සත්‍ය සෙවීමේ කොමිසම පනතින් රණවිරුවන් යුද අපරාධකරුවන් කර දංගෙඩියට ගෙනයන්නට සැරසෙද්දී මහින්දලා ගෝඨාභයලා නිහඬයි - වෛද්‍ය වසන්ත බණ්ඩාර

Jan 24, 2024 at 09:21 AM

|

Lanka Leader

රනිල් වික්‍රමසිංහ ජනාධිපතිවරයා 2002 දී ආරම්භ කළ බෙදුම්වාදය ශක්තිමත් කිරීමේ ක්‍රියාවලිය දැන් කූඨප්‍රාප්තියට පත්කිරීමට සූදානම් වන බවත්, ඔහු 2002 දී සටන් විරාම ගිවිසුම තුළ බෙදුම්වාදීන්ගේ මනදොල සැපිරීමට දැඩි උත්සාහක නිරත වූ බවත් වෛද්‍ය වසන්ත බණ්ඩාර මහතා පවසයි.

ජාතික සංවිධාන එකමුතුව විසින් පැවැත්වූ මාධ්‍ය හමුවකදී ඒ මහතා සඳහන් කළේ එවැනි උත්සාහයක් ගත් සුඩානයේ එය සාර්ථක වූ හෙයින් අද වන විට සුඩානය බෙදී වෙන්වී එහි ජනතාව එකිනෙකා මරාගන්නා තත්ත්වයකට පත්ව ඇති බවත්ය.

එදා මෙරට ජාතික බලවේග රනිල් වික්‍රමසිංහ මහතාගේ එම ක්‍රියාවලිය පරාජය කළ හෙයින් රට බෙදා වෙන් කිරීමට නොහැකි වූ බවද, එහෙත් 2015 දී ඔහු නැවත බලයට පත්වූ පසු 2003 දී නතර කළ තැනින් යළි පටන්ගන්නා බව ප්‍රකාශ කළ බවද ඒ මහතා පවසයි.

එක්සත් ජාතීන්ගේ මානව හිමිකම් කෙවිට වනන විට ඒ අනුව කටයුතු කරමින් 2015 දී ඔහු උත්සාහ දැරුවේ එම ක්‍රියාවලිය වෙනත් ආකාරයකින් ක්‍රියාත්මක කිරීමට බවත් පෙන්වා දෙන වසන්ත බණ්ඩාර මහතා, 30/1 යෝජනාවට ඔහු එකඟවූයේ ද ඒ නිසා බවත් පෙන්වා දෙයි.

මෙම ක්‍රියාවලියේ දී එදා අගමැතිවරයාව සිටිමින් රනිල් වික්‍රමසිංහ මහතා, යුද්ධය අවසන් කළ හමුදා නායකයන්ගේ ගෙලට තොණ්ඩුව දැමීම සඳහා නීති 5ක් සම්මත කළ බවත්, ඉන්පසුව ජනාධිපතිවරයා ලෙස තවත් නීති දෙකක් සම්මත කළ බවත් වසන්ත බණ්ඩාර මහතා හෙළිකරයි.

දැන් 8වැනි පනත ලෙස සත්‍ය සෙවීමේ කොමිසම පනත ගැසට්කර ඇති බවද මෙම පනත හරහා අනෙක් පනත් හතම සක්‍රීය කිරීමට බලය ලැබෙන බවද ඒ මහතා සඳහන් කරයි.

මෙම සත්‍ය සෙවීමේ කොමිසම පනත ක්‍රියාත්මක වීමේ දී ජාත්‍යන්තර බෙදුම්වාදී බලවේගවලට මෙතෙක් සිදුකිරීමට නොහැකි වූ බොහොදේ සිදුකිරීමට හැකියාව ලැබෙන බව පෙන්වා දෙන ඒ මහතා පවසන්නේ මෙමගින් යුද්ධයට නායත්වය දුන් හමුදා නායකයන් ජාත්‍යන්තර අධිකරණ බලයට යටත් කිරීමටද හැකි වන බවයි.

මෙම පනත ගැසට් කර මාසයක් පමණ ගතවී ඇතත් හිටපු ජනාධිපතිවරුන් වන මහින්ද රාජපක්ෂ හෝ ගෝඨාභය රාජපක්ෂ වැනි නායකයන් දිගින් දිගටම නිහඬව පසුවන බවද වසන්ත බණ්ඩාර මහතා පවසයි.

සවිස්තරාත්මක වීඩියෝව නරඹන්න...