රටේ අර්බුදය මැද ඉන්දියාව ගහන ගේම් එක විමල් හෙළිකරයි (වීඩියෝ)

Feb 12, 2024 at 08:07 AM

|

Lanka Leader

රටෙන් පිටට දෙන ඩොලර්  ප්‍රමාණය අඩුකර, එයට සරිලන නිෂ්පාදනය රටේ වැඩිකර ගැනීම ආර්ථික  අර්බුදයට ඇති ප්‍රධාන විසඳුමක් බවත්, එයට ඉඩක් නොදෙමින් රනිල් වික්‍රමසිංහ ජනාධිපතිවරයා වැට් බද්ද වැඩිකර දේශීය කර්මාන්ත වසා දමන තැනට වැඩ සිද්ධ කර ඇති බවත් ජානිපෙ නායක පාර්ලිමේන්තු මන්ත්‍රී විමල් වීරවංශ මහතා පවසයි.

විදුලි බිල සියයට 300කින් ඉහළ දැමූ පසු රටේ නිෂ්පාදන පිරිවැය වැඩිවන බවත්, පිරිවැය වැඩි වූ විට නිෂ්පාදනයේ මිලද වැඩි වන බව පෙන්වා දෙන ඒ මහතා, මිල වැඩිවූ විට වෙළඳපොළේ තරඟ කළ නොහැකි නිසා කර්මාන්ත වැසී යන බවත් පවසයි.

ඇඟලුම් කර්මාන්ත ශාලාද අද මෙරට වැසී යමින් ඇති බවද, එම කර්මාන්ත ශාලා අද බංග්ලාදේශයේ ඉදිවන්නේ එම රටේ විදුලිය පිරිවැය අඩු නිසා බවද විමල් වීරවංශ මහතා පෙන්වා දෙයි.

එයට හේතුව බංග්ලාදේශය රුසියාවත් සමග එකතු වී එරට න්‍යෂ්ඨික විදුලි බලාගාර ගොඩනැගීම බවත්,  න්‍යෂ්ඨික විදුලි බලාගාර වලින් විදුලිය ගැනීමේ දී ඒකකයක මිල ඉතා අඩු බවත් ඒ මහතා පෙන්වා දෙයි.

ශ්‍රී ලංකාවේ රුසියානු තානාපතිවරයා  ශ්‍රී ලංකාවේ න්‍යෂ්ඨික විදුලිබලාගාර සෑදීමට සූදානම් බව  ප්‍රසිද්ධියේ පැවසූවද, ඒ සම්බන්ධව යෝජනා කිරීමේ දී විදුලි ඇමැතිවරයා ඉවත බලාගත් බවද පැවසූ විමල් වීරවංශ මහතා, මන්නාරමේ සුළං විදුලි බලාගාරය සෑදීමට ඉන්දියාවේ අදානිට ලබාදී අවුරුදු 9ක් යන තෙක් එක් විදුලි ඒකකයක් රුපියල් 48කට අදානිගෙන් ලබාගැනීමට විදුලි ඇමැතිවරයා ගිවිසුම්ගතවී ඇති බවද පවසයි.

විදුලි බල මණ්ඩලයද කොටස්කර විකිණීමට ක්‍රියාකරමින් ඇති බවත්, එය මිලදී ගැනීමට සූදානම් වන්නේද ඉන්දියාවේ අදානි ඇතුළු සමාගම් බවත් ඒ මහතා පවසයි.

පශුසම්පත් මණ්ඩලයට අයත් කිරිගොවිපොළවල් 33ක් සමග මිල්කෝ අයතනය ද අද මිලදී ගැනීමට සූදානම් වන්නේ ඉන්දියාවේ අමූල් සමාගම බවද, අනුර දිසානායක මහතා ඉන්දියාවට ගෙන්වා අමූල් සමාගම පෙන්නද්දී අනුර දිසානායක මහතාගේ ගෝලයන් මිල්කෝ එක ඉදිරිපිට මිල්කෝ එක අමූල් සමාගමට විකුණන්න එපා කියමින් විරෝධතා පවත්වන බවද විමල් වීරවංශ මහතා පවසයි.

සවිස්තාත්මක වීඩියෝව නරඹන්න...