රුපියල් 129,650,000,000.00 ක දැවැන්ත ආයෝජනයක් රටින් යයි.. රුපියල් 650,000,000ක වන්දියකුත් ගෙවන්න සිදු වෙයි..

Oct 19, 2026 at 08:44 AM

|

Lanka Leader

ලංකාවේ වරාය ක්ෂේත්‍රයේ සහ ආර්ථිකයේ ඉදිරි ගමන තීරණය කිරීමට තිබූ රුපියල් බිලියන 129.6 ක (ඇමරිකානු ඩොලර් මිලියන 392 ක) දැවැන්තම ඒකාබද්ධ සැපයුම් මධ්‍යස්ථාන ව්‍යාපෘතියෙන් (SACLH) චීන රජයට අයත් China Merchants Port Holdings (CMPort) සමාගම නිල වශයෙන් ඉවත් වෙලා ඉවරයි..

මෙය හොංකොං කොටස් වෙළඳපොළ වෙත පවා ඔවුන් නිල වශයෙන් දැනුම් දී අවසන්ය.

මේ ආයෝජන සඳහා මූලික ගිවිසුම් අත්සන් කරන ලද්දේ 2023 වසරේදීය.

පැහැදිලිවම මේ පිටුපස ඇත්තේ වත්මන් රජයේ අදූරදර්ශී ක්‍රියාකලාපය, අත්දැකීම් මදකම සහ රාජ්‍ය තාන්ත්‍රික නොහැකියාවයි.

සිදුවූයේ කුමක්ද..?

කොළඹ වරාය ආශ්‍රිතව දකුණු ආසියාවේ විශාලතම වාණිජ සහ සැපයුම් මධ්‍යස්ථානය ඉදිකිරීමට නියමිතව තිබුණි. 

මෙමඟින් ලංකාව කලාපීය නාවික කේන්ද්‍රස්ථානයක් බවට පත්වීමට තිබූ අවස්ථාව මෙන්ම, දහස් ගණනකගේ සෘජු හා වක්‍ර රැකියා අවස්ථා රටට අහිමි වී ගොස් ඇත.

මෙය අහිමි වීම සම්පූර්ණයෙන්ම ආණ්ඩූවෙ නියාමනයෙ ගැටළුවකි.

ව්‍යාපෘතියකට අවශ්‍ය ඉඩම් නිදහස් කිරීම් සහ මූලික අනුමැතීන් නියමිත වේලාවට ලබාදීමට අනුරගෙ කයිවාරු ආණ්ඩුව අසමත් වී ඇත. 

විදේශීය ආයෝජකයෙකු මෙවැනි දැවැන්ත මුදලක් රැගෙන රටකට එන විට, රතු පලස් එලා ඔවුන් රඳවා ගන්නවා වෙනුවට, රාජ්‍ය යාන්ත්‍රණයේ පවතින අකාර්යක්ෂමතාවය නිසා ඔවුන්ව පලවා හැර තිබේ.

ජාත්‍යන්තර මට්ටමේ දැවැන්ත සමාගම් සහ ලෝක බලවතුන් සමඟ ගනුදෙනු කිරීමේදී වත්මන් පාලනයේ පවතින රාජ්‍ය තාන්ත්‍රික පරිණතභාවයේ අඩුව මේ හරහා මැනවින් පෙනෙන්නට තිබේ. 

සාකච්ඡා මාර්ගයෙන් ගැටලු විසඳා ගැනීමට අපොහොසත් වීම රටේ ආර්ථිකයට වැදුණු මරු පහරකි.

ව්‍යාපෘතිය අසාර්ථක වීම මදිවාට, ආණ්ඩුවේ වැරදි නිසා චීන සමාගම වෙත ඇමරිකානු ඩොලර් මිලියන 21.9 ක (රුපියල් මිලියන 650 කට අධික) වන්දි මුදලක් ගෙවීමට ශ්‍රී ලංකා වරාය අධිකාරියට සිදුව ඇත. 

අනුරගෙ කයිවාරු ආණ්ඩුවෙ අලුත් ආයෝජන බිංදුවයි - තිබෙන ඒවාත් පලවා හරියි..

මෙම රජය බලයට පත් වූ දා සිට රටට ගෙන ආ එකදු අලුත් හෝ සැලකිය යුතු මට්ටමේ විදේශීය ආයෝජනයක් පෙන්වීමට නැත. 

අලුත් ඒවා ගෙන ඒමට නොහැකි මෙවැනි පසුබිමක, දැනට රට තුළ ක්‍රියාත්මක වීමට තිබූ දැවැන්තම ආයෝජන පවා ආණ්ඩුවේ අකාර්යක්ෂමතාවය නිසා රටට අහිමි වී යමින් පවතී.

