ඥානසාර හිමිට පවතින නීතිය අනුව ජනාධිපති සමාව දෙන්න බෑ..- අධිකරණ ඇමති

Oct 18, 2026 at 05:57 AM

|

Lanka Leader

අධිකරණයට අපහාස කිරීමේ චෝදනාව මත බන්ධනාගාරගතව සිරදඬුවම් විඳිමින් සිටින බොදු බල සේනා සංවිධානයේ මහලේකම් පූජ්‍ය ගලගොඩඅත්තේ ඥානසාර හිමියන්ට මෙරට පවතින නීතිමය ප්‍රතිපාදන අනුව යළි ජනාධිපති සමාවක් ලබා දීමේ හැකියාවක් නොමැති බව අධිකරණ අමාත්‍ය නීතිඥ හර්ෂණ නානායක්කාර මහතා පවසයි.

අධිකරණ අමාත්‍යවරයා පෙන්වා දෙන්නේ, අධිකරණ තීන්දුවක් මගින් නියම කෙරුණු සිරදඬුවමකට අදාළව නීතියේ ආධිපත්‍යය හා ව්‍යවස්ථාපිත ක්‍රියාපටිපාටියෙන් බැහැරව විධායක බලතල යොදා ගනිමින් හිතුවක්කාරී ලෙස සමාව ප්‍රදානය කිරීමට වත්මන් නීතිමය රාමුව තුළ කිසිදු ඉඩකඩක් නොමැති බවයි.

ආණ්ඩුක්‍රම ව්‍යවස්ථාව සහ අධිකරණයේ ස්වාධීනත්වය ආරක්ෂා කිරීමට බැඳී සිටින රජයක් ලෙස, අධිකරණ නියෝගයන්ට පටහැනිව කිසිදු අත්තනෝමතික දේශපාලන තීරණයක් නොගන්නා බව ද අමාත්‍යවරයා වැඩිදුරටත් අවධාරණය කර තිබේ.

2016 වසරේ හෝමාගම මහේස්ත්‍රාත් අධිකරණයේදී මාධ්‍යවේදී ප්‍රගීත් එක්නැලිගොඩ අතුරුදන් කිරීමේ නඩුව විභාග වෙමින් පැවති අවස්ථාවේදී අධිකරණ කටයුතුවලට බාධා කරමින් අධිකරණයට අපහාස කළ බවට වරදකරු කරමින්, 2018 වසරේදී අභියාචනාධිකරණය මගින් පූජ්‍ය ගලගොඩඅත්තේ ඥානසාර හිමියන්ට වසර 6ක බරපතළ වැඩ සහිත සිරදඬුවමක් නියම කරන ලදී.

කෙසේ වෙතත්, මාස 9කට ආසන්න සිරදඬුවම් කාලයකින් පසුව 2019 මැයි මාසයේදී එවක ජනාධිපති මෛත්‍රීපාල සිරිසේන මහතා විසින් උන්වහන්සේට විශේෂ ජනාධිපති සමාවක් ලබා දී නිදහස් කෙරිණි. 

එම සමාව දීමට එරෙහිව සන්ධ්‍යා එක්නැලිගොඩ මහත්මිය ඇතුළු පාර්ශ්ව කිහිපයක් විසින් ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සම් ගොනු කරන ලදී.

අදාළ පෙත්සම් විභාග කළ ශ්‍රේෂ්ඨාධිකරණ ත්‍රිපුද්ගල විනිසුරු මඬුල්ල, හිටපු ජනාධිපතිවරයා ලබා දුන් එකී ජනාධිපති සමාව අත්තනෝමතික, නීතිවිරෝධී සහ ජනතා පරමාධිපත්‍යය කඩකිරීමක් බව තීන්දු කරමින් ඉකුත් සැප්තැම්බර් මාසයේදී එය ඒකමතිකව බලරහිත කළේය. ඒ අනුව ඉතිරි සිරදඬුවම විඳීම සඳහා ඥානසාර හිමියන් යළි බන්ධනාගාරගත කෙරිණි.