SJB ඇතුලේ සැර වාද විවාද.. නායකත්වයේ තීන්දු ගැනත් මතභේද..

Oct 18, 2026 at 09:09 AM

|

Lanka Leader

රටේ පවතින අර්බුද හමුවේ විපක්ෂයේ සියලු කණ්ඩායම් එක් කර ගනිමින් පුළුල් පොදු වැඩපිළිවෙළක් නිර්මාණය කිරීමට සමගි ජන බලවේගයේ නායකත්වය අපොහොසත් වීම සහ පළාත් සභාවලට පොලිස් හා ඉඩම් බලතල ලබා දීම සම්බන්ධයෙන් ගත් ඒකපාර්ශ්වික තීරණය මුල් කරගනිමින් පක්ෂය තුළ මතභේදාත්මක තත්ත්වයක් හටගෙන ඇති බව වාර්තා වේ.

රටේ ගැටලු සම්බන්ධයෙන් විපක්ෂයේ සියලු දේශපාලන කණ්ඩායම් එක් කරගත් පුළුල් පොදු පෙරමුණක් සහිතව කටයුතු කළ යුතු යැයි පක්ෂයේ මන්ත්‍රීවරුන් පිරිසක් දිගින් දිගටම ඉල්ලා සිටියද, එම සාධාරණ ඉල්ලීමට නායකත්වයෙන් කිසිදු ධනාත්මක ප්‍රතිචාරයක් ලැබී නැති බවත් පැවසේ. 

පක්ෂ නායකත්වයේ මෙම උදාසීන පිළිවෙත කෙරෙහි දැඩි ලෙස කලකිරීමට පත් වූ සමගි ජන බලවේගයේ ජ්‍යෙෂ්ඨ නායකයකු මෙන්ම හිටපු නියෝජ්‍ය අමාත්‍යවරයකු වන අශෝක අබේසිංහ මහතා පසුගියදා පක්ෂයේ තමන් දැරූ සියලු තනතුරුවලින් ඉල්ලා අස්වීමට පියවර ගත්තේ මෙම මතභේදයේ ප්‍රතිඵලයක් වශයෙන් බවත් සඳහන්. 

මීට අමතරව, පළාත් සභාවලට පොලිස් සහ ඉඩම් බලතල ලබා දිය යුතු බවට පක්ෂ නායකත්වය විසින් මෑතකදී ප්‍රසිද්ධියේ කරන ලද ප්‍රකාශය ද පක්ෂයේ අභ්‍යන්තර ගැටුම් තවදුරටත් උග්‍ර වීමට හේතු වී ඇති අතර, ආණ්ඩුක්‍රම ව්‍යවස්ථාව සහ ජාතික ආරක්ෂාව වැනි සංවේදී ප්‍රතිපත්තිමය තීරණයක් ගැනීමට ප්‍රථමයෙන් පක්ෂයේ කාරක සභාව, කෘත්‍යාධිකාරී මණ්ඩලය හෝ මන්ත්‍රී කණ්ඩායම සමඟ කිසිදු සාකච්ඡාවක් පවත්වා නැතැයි මන්ත්‍රීවරු නායකත්වයට චෝදනා කරති. 

එබැවින්, ජාතික ගැටලු හමුවේ පක්ෂය මීට වඩා සක්‍රීයව සහ වගකීම් සහගතව මැදිහත් විය යුතු බවට මන්ත්‍රීවරුන් පිරිසක් පක්ෂ නායකත්වයට දැඩිව පෙන්වා දී තිබේ.