මීට පෙර පැවති රජයන් විසින් රටේ බලශක්ති සුරක්ෂිතතාව සහ තරඟකාරීත්වය වෙනුවෙන් මෙරටට ගෙන්වන ලද ජාත්‍යන්තර ඛණිජ තෙල් සමාගම් (Sinopec, RM Parks ආදී) වෙත පවා වත්මන් පාලනය යටතේ විවිධ බලපෑම් සහ තර්ජන එල්ල වෙමින් ඇත.

ජනාධිපතිවරයා එම ආයෝජකයින්ටයිද ගොං පාට් එකක් දැමුවෙ ආයෝජකයන්ගෙ සමුළුවකදිය..

මෙවැනි අත්තනෝමතික ප්‍රතිපත්ති නිසා ලෝකයේ වෙනත් කිසිදු පිළිගත් ආයතනයක් ලංකාව තුළ ආයෝජනය කිරීමට ඉදිරිපත් නොවන තත්ත්වයක් නිර්මාණය වෙමින් පවතී.

ජාත්‍යන්තර මට්ටමේ දැවැන්ත ආයෝජකයන් සහ ලෝක බලවතුන් සමඟ මේසයක වාඩි වී වෘත්තීය මට්ටමින් සාකච්ඡා කිරීමට තරම් භාෂාමය ඥානයක් හෝ රාජ්‍ය තාන්ත්‍රික සන්නිවේදන හැකියාවක් අනුරගෙ ආණ්ඩුවට නැත.

එපමණක් නොව, හම්බන්තොට ඉදිකිරීමට තිබූ ඩොලර් බිලියන 3.1 ක දැවැන්තම තෙල් පිරිපහදු ව්‍යාපෘතියද මේ වන විට මුළුමනින්ම අහෝසි වී ගොස් ඇත..

හිටපු විදුලිබල හා බලශක්ති අමාත්‍ය කාංචන විජේසේකර විසින් චීනයේ සයිනොපෙක් (Sinopec) ආයතනය සමඟ පූර්ව ගිවිසුම්ගතව තිබූ මේ ඩොලර් බිලියන 3.1 ක ඛණිජ තෙල් පිරිපහදු ආයෝජනය, තමන්ගේ එකක් යැයි පම්පෝරි ගසමින් 2025 මාර්තු මස වත්මන් රජය විසින් නැවත ගිවිසුම් ගැසීමට කටයුතු කළේය. 

නමුත් සිදුවූයේ කුමක්ද..? 

ආයෝජකයන් සමඟ ගනුදෙනු කිරීමට ඇති නොහැකියාව, දේශීය වෙළඳපොළ කොන්දේසි කළමනාකරණය කරගැනීමේ දුර්වලතාවය සහ අත්තනෝමතික ප්‍රතිපත්ති නිසා මේ වන විට එම දැවැන්ත ආයෝජන ව්‍යාපෘතියද මුළුමනින්ම අහෝසි වී ලංකාවට අහිමි වී ගොස් අවසන්ය..

ජනාධිපති අනුර කුමාර දිසානායක සහ වත්මන් ආණ්ඩුව සෑම විටම උදම් අනන්නේ තමන්ගේ පාලනය යටතේ අල්ලස සහ දූෂණය මුළුමනින්ම නැති කර ඇති බවයි..

නමුත් ඇත්ත කතාව ඒක නෙවෙයි.. රටේ අල්ලස සහ දූෂණය නැතිවී ඇත්තේ පාලකයන්ගේ පිරිසිදුකම නිසා නොව, රටට අලුතින් එන එකදු ආයෝජනයක් හෝ ව්‍යාපෘතියක් නොමැති නිසා, දූෂණය කිරීමට කිසිදු අවස්ථාවක් ඉතිරිව නැති බැවිනි..

රටක් පාලනය කිරීම යනු වේදිකාවල හිස් සටන් පාඨ කීම, සුරංගනා කතා කීම සහ ඩෝබිලා චූන් කිරීම නොවේ..

ජාත්‍යන්තරය හඳුනන්නේ නැති, ආර්ථික ව්‍යාපෘති කළමනාකරණය කරගත නොහැකි, අත්දැකීම් රහිත මේ පාලනය නිසා අද රටට අහිමි වී ඇත්තේ බිලියන ගණනක විදේශ විනිමයකි.

අනුර නුඹලා මොකවත්ම නොකරාට කමක් නැත. දෙයියන්ගෙ නාමෙන් මීට පෙර ආණ්ඩු මෙරටට ගෙන ආ ආයෝජන ටිකවත් අපට රැකලා දීපල්ලා ඒ ඇති.

- නිලන්ත සත්සර ගමගේ 

(මුහුණු පොතින් උපුටා ගන්නා ලදී)