පවතින ආර්ථික ආපදා තත්ත්වය තුළ රටේ ජනතාව කම්පනයට පත්ව සිටිද්දී ජනපති රනිල් ගහන මැච් එක මොකක් ද? - විමල් හෙළිකරයි (වීඩියෝ)

Jan 16, 2024 at 07:44 AM

|

Lanka Leader

රනිල් වික්‍රමසිංහ ජනාධිපතිවරයා අද බටහිර රටවලට සහ ඉන්දියාවට උවමනා සියලු දේ කිසිවෙකුටත් තේරුම් ගැනීමට නොහැකි තරම් වේගයෙන් සිදුකරගෙන යන බවත්, 'යළිපුබුදමු ශ්‍රී ලංකා' සැලසුම නැවත ගෙනවිත් එහි තිබූ අණපනත් සහ සියලු දේ රාජපක්ෂවරුන්ගේ ආශිර්වාදයද ඇතුවම ක්‍රියාත්මක කරමින් සිටින බවත් ජානිපෙ නායක, පාර්ලිමේන්තු මන්ත්‍රී විමල් වීරවංශ පවසයි.

රූපවාහිනී සංවාදයකට එක්වෙමින් ඒ මහතා පවසන්නේ ගෝඨාභය රාජපක්ෂ හිටපු ජනාධිපතිවරයාට ඡන්දය දුන් 69 ලක්ෂයකගේ ජනවරමට සම්පූර්ණයෙන්ම විරුද්ධ ලෙස රනිල් වික්‍රමසිංහ ජනාධිපතිවරයා කටයුතු කරමින් සිටින බවයි.

ඇමරිකාවේ පර්යේෂණ මාධ්‍යවේදිනියක වන නයෝමි ක්ලේන් ලියා ඇති කෘතියක ආපදා අධිරාජ්‍යවාදය තුළ අතරමංවූ ජනතාවක් එම කම්පන තත්ත්වය උපයෝගීකර ගනිමින් පාලකයන්ට අවශ්‍ය දේ පිළිගන්න්නා තත්ත්වයකට පත්කළ හැකි බව පැහැදිලිව සඳහන්කර ඇති බවද, අද රට තුළ සිදුවෙමින් පවතින්නේනේද ආර්ථික අර්බුදයෙන් වික්ෂිප්ත වී අවුල් වූ මනසකින් සිටින ජනතාව මේ වෙනුවෙන් යොදාගැනීම බවද විමල් වීරවංශ මහතා මෙහිදී පෙන්වා දෙන ලදී.

එක්සත් ජාතීන්ගේ සංවර්ධන වැඩසටහන මගින් නිකුත්කර ඇති අලුත්ම වාර්තාවට අනුව ශ්‍රී ලංකාවේ ඉහළම ධනපතීන් සියයට 1 ක ප්‍රමාණය දළ ජාතික ආදායමෙන් 31%ක් බුක්තිවිඳින බවත්, ඉහළම සිටින 10%ක ධනපතීන් 64%ක් බුක්තිවිදින බවත්, පහළම සිටින 50%ක ප්‍රමාණය ජාතික ආදායමෙන් බුක්ති විඳින්නේ 4%ක ප්‍රමාණයක් බවද දක්වා ඇති බවත්, මෙම විෂම තත්ත්වය ලංකාවේ මීට පෙර වාර්තා නොවූ බවත් විමල් වීරවංශ මහතා පැවසීය.

සවිස්තරාත්මක වීඩියෝව නරඹන්න...