CRIB වාර්තා ගැටලුවට අයවැයෙන් විසඳුම් ඉල්ලා නාමල්ගෙන් ජනපතිට ලිපියක්..

Oct 15, 2026 at 06:05 AM

|

Lanka Leader

ලබාගත් ණය සම්පූර්ණයෙන් ගෙවා අවසන් කළ පුද්ගලයන්ට නැවත ණය ලබාගැනීමේ අවස්ථාව පුළුල් කිරීමට ඉදිරි අයවැයෙන් කටයුතු කරන ලෙස ශ්‍රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ ජනාධිපති අනුර කුමාර දිසානායක වෙත ලිපියක් යවමින් ඉල්ලා සිටි.

ණය තොරතුරු කාර්යාංශය (CRIB) මගින් කිසිවෙකු ලැයිස්තුගත නොකළද, ගෙවා අවසන් කළ ණය පිළිබඳ අතීත තොරතුරු වසර 5ක් දක්වා වාර්තාවේ පවතින බැවින්, අතීතයේ ණය ගෙවීමේ අපහසුතාවලට මුහුණ දී පසුව ඒවා සම්පූර්ණයෙන් පියවූ පුද්ගලයන්ට සහ ව්‍යවසායකයන්ට නැවත ණය ලබාගැනීමේදී බරපතල අපහසුතාවලට මුහුණදීමට සිදුවන බවයි මන්ත්‍රීවරයා පෙන්වා දෙන්නේ.

මේ සඳහා මැලේසියාව වැනි රටවල පවතින ආදර්ශයන් සලකා බලමින් 2027 අයවැය මගින් පහත සඳහන් යෝජනා ක්‍රියාත්මක කරන ලෙසද නාමල් රාජපක්ෂ ජනාධිපතිවරයාගෙන් ඉල්ලා තිබේ.

ඒ අනුව ණයක් සම්පූර්ණයෙන් පියවූ පසු වැඩකරන දින 5ක් ඇතුළත CRIB වාර්තාව යාවත්කාලීන කිරීම, ගෙවා අවසන් කළ ණය “සම්පූර්ණයෙන් පියවා අවසන් කළ” ලෙස පැහැදිලිව වාර්තාවල සඳහන් කිරීම මෙන්ම පැරණි ණය තොරතුරු පමණක් නොව, පුද්ගලයන්ගේ වර්තමාන ආදායම සහ ණය ආපසු ගෙවීමේ හැකියාව මත පදනම්ව ණය තක්සේරු කිරීමට බැංකුවලට මාර්ගෝපදේශ නිකුත් කිරීම දක්වා ඇත.

එමෙන්ම ජාත්‍යන්තර ආදර්ශයන් සලකා බලමින් CRIB වාර්තාවල අතීත තොරතුරු රඳවා තබාගන්නා කාලසීමාව 2027 වසර තුළ සමාලෝචනය කරන්නැයිද ඉල්ලා සිටි.

මේ අතර සියලු ණය වගකීම් පියවා ඇති කුඩා හා මධ්‍ය පරිමාණ ව්‍යවසායකයන් (MSME) සඳහා නැවත ව්‍යාපාර ආරම්භ කිරීමට "දෙවන අවස්ථා ණය වැඩසටහනක්" හඳුන්වා දීමද ඇතුළත්ය.

අතීතයේ ණයක් ගෙවීමට නොහැකි වූ පුද්ගලයෙකු එම ණය සම්පූර්ණයෙන් ගෙවා අවසන් කළ පසු, නැවත ආර්ථිකයට දායක වීමට අවස්ථාව ලබාදීම ව්‍යාපාරිකයන්ට පමණක් නොව සමස්ත රටේ ආර්ථික වර්ධනයටම වැදගත් වන බැවින්, මෙම ගැටලුවට 2027 අයවැය මගින් ස්ථිර විසඳුමක් ලබාදෙන ලෙසයි මන්ත්‍රීවරයා වැඩිදුරටත් අවධාරණය කර සිටින්නේ.