හදිසි විදුලි බිඳවැටීමෙන් ආර්ථිකයට රුපියල් කෝටි 400ක අලාභයක්.. - චම්පික රණවක හෙළිකරයි..

Oct 19, 2026 at 06:06 AM

|

Lanka Leader

සුගිය 17 වැනිදා දිවයින පුරා ඇති වූ හදිසි විදුලි බිඳවැටීම හේතුවෙන් මෙරට ආර්ථිකයට රුපියල් කෝටි 400 ඉක්මවන දැවැන්ත අලාභයක් සිදුව ඇති බව හිටපු අමාත්‍ය පාටලී චම්පික රණවක මහතා අනාවරණය කරයි.

සිය සමාජ මාධ්‍ය ගිණුම ඔස්සේ විශේෂ ප්‍රකාශයක් නිකුත් කරමින් ඔහු පෙන්වා දෙන්නේ, ජාතික විදුලි සම්ප්‍රේෂණ පද්ධතිය සම්පූර්ණයෙන්ම ඇණහිටීම නිසා පැය හතකට අධික කාලයක් මුළු රටම අඳුරේ පැවති බවයි.

මෙහිදී විදුලිබල සමාගම් වෙත පමණක් සිදුව ඇති සෘජු මූල්‍ය පාඩුව රුපියල් මිලියන 400 ඉක්මවන අතර, දළ දේශීය නිෂ්පාදිතයට විදුලිබල ක්ෂේත්‍රයෙන් ලැබෙන 15%ත් 20%ත් අතර දායකත්වය සැලකිල්ලට ගනිද්දී සමස්ත ආර්ථිකයට සිදුව ඇති වක්‍ර පාඩුව රුපියල් කෝටි 400 කට අධික බව හිටපු අමාත්‍යවරයා ගණන් බලා ඇත.

ස්වභාවික ආපදා හෝ හදිසි කාර්මික දෝෂ හේතුවෙන් විදුලි සැපයුමට බාධා ඇති විය හැකි වුවද, මෙවැනි රටපුරා විදුලිය ඇනහිටින පද්ධති බිඳවැටීම් වැළැක්වීම සඳහා 2019 වසරේ සිට විශාල පිරිවැයක් දරමින් පද්ධති නියාමන මධ්‍යස්ථානයක් ක්‍රියාත්මක කර තිබියදී මෙවැනි තත්ත්වයක් උද්ගත වීම බරපතළ ප්‍රශ්නාර්ථයක් බව ඔහු අවධාරණය කරයි. නිල නොවන ආරංචි මාර්ග සඳහන් කරන්නේ පුත්තලම ලක්විජය බලාගාරයේ හටගත් දෝෂයක් මෙම තත්ත්වයට හේතු වී ඇති බවයි.

මීට පෙර 2025 පෙබරවාරි 09 වැනිදාද මෙවැනිම බරපතළ විදුලි ඇනහිටීමක් වාර්තා වුවද, ඊට අදාළව කිසිදු අභ්‍යන්තර හෝ බාහිර ස්වාධීන පරීක්ෂණයක් පවත්වා වැරදිකරුවන් හඳුනා ගැනීමට කටයුතු කර නැති බව හිටපු අමාත්‍යවරයා මෙහිදී දැඩි ලෙස චෝදනා කර සිටියි. එබැවින්, රටේ ආර්ථිකය අඩපණ කළ මෙම අර්බුදයට සැබෑ වගකිවයුත්තන් සොයා වහාම ස්වාධීන හා අපක්ෂපාතී පරීක්ෂණයක් පවත්වා නීතිය ක්‍රියාත්මක කරන ලෙස ඔහු රජයෙන් ඉල්ලා සිටී.

තවද, මෙම විදුලි බිඳවැටීම් පදනම් කරගනිමින් ඊට මුවාවී පරිසර හිතකාමී සූර්ය බලශක්ති උත්පාදනය කප්පාදු කිරීම සඳහා ආණ්ඩුව පාර්ශ්වයෙන් කුමන්ත්‍රණකාරී ප්‍රයත්නයක් ක්‍රියාත්මක වන්නේද යන්න පිළිබඳව මහජනතාව දැඩි විමසිල්ලෙන් සිටිය යුතු බවටද ඒ මහතා වැඩිදුරටත් අනතුරු අඟවා ඇත.