බැසිල්ගේ ඇමෙරිකානු නිවාඩුව කෙටි වෙයි... ආපසු එන්න සැරසෙයි... පොහොට්ටුවට බරපතළලු

Feb 13, 2024 at 08:38 AM

|

Lanka Leader

දේශපාලන කරළියේ උණුසුම අනපේක්ෂිත ලෙස ඉහළ යෑම හේතුවෙන් ශ්‍රී ලංකා පොදුජන පෙරමුණ හෙවත් පොහොට්ටුවේ අභ්‍යන්තර දේශපාලන සංවාදය කෙමෙන් බරපතළ වී ඇති බව දේශපාලන ආරංචි මාර්ග පවසයි.

ජනපති රනිල් හා පැවැති සාකච්ඡා ද මීට හේතු වී ඇති බවත් වාර්තා වේ.

මේ අතර  පොහොට්ටුවේ නිර්මාතෘ ලෙස සැලකෙන බැසිල් රාජපක්ෂ මහතා සිය ඇමෙරිකානු නිවාඩුව තරමක් කෙටි කර ගැනීමට තීරණය කර ඇති බවත් දේශපාලන ආරංචි මාර්ග සඳහන් කරයි.

ඔහු මෙරටට පැමිණීමට නියමිතව සිටියේ මාර්තු මාසයේ වන නමුත්  පවතින තත්ත්වයත් ඔහු එම තීරණය වෙනස් කර ඇති බවත්, ඒ අනුව පෙබරවාරි 20 හෝ ඊට ආසන්න දිනයක බැසිල් රාජපක්ෂ මහතා මෙරටට පැමිණීමට සූදානමින් පසුවන බවත් පොහොට්ටුවේ අභ්‍යන්තර ආරංචි මාර්ග පවසයි.

එම ආරංචි මාර්ග වැඩිදුරටත් පවසන්නේ බැසිල් රාජපක්ෂ මහතා නැවත පැමිණි පසු පොහොට්ටු සන්ධානය ශක්තිමත් කිරීමේ කටයුතු අරම්භ වනු ඇති බව යි.

මේ අතර, පොහොට්ටුවේ ජනපති අපේක්ෂකයා රනිල් වික්‍රමසිංහ මහතා නොවන බව පොහොට්ටුවේ මහලේකම් සාගර කාරියවසම්ගේ අදහස වී ඇති අතර සිය පක්ෂයේ ජනාධිපතිවරණ අපේක්ෂකයා කවුදැයි නිෂ්චිතව ප්‍රකාශයට පත් කිරීම අප්‍රේල් මාසයේදී සිදුවනු ඇති බව ද සඳහන්ය.

පොහොට්ටුවේ නිල නොවන අපේක්ෂකයා ලෙස ව්‍යාපාරික ධම්මික පෙරේරා මහතා සිය මැතිවරණ ප්‍රචාරණ ව්‍යාපෘතිය සීරුවට අරඹා ඇති බව පෙනෙන්නට ඇති බව දේශපාලන විචාරකයන් මත පළ කරයි.

ඒ අනුව පොහොට්ටුවේ ජනපති අපේක්ෂක ධූරය තමා වෙත ලබාගැනීමේ ඉහළ අපේක්ෂාවක් ධම්මික පෙරේරා මහතා සතුව ඇති බව යි දේශපාලන ආරංචි මාර්ග පවසන්නේ.