන්ට…
අද වන විට මේ පාලකයන් මේ ආර්ථික අර්බුදයෙන් ගොඩඑනවා වෙනුවට මේ අර්බුදය යොදාගන්නවා අපේ රටේ ස්වෛරීත්වය බිල්ලට දෙන්න. ඔබ දන්නවා මොළය නියමිත තැන පිහිටා නොමැති හරීන් ප්‍රනාන්දු කියා ඇමතිවරයකු මේ රටේ ඉන්නා බව. එයා ඉන්දියාවට ගිහින් කියනවා, ‘ශ්‍රී ලංකාව ඉන්දියාවේ කොටසක්’ කියා. එහෙම කියලා ඒ ගොන් ඇමතියා පල් හිනාවකුත් දානවා. මේ ප්‍රකාශයට එරෙහිව මම පාර්ලිමේන්තුව තුළ ප්‍රහාරයක් එල්ල කළාට පස්සෙ පාලු ගෙයි වලන් බිඳිමින් හරීන් ප්‍රනාන්දු කියනවා, ‘බුද්ධාගම ආවේ ඉන්දියාවෙන්. ඒ නිසා අපි ඉන්දියාවේ කොටසක්’ කියා. එහෙමනම් මේ රටට කතෝලික ආගම ආවේ පෘතුගාලයෙන් හෝ ඕලන්දයෙන් හෝ බ්‍රිතාන්‍යයෙන් හෝ විය හැකියි. නමුත් අපි කියනවාද, ‘ශ්‍රී ලංකාව ජෙරුසලමේ – ඊශ්‍රායලයේ කොටසක්’ කියා. දැන් මේ රටේ ඉස්ලාම් දහම අදහන පිරිසක් ද ඉන්නවා. එතකොට මේ රට මැදපෙරදිග කොටසක් ද? එයා ඒ පාලු ගෙයි වලන් බිඳිමින් කළ කතාවේදී කියනවා, ‘අපිත් ඉන්දියාව වගේම ඉඳිඅප්පම්, ආප්ප කියන වචන පාවිච්චි කරනවානේ’ කියා. එහෙමනම් ‘ජනේලය, අල්මාරිය’ වැනි වචන පෘතුගීසිනේ. එතකොට අපි පෘතුගාලයේ කොටසක් ද? මේ වගේ ගොන් ඇමතිවරුන් රටක් කරනකොට රටකට හරි යයිද?
ඉන්දියාවේ ආදරයේ ‘තරම’
හරීන් ප්‍රනාන්දුගේ කටින් ‘ලංකාව ඉන්දියාවේ කොටසක්’ කියන එක එළියට ආවේ ඇයි? මේ පාලකයන් ඒ වැඩේ කරන්න යන නිසයි. තෙල් හිඟ අවස්ථාවේ අපට බිලියන් කිහිපයක ණයක් දුන්නු නිසා, ඉන්දියාවේ විදේශ අමාත්‍යවරයා ඔවුන්ගේ සංචාරකයන්ට ලංකාවට යන්න කියන නිසා සමහරුන් හිතන් ඉන්නවා, ‘ඉන්දියාව අපට උදව් කරනවා’ කියලා. නැහැ, ඇත්ත කතාව ඒක නොවෙයි. ඉන්දියානු සංචාරකයන්ට එරට විදේශ අමාත්‍යවරයා ලංකාවට එන්න කිව්වේ අපට ආදරේට නොවෙයි; මාලදිවයින් නව ජනාධිපතිවරයා චීන හිතවාදී පිළිවෙතක් අනුගමනය කරන නිසයි; ඉන්දියාව තුළ ‘Boycott Maldives'(මාලදිවයින වර්ජනය කරනු!) නමින් දැවැන්ත විරෝධතා ව්‍යාපාරයක් ද දියත් වන නිසයි. දැන් බලන්න, ඉන්දියාව තමයි එවකට ඉන්දියාවේ හිටපු ශ්‍රී ලංකා මහ කොමසාරිස් මිලින්ද මොරගොඩ ලවා එවකට ජනාධිපති ගෝඨාභය රාජපක්ෂට ලණුව කැව්වේ, ‘රුපියල නිදහසේ පා කර හරින්න’ කියා. ඒ වන විට ඩොලරය තිබුණේ රුපියල් 200ක සීමාවේ. නමුත් පා කරලා හැරියාට පසුව නතර වුණේ රුපියල් 400කට කිට්ටු කරලයි. ඔන්න එතකොට එකවරම අපේ ණය බර රුපියල්වලින් දෙගුණ වුණා. ඒ නිසා ඩොලර් අර්බුදයක හිටපු ශ්‍රී ලංකාවට රුපියල් අර්බුදයකුත් ආවා.
‘අමුල් බිබී වැනීයන්’
දැන් බලන්න, ලාභ ලබන ටෙලිකොම් දෙන්න හදන්නේ ඉන්දියානු සමාගමකට. විදුලි බල මණ්ඩලය අටකට කඩලා දෙන්න හදන්නේ ඉන්දියානු සමාගම්වලට. මිල්කෝ සමාගම ඇතුළු පශුසම්පත් සංවර්ධන මණ්ඩලයට අයත් ගොවිපළවල් 31ක් සහ ඉඩම් අක්කර 28,000ක් දෙන්න යන්නෙත් ඉන්දියාවේ අමුල් සමාගමට. ‘මිල්කෝ එක’ විකුණන්නම ඕනේ නම් ඒක ඒ ක්ෂේත්‍රයේ වැඩක් කරලා පෙන්නපු ආරියශීල වික්‍රමනායක වැනි දේශීය ව්‍යවසායකයෙකුට දෙන්න බැරි ඇයි? ඉන්දියාව විවේචනය කරපු අය දැන් කියනවානේ, ‘ඉන්දියාවත් වෙනස් වෙලා – අපිත් වෙනස් වෙලා’ කියලා. දැන් ඒගොල්ලෝ හරි හොඳ වෙලා. ‘වැනියන් අමුල් වැනීයන් – අමුල් බිබී වැනීයන්’ කියලයි අපට කියන්න තියෙන්නේ. මතක තබාගන්න, මේ තමයි ඉන්දියාව විසින් ශ්‍රී ලංකාව ගිලගන්නා තීරණාත්මකම වෙලාව.
ඊළඟට ඉන්දියානු හාල් එනවා!
අපි දන්නවා, ඉන්දියාවේ ගොවියාගෙන් විදුලියට මිලක් අය කරන්නේ නැහැ; විදුලිය නොමිලේ දෙනවා. ඒ නිසා ඉන්දියාවේ කෘෂිකාර්මික නිෂ්පාදන පිරිවැය අඩුයි. නමුත් ලංකාවේ ගොවියාගේ උදැල්ල ඇතුළු කෘෂි ආම්පන්නවලටත් සියයට දහඅටක වැට් බද්දක් එකතු වුණා. මේකත් වක්‍රව බලපාලා මේ කන්නයේ හාල් මිල ඉහළ යනවා. ඊට පස්සේ මේ පාලකයෝ ‘අපි ඉන්දියාවෙන් හාල් ගෙනෙන්නම්’ කියලා අපට ඉන්දියානු හාල් කවයි. බිත්තර මිල වැඩි වුණාම ගාණක් තියාගෙන ඉන්දියානු බිත්තර ගෙනවිත් අපිට කවනවා වගේ ඉදිරියේදී ඉන්දියානු හාලුත් ගෙනවිත් අපට කවාවි.
‘එට්කා’ ඇවිත් කරන වැඩේ…
මේක මෙතැනින් නතර වෙයිද? නැහැ. අපේ ආර්ථික මර්මස්ථාන ටික ගිලගන්න ගමන් ඔන්න දැන් එට්කා ගිවිසුමත් මාර්තු මාසයේ අත්සන් කරන්න ඉන්දියාව සූදානම් වෙනවා. එට්කා ගිවිසුම අත්සන් කළාට පසුව ඕනෑම ඉන්දියානුවකුට රැකියාවකට, වෙළඳාමකට නිදහසේ ශ්‍රී ලංකාවට එන්න පුළුවන්. කුඩාම රැකියාවේ සිට ඉහළම රැකියාව දක්වා වන පුරප්පාඩුවලට ඉන්දියානුවන් එනකොට, පෙට්ටිකඩේ සිට මහා පරිමාණ ව්‍යාපාරය දක්වා පවත්වාගෙන ගන්න ඉන්දියානුවන් එනකොට ශ්‍රී ලංකාව ඉන්දියානුවන්ගෙන් පිරෙන එක වළක්වන්න බැහැ. නොදැනුවත්වම අපි මේ රටේ සුළුතර ජනගහනයක් බවට පත්වෙන එක වළක්වන්න බැහැ.
රනිල්ට “පහන” අල්ලන කට්ටිය
එතැන් සිට මොකද වෙන්නේ? එතැන් සිට ශ්‍රී ලාංකික අපිට අපේ ස්වෛරීත්වය අහිමි වෙනවා. ශ්‍රී ලංකාව තුළ තීරණාත්මක බලවේගය බවට ඉන්දියාව පත් වෙනවා. ආර්ථිකමය වශයෙන් හතරගාතයෙන් වැටුණු වෙලාව, රටේ ස්වෛරීභාවය බිල්ලට දෙන වෙලාව බවට පත් කරන එකයි රනිල් වික්‍රමසිංහ ඇතුළු මේ ආණ්ඩුව කරන්නේ. දිනේෂ් ගුණවර්ධනලා, රාජපක්ෂලා අද ‘පහන’ අල්ලන්නේ ඒ පාපතර මෙහෙයුමට. ජනවරමට කිසිම සම්බන්ධයක් නැති කෙනෙකුට පුටුව දීලා ගෝඨාභය රාජපක්ෂ එදා පැනලා දිව්වා. ගෝඨාභය දාලා යනවා නම් අගමැති ධුරය දිය යුතුව තිබුණේ ජනවරමට සම්බන්ධ මිනිහෙකුට. රනිල් වික්‍රමසිංහ ජනවරමක් තියා පාර්ලිමේන්තු ආවෙත් ජාතික ලැයිස්තුවෙන්.
අර්බුදයේ ‘පීතෲවරයාටම’ පුටුව දුන්නා
රනිල් වික්‍රමසිංහ කියන්නේ මේ අර්බුදයේ පීතෲවරයා. එයා තමයි 2018 එක රැයින් ඩොලර් බිලියන 12.5ක් ලෝකයේ පොලී මුදලාලිලාගෙන් ණයට ගත්තේ. ඒ ණය පොලිය ගෙවාගන්න බැරුව තමයි රට හතරගාතයෙන් ඇදවැටුණේ. ගෝඨාභය රාජපක්ෂ පලා ගියේ මේ අර්බුදයේ පිතෲවරයාටම රට භාර දීලයි. දැන් ජනවරමට කිසිදු සම්බන්ධයක් නැති මිනිහෙක් රටට කරන්න පුළුවන් විශාලතම අගතිය අඛණ්ඩව කරගෙන යනවා.
කීර්ති විජයබාහු – දුටුගැමුණු ආදර්ශයන්
බඩගින්නේ හිටියත් රට ගැන හිතපු මිනිස්සු තමයි මේ පොළොවේ ජීවත් වුණේ. අපේ මුතුන්මිත්තන් කවර දුෂ්කරතා තිබුණත් ආක්‍රමණිකයා ඉදිරියේ දණින් වැටුණේ නැහැ. එදා කීර්ති කුමාරයා කැලේට ගිහින්, ගඩාගෙඩි කමින්, අනේකවිද දුෂ්කරතා මධ්‍යයේ සේනා සංවිධානය කරගෙන ඇවිත් තමයි ඒ සොලී ආක්‍රමණික බලය සහමුලින්ම පරාජය කළේ. දුටුගැමුණු කුමාරයා ඒ මහා චෝල බලය පරාජය කරන්න තමයි එදා සේනා සංවිධානය කරගෙන ආවේ. ඒ නිසා හතරගාතයෙන් වට්ටලා තියෙන වෙලාවෙ, ලක්මෑණියන්ගේ ස්වෛරීත්වය උදුරා ගන්න හදන ලෝකයේ කවර බලවතෙකු හෝ ඉදිරියේ දණ ගහන්න අපි සූදානම් නැහැ. අපි කියන්නෙ නැහැ, ‘ඉන්දියාව සමඟ යුද්ධ කරන්න ඕනේ’ කියලා. නමුත් අපි යටත් විය යුතු නැහැ. ඔහු අපේ අසල්වැසියා නම් උදව් කරගෙන, සාමකාමීව, මිත්‍රශීලීව ඉන්න ඕනේ.
ජනාධිපතිවරණයේ දී ‘කළ හැකි – කළ යුතු’ දේ
වෙන කිසිදු වේදිකාවක මේ අනතුර පෙන්වා දෙන්නේ නැහැ. ‘ශ්‍රී ලංකාව ඉන්දියාවේ කොටසක්’ කියා ලැජ්ජා නැතුව හරීන් ප්‍රනාන්දු ඇමතිවරයා කිව්වාම, මමත් උදය ගම්මන්පිල මැතිතුමා ඇතුළු කිහිපදෙනා හැරුණාම වෙනත් කිසිදු දේශපාලන පක්ෂයක් ඒ පිළිබඳව විරෝධයක් තියා ‘හීන් කෙඳිරියක්වත්’ නැඟුවේ නැහැ. හරීන් හෙට ඉන්දියාවට ගිහින් ‘ශ්‍රී ලංකාව ඉන්දියාවේ ප්‍රාන්තයක්’ කියා කිව්වත් ඔය එක චණ්ඩියෙක්වත් කටක් අරින්නේ නැහැ. එයාලා දැන් ඉන්නේ ඉන්දියාවේ ‘අමුල්’ බීලයි. ඉදිරි ජනාධිපතිවරණයේදී මේ අනතුරෙන් මේ රට බේරාගන්න පුළුවන් දෑහිතකාමී නායකත්වයක් ජයග්‍රහණය කරවලා මේ කඩඉම අපි පනින්න ඕනෙ. ඒක අමාරුයි කියලා පෙනුණාට, ‘කළ හැකි – කළ යුතු’ දෙයක්. ඒ හැර අපට කළ හැකි නිවැරදි වෙනත් දෙයක් නැහැ. ඒ නිසා අපි ඒ මහා අභියෝගය භාර ගනිමු! මේ රට ආර්ථිකමය වශයෙන් වැටිලා තියෙන වෙලාවේ ස්වෛරීත්වය බිල්ලට ගැනීමට ඉඩ නොදී ආර්ථිකයත් රටත් ගොඩගන්න පුළුවන් දිශාවට මේ රට හරවමු!”
ඉහත ජන හමුව අමතා ජාතික නිදහස් පෙරමුණේ කඩුවෙල මහ නගර සභාවේ හිටපු මන්ත්‍රී ශෂී පෙරේරා මහතා ද අදහස් දැක්වීය.
(අනුරුද්ධ බණ්ඩාර රණවාරණ)
මාධ්‍ය ලේකම්,
ජාතික නිදහස් පෙරමුණ
සම්බන්ධිත පුවත් | Related News
ප්‍රධාන පුවත්
මාලිමා ආණ්ඩුව බටහිර "ප්‍රොක්සි" ආණ්ඩුවක්.. - ඥානසාර හිමි සිද්ධිය සහ රටේ වත්මන් තත්ත්වය ගැන වෛද්‍ය වසන්ත බණ්ඩාරගෙන් විශේෂ හෙළිදරව්වක්..
බලවත් ජාතීන්ගේ වුවමනා එපාකම් මත සිදුවන ගමන ආපසු හැරවිය නොහැකි බියකරු අන්තයකින් අවසන් විය හැකියි.. - මොහාන් සමරනායක අනතුරු අඟවයි
ඥානසාර හිමියන් වෙනුවෙන් "නිදහසේ පාද යාත්‍රාව" මහනුවර ශ්‍රී දළදා මාලිගාව අබියසින් ඇරඹෙයි..
බටහිර ද්විත්ව ප්‍රමිතිය හෙළි කළ ජාත්‍යන්තර නාටකය: ICC තහංචි සහ නවනීදන් පිල්ලේට නොබෙල් හිමිවීම..
බ්‍රසීල ජනාධිපතිවරණයේ පළමු වටයෙන් බොල්සොනාරෝ පුත්‍රයාට ජයක්.. – බ්‍රසීල දේශපාලනයේ නව හැරවුමක්?
ඊශ්‍රායලය අභ්‍යන්තරයේ සිවිල් යුද්ධයක අවදානමක්.. – ආචාර්ය ජගත් චන්ද්‍රවංශ හෙළිකරයි..
බෞද්ධ වෙහෙර විහාර ආශ්‍රිත පූජාභූමි වලට වෙනත් ආගමික ස්ථාන ඇතුළු කිරීමේ මෙහෙයුමක්.. - වෛද්‍ය වසන්ත බණ්ඩාරගෙන් විශේෂ අනාවරණයක්..
ඥානසාර හිමි ගැන ජනපතිගේ සාකච්ඡාවට කෝට්ටේ ශ්‍රී කල්‍යාණී සාමග්‍රි ධර්ම මහා සංඝ සභාව කැඳවා නොතිබීම ගැන කොටපිටියේ රාහුල හිමියන්ගෙන් චෝදනා..
සියළු සාමණේර හිමිවරුන් අනාගතයේ දී ගලගොඩඅත්තේ කෙනෙකු විය යුතුයි.. - අස්ගිරි අනු නාහිමි
"උසාවි එද්දි සිවුර ගලවන්න බෑ".. - වෛද්‍ය වසන්ත බණ්ඩාර බන්ධනාගාර නිත්‍ය නියෝග පෙන්වමින් හෙළිකරයි..
බුද්ධ චීවරයට අත තැබූ ආණ්ඩුව හත් පොළේ ගාගෙන නිලධාරීන් පාවාදෙයිද..? - විමල්ගෙන් අනාවරණයක්..
සිවුරට මුවාවී ඉතිහාසයේ වැඩිම ගේම් ගහපු පිරිසක් ඉන්නේ මාලිමාවේ 159 අතරේ.. සිවුරු ඇරපු 50කට වැඩි පිරිසක් ඉන්න ආණ්ඩුවක් මේක.. - උලපනේ සුමංගල හිමි
ඉරාන තෙල් නෞකා 17කට ඇමෙරිකාවෙන් සම්බාධක..
ඥානසාර හිමියන්ගේ කටහඬ ගැන නොව, උන්වහන්සේ කියූ ජාතික කාරණා ගැන අවධානය යොමු කරන්න.. ඊළගට ජම්පරේ අන්දන්නේ මට ලු.. – මහාචාර්ය පූජ්‍ය ඉඳුරාගාරේ ධම්මරතන හිමි
එක් අයෙකු වෙනුවෙන් නීති නමන්න බෑ.. බන්ධනාගාර ආඥා පනතේ නීති රෙගුලාසි සමාලෝචනයට කමිටුවක් පත් කරනවා.. - ජනපති
රට වෙනුවෙන් කැපවූ භික්ෂූන් වහන්සේලා, රණවිරුවන් සහ ජාතික බලවේග මර්ධනය කිරීමට ආණ්ඩුවෙන් මෙහෙයුමක්.. - විමල්ගෙන් හෙළිදරව්වක